Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2019   
Du Se Cho Pa Ju Sha Ya
25 26 27 28 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
29.12.2018

ФАОЛ ИНВЕСТИЦИЯ ИЖТИМОИЙ РИВОЖЛАНИШГА ХИЗМАТ ҚИЛАДИ

Баҳром ОБИДЖОНОВ, Олий Мажлис Қонунчилик палатасидаги Ўзбекистон ХДП фракцияси аъзоси:

— Бу йилги Мурожаатнома ҳам аввалгиси каби олдимизда турган энг муҳим ва устувор вазифаларга урғу берилгани билан ғоят аҳамиятлидир. Мурожаатномани тинглаш жараёнида, унда билдирилган фикрлар, маълумотлар, факт ва рақамлардан тегишли хулоса чиқариб, олдимизга бир қатор асосий йўналиш ва вазифаларни қатъий белгилаб олдик.

«Биз янги йилдан бошлаб сиёсий ҳаётимизда янги бир амалиёт жорий этамиз. Кириб келаётган йилнинг бош ҳужжати бўлган Мурожаатномада баён қилинган ҳар бир устувор йўналиш бўйича амалга оширилган ишлар ҳақида Бош вазир ҳукумат аъзолари билан бирга Сенат ва Қонунчилик палатаси олдида ҳар ойда ҳисобот бериб боради», деди давлатимиз раҳбари.

Ана шу фикрларнинг ўзиёқ мамлакатимиз раҳбарининг Парламентимизга бўлган юксак ишончи ва ҳурматининг ёрқин ифодаси, деб ўйлайман. Мурожаатноманинг энг аҳамиятли томонларидан бир шуки, Парламентнинг муҳим қарорлар қабул қилиш ва қонунлар ижросини назорат этиш фаолиятини жонлантириш лозимлиги қайд этилди.

Аслида ҳам, Конституцияга мувофиқ парламент Бош вазирни тасдиқлайди. Лекин, вазирларни лавозимга қўйишда қатнашмайди. Шунинг учун Ҳукумат аъзолари парламент олдида масъулиятни етарли даражада ҳис этаётгани йўқ. Вазирлар Маҳкамаси аъзоларини тасдиқлаш Олий Мажлиснинг ваколатларини кенгайтириб, нуфузини оширишга хизмат қилади. Натижада халқ олдидаги масъулият ҳам ортади. Ҳар бир партия электорати манфаатларини ишончли ҳимоялаш йўлида чинакам кураш олиб боради. Бу эса бора-бора мамлакатда ҳақиқий демократик муҳитни юзага келтиради.

Мурожаатномада, шунингдек, Парламент назоратининг таъсирчан шаклларидан бири бўлган Давлат бюджетини қабул қилиш ва унинг ижросини кўриб чиқишга алоҳида аҳамият бериш зарурлиги қайд этилди. Бу ишни юқори профессионал даражада йўлга қўйиш учун Олий Мажлис ҳузурида Давлат бюджети бошқармасини ташкил этиш мақсадга мувофиқдир.

Дарҳақиқат, парламент назорати институти депутат ҳамда сенаторларнинг барча соҳа ва тармоқларни чуқур ўрганишлари, учраётган камчиликлар, муаммоларни ҳал этишда етакчи куч бўлишлари зарур.

Мурожаатномада келгуси — 2019 йилни «Фаол инвестициялар ва ижтимоий ривожланиш йили», деб эълон қилиниши энг кутилган ва қувончли янгиликлардан бўлди. Бу, аввало, янги йилда ҳам тадбиркорлик ва ишбилармонлик, инновацион ғоя ва технологиялар қўллаб-қувватланишидан далолат беради. Бундан ташқари, ижтимоий соҳани ривожлантириш, тиббиёт, таълим йўналишлари, аҳолини ижтимоий муҳофаза қилиш масалалари ҳам келгуси йилда янада юқори босқичга кўтарилади.

Президентимиз янги йилга бу тарзда ном берилишини изоҳлар экан, инвестиция мамлакатда ишлаб чиқариш рақобатбардошлилиги, барқарор ривожланишга эришишнинг муҳим шарти ҳисобланишини, сармоя мамлакатда муносиб турмуш шароити, одамларнинг ҳаётдан рози бўлиб яшашларини таъминлашга имкон яратишини айтиб ўтди.

Энди ўйлаб кўрайлик, «фаол инвестиция» ва «ижтимоий ривожланиш» ўзаро боғлиқ, айни пайтда бири бошқасини тақозо қиладиган тушунчалардир. Инвестиция бу — моддий асос, шунингдек, янги ғоя ва лойиҳа, янги иш ўринлари, дегани. Ана шу муҳим нарсалар бор жойда ўз-ўзидан ижтимоий ривожланиш ҳам бўлади.

Жорий йилда бўлгани каби келгусида ҳам аниқланган муаммоларни ҳал этиш, хусусан, 2019 йилда болаларни мактабгача таълим билан қамраб олиш даражасини узлуксиз ошириш орқали бу кўрсаткични 44 фоизга етказиш вазифаси қўйилди. Бу, аввало, замонавий ижтимоий-ҳаммабоп мактабгача таълим муассасаларини ташкил этишни давом эттириш, давлат-хусусий шериклик имкониятларидан кенг фойдаланиш ҳисобига амалга оширилади.

Мурожаатномада билдирилган ҳар бир фикр-мулоҳазани диққат билан тингларканмиз, 2019 йилда ҳам мамлакатимиз ижтимоий-иқтисодий, маданий-маърифий ҳаётида улкан ўзгаришлар бўлишига ишонч ҳосил қилдик. Бу жараёнда эса халқ вакили сифатида иштирок этиш, фаоллик кўрсатиш энг олий мақсадимизга айланди.



DB query error.
Please try later.