15.01.2019

ЧЕКЛАНГАН ҲУҚУҚ...

Бош Қомусимизда давлатимиз ҳар бир фуқаросининг билим олиш ҳуқуқи кафолатлаб қўйилган. Аслида эса бу ҳуқуқ олий ўқув юртлари кесимига келганда сунъий тарзда чекланарди, яъни кириш учун танлов масаласи ўртага чиқарди.

Тест синовлари — адолат мезони. Аммо олийгоҳда узоқ йиллар ишлаб, орттирган тажрибамдан биламанки, ана шу «адолат мезони» омадга ҳам боғлиқ бўлиб қоларди. Ҳатто ўн йиллаб тест синовларида бахти чопмаган, аммо ўқиш иштиёқи зўр ёшларни биламан. Улар билан суҳбатлашсангиз, қизиққан фани бўйича мулоҳазаси кенг, кўплаб саволга жавоб беришади. Лекин уч соат давом этадиган тест синовларида чалкаш саволларга дуч келишган. «Барибир талаба бўламан, кейин илм билан шуғулланаман», деб куйинади бундай ёшлар.

Президентимиз Олий Мажлисга Мурожаатномасида айнан шу оғриқли масалага кенг тўхталиб, бу борада жаҳоннинг ривожланган давлатларини мисол тариқасида келтирди. Ўша давлатларда ёшларни олийгоҳларга қамраб олиш 60-70 фоизни ташкил этади. Бизда эса бу кўрсаткич ўтган даврда ҳатто ўн фоизга ҳам етмаган. Айнан шу чеклов олийгоҳларга киришда коррупция ҳолатлари ва бошқа муаммоларнинг бош сабаби, дейиш мумкин.

«...2019 йилда мамлакатимизда битирувчиларни олий таълим билан қамраб олиш даражасини 20 фоизга етказиш ва келгуси йилларда ошириб бориш — муҳим вазифамиздир», деб таъкидланди Мурожаатномада. Шу билан бирга, олий ўқув юртларининг нуфузини ошириш, нодавлат таълим масканлари сонини кўпайтириш, соҳага юқори малакали кадрларни жалб қилиб, рақобатни кучайтириш заруратига эътибор қаратилди. Олий маълумотли киши билан ўрта маълумотли киши дунёқараши орасида фарқ катта. Бу — ҳаёт ҳақиқати. Қанча кўп ёшларимиз олийгоҳларда таҳсил олса, улар орасидан шунча кўп етук олимлар етишиб чиқиши ҳеч шубҳасиздир.

Шу маънода Президентимиз Мурожаатномасида белгиланган вазифалар талабалик бахти учун умид боғлаган ёшларимиз ва олийгоҳ муаллимлари кўнглидаги орзулар ушалишига ишончни оширмоқда.

 

Абдулла ЎРОЗОВ,

 Хоразм Маъмун академияси ходими, докторант.



DB query error.
Please try later.