Охирги сонда



Кўп ўқилган мақолалар



Долзарб мавзу



Мақолалар архиви

«    Sentabr 2019   
Du Se Cho Pa Ju Sha Ya
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6
18.12.2018

«ВАТАНПАРВАРЛАР БОҒИ» ВА МУЗЕЙИ ҚАРШИ ШАҲРИДА БУНЁД ЭТИЛМОҚДА

Президентимиз Шавкат Мирзиёев Қашқадарё вилоя­тида ижтимоий-иқтисодий ислоҳотларнинг бориши, амалга оширилаётган йирик лойиҳалар билан танишаркан, Қарши шаҳрида бунёд этилаётган «Ватанпарварлар боғи»да ҳам бўлди. 

Жорий йил бошида Президентимиз таклифига биноан Қарши шаҳридаги Болалар боғи «Ватанпарварлар боғи» деб ўзгартирилиб, бу ерда қурилиш-реконструкция ишлари бошлаб юборилган эди. Қарийб 7 гектар ҳудудни эгаллаган «Ватанпарварлар боғи»да 2018-2019 йилларда 29,3 миллиард сўмлик реконструкция ишларини амалга ошириш кўзда тутилган бўлиб, ҳозиргача 15,4 миллиард сўмлик иш бажарилган. 

Боғнинг кириш дарвозаси, сунъий кўл, амфитеатр, ҳарбий ҳандақ, қояга чиқиш, ўқ отиш жойи ва лукодром қурилиши якунланган. Музей қурилиши тугалланиш арафасида, парашютдан сакраш минораси қурилиши, кўкаламзорлаштириш ишлари жадал давом этмоқда. 

Мудофаа вазирлиги томонидан тақдим этилган, турли йилларда хизмат қилган 24 та ҳарбий техника макети боғ ҳудудига ўрнатилган. Махсус тайёрланган ҳарбий ҳандақда Иккинчи жаҳон урушида мардонавор жанг қилган ватандошларимиз ҳақида маълумотлар берилади.

Боғда Ўзбекистон миллий харитаси вилоятлар кесимида макет тарзида жойлаштирилган. Унда ҳар бир вилоятнинг буюк сиймолари, қадимий обидалари, сервиқор тоғлари, ҳудудидан оқиб ўтувчи дарёлари, бепоён кенгликларигача акс эттирилган. Бу ерда ёшларни ҳарбий-ватанпарварлик руҳида тарбиялаш, улар онгига Қуролли Кучларимизнинг қудратини ҳаётий мисоллар ва таъсирчан кўргазмали воситалар орқали сингдириб боришга алоҳида эътибор қаратилган.

«Ватанпарварлар боғи» ёнида 4 та замонавий кўп қаватли турар-жой, халқаро талабларга жавоб берадиган замонавий ёпиқ сузиш ҳавзаси қурилди. 25х11 метрлик тўрт йўлакдан иборат иккита сузиш ҳавзаси бўлган сув спорти маж­муасининг ташқи кўриниши парвоз қилаётган қушни эслатади. Иншоот ҳавзасидаги сув махсус фильтрлар ёрдамида тўлиқ янгилаб турилади. Ювиниш, ов­қатланиш, тиббиёт ва фитнес хоналарида барча қулайликлар яратилган. Бу ердаги замонавий шароитлар ота-оналарнинг, ёшларнинг сув спортига қизиқишини оширади.

Давлатимиз раҳбари «Ватанпарварлар боғи»да жадаллик билан давом этаётган қурилиш-ободонлаштириш ишлари, сув спорти мажмуаси билан танишди, бу ерда шуғулланаётган ёш спортчилар билан мулоқотда бўлди. Президентимиз боғни янада замонавийлаштириш, мавжуд имкониятлардан, инновацион ғоялардан унумли фойдаланиш юзасидан мутасаддиларга топшириқлар берди.

— Бу маскан ёшларимизни ватанпарварлик руҳида тарбиялаш, мактаб ўқувчиларининг ҳарбий касбга бўлган қизиқиши ортишига хизмат қилиши керак, — деб таъкидлади давлатимиз раҳбари.

Президентимиз ҳарбийлаштирилган махсус гуруҳ, умумий ўрта таълим мактаби махсус гуруҳи ва махсус академик лицей ўқувчилари билан мулоқотда бўлди. Қарши шаҳридаги 34-умумтаълим мактаби ўқувчиси Севинч Ҳамроева «Ватанпарварлар боғи»га бағишланган шеърини ўқиб берди. Ўқувчиларга замонавий планшет ва уяли алоқа воситалари совға қилинди.

Боғ ва унинг ҳудудидаги иншоотлар тўлиқ ишга туширилгач, бир кунда 10 минггача, музей эса 2 минг нафаргача аҳолини қабул қилиш имкониятига эга бўлади.

 

Нуруллоҳ ДОСТОН,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: