15.01.2019

КИТОБХОНЛИК ҲАҚИДА ҚАЙҒУРИШ МАЪНАВИЯТНИ ЮКСАЛТИРИШГА ХИЗМАТ ҚИЛАДИ

Президентимизнинг китоб мутолааси борасидаги тарихий фармойишидан сўнг аввало оилада ва ўқув даргоҳларида ёшларимизнинг китобга бўлган қизиқишларини янада ошириш бўйича қилинган ва қилинаётган эзгу ишларимиз самарасини бугун кўра бошладик. Китоб тарғиботи, хусусан, китобхонлик талаблари жараёнида ёшлар ўртасида китоб ўқиётганлари кўпайиб бораётгани сезилмоқда.

Аммо оилада китобхонлик муҳити яратилса, мактабда бу янада рағбатлантирса нур устига нур бўларди. Ёшларимиз дарсдан бўш вақтларида нима билан машғуллар, улар яна шу «эски хасталик» — интернетга ружу қўйишмаяптими, деган саволлар ҳаммамизни қийнайди.

Президентимизнинг Олий Мажлисга Мурожаатномасидаги «Жумладан, давлат — хусусий шериклик асосида янги маданият ва истироҳат боғларини ташкил этиш, уларни замонавий ёшлар масканларига айлантириш чораларини кўриши, зарур. Ушбу боғлар таркибида биринчи навбатда спорт майдончалари, амфитеатр ва кичик саҳналар, кутубхона, «Китоб кафелари» бўлиши лозим» деган сўзларни ўқиб бизни қийнаётган масала ечими қаердалигини англадим. Тўғриси, шу кунгача маданият ва истироҳат боғларида ёшлар бўш вақтини ўтказишга бир томонлама, тор маънода қаралар эди. Бу масканларда тадбиркорлар эса турли егулик ва ичимликлар билан савдо қилишарди, холос. Президентимиз таклиф қилаётган шундай ёшлар масканларида кутубхона бўлиши лозимлиги вазифа қилиб қўйилмоқда. Ёшлар соя-салқин хиёбонда китоб ўқиб, ўзаро муҳокама қилишса қандай яхши. «Китоб кафелари»да музқаймоқ еб, салқин ичимликлар ичиб, бу ердаги мавжуд китобларни мутолаа қилиш мумкин. Бу оилада ва мактабда шаклланган китобхонлик маданиятининг узвий давоми бўлиб, бу билан биз ёшларимизга катта имконият ва муҳит яратиб берган бўламиз.

 Таклифим шуки, ҳозир мавжуд бўлган маданият ва истироҳат боғларида, айниқса, қишлоқ туманларида кутубхонлар очиш учун ер етарли, тадбиркор ҳам топилади. Энди бу ёғи ҳокимлар бу масала аҳамиятини қанчалик даражада тушунишига боғлиқ. Ер ахтариш масаласи пайсалга солинмаса, тадбиркорлар қўллаб-қувватланса, наврўз байрамигача барча туманларда кутубхона ва «Китоб кафелари»ни ташкил этиш мумкин.

 

Анора МАҲМУДОВА,

 Ўзбекистон Қаҳрамони, Гурлан туманидаги 5-сон умумтаълим мактаби директори.


Фикр ва мулохазалар

Защита от автоматических сообщений

Сўнгги янгиликлар: