Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2019   
Du Se Cho Pa Ju Sha Ya
25 26 27 28 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
27.11.2018

МУАММОЛАРГА ТАЪҚИҚЛАР ОРҚАЛИ ЕЧИМ ТОПИБ БЎЛАДИМИ?..

Олий Мажлис Қонунчилик палатасидаги Ўзбекистон ХДП фракциясининг йиғилишида «Ўзбекистон

Республикаси Ер кодексига ўзгартиш киритиш тўғрисида»ги қонун лойиҳаси қизғин муҳокама қилинди.

 

Зулайхо АКРАМОВА, Олий Мажлис Қонунчилик палатасидаги Ўзбекистон ХДП фракцияси аъзоси:

— Бўш турган объектлардан самарали фойдаланиш мақсадида қатор амалий ишлар олиб борилмоқда. Айрим тадбиркорлик субъектлари нотурар объектлар қуриш учун ажратилган ер участкаларидан фойдаланишда лоқайдликка йўл қўймоқда. Уларга нисбатан талабнинг кучайтирилиши мақсадга мувофиқдир. Чунки «ерни олдим, қолгани бир гап бўлар», деган бўлмағур кайфиятда юрган тадбирлар сабаб кўплаб иш ўринлари яратилмасдан қолмоқда. Бу партиямизнинг Сайловолди платформасида белгиланган вазифаларга ҳам зид ҳисобланади.

Қонун лойиҳасининг қабул қилиниши билан нотурар объектлар қуриш учун ажратилган ер участкаларини ўзлаштириш муддати уч йилдан икки йилгача қисқартирилади. Бу тадбиркорлик субъектларининг масъулиятини оширишга туртки беради.

 


Бунёд ЭШОНҚУЛОВ, Олий Мажлис Қонунчилик палатасидаги Ўзбекистон ХДП фракцияси аъзоси:

— Жойларга чиққанимизда мазкур масалада турли саволлар билан мурожаатлар бўлмоқда. Масалан, ўрганишлар олиб борилганда бир неча йил олдин ер сотиб олинганига қарамасдан, ундан самарали фойдаланилмаслик ҳолатлари кузатилди. Иморат кўтариш учун бетон қуйилган, бироқ объектив ва субъектив сабабларга кўра қурилиш ҳали бошланмаган ёки чала қолган. Суриштирилганда маблағ йўқ­лиги ёхуд белгиланган маблағ етиб келмаётгани маълум бўлмоқда. Демак, тадбиркорлик учун ажратилган ер майдони бўш ётибди, одамларга иш ўрни яратилмаяпти, режадаги ишлар ниҳоясига етказилмаган.

Бунда биргина тадбиркорни жавобгар, дейиш нотўғри бўлади. Чунки маҳаллий давлат бошқаруви органлари таркибида ҳам ўз ишига масъ­улиятсизлик билан ­ён­дашадиган, ишни сунъий равишда пайсалга соладиган шахслар йўқ эмас. Натижада тадбиркор ва унга ваъда қилинган ер бир неча кишининг ўртасида сарсон бўлмоқда. Бундан таш­қари, қачонлардир ер сотиб олиб, фундамент кў­тариб қўйганлар ҳам бор. Айримларида маблағ етарли бўлмаса, ер­ни пуллаш илинжида ишни чўзаётганлар ҳам йўқ эмас. Бундай ҳолатларни ҳам ҳисобга олиш керак.

Қонун лойиҳасидаги меъёрлар ҳар томонлама пухта ўйланган бўл­моғи лозим, деб ҳисоблайман. Қад ростлаётган объектнинг катта-кичиклиги, бино қу­риш талабларидан келиб чиқиб, муддат белгиланса, мақсадга мувофиқ бўлади. Акс ҳолда, аҳолига қулайлик яратиш ўрнига, ўз ишини бошламоқчи бўлганлар олдига тўсиқ қўйилиши мумкин. Айтайлик, 9 қаватли бино қураётган тадбиркор икки йилда ишини якунламаса, ер қайтариб олинади. Иш­ни тезроқ тугатиш эса лойиҳа сифатига таъсир қилиши турган гап. Бундай ҳолатда иморатни бузишга тўғри келадими? Фикримча, ҳар бир жиҳат инобатга олиниб, лойиҳа такомиллаштирилиши, баъзи масалаларга ойдинлик киритилиши керак.

Муҳокамалардан сўнг битта қарши овоз билан қонун лойиҳаси концептуал жиҳатдан қўллаб-қувватланди.

«Ўзбекистон Республикаси Жиноят кодексининг 177-моддаси ва Ўзбекистон Республикаси Маъмурий жавобгарлик тўғрисидаги кодексининг 170-моддасига ўзгартишлар киритиш тўғрисида»ги қонуни лойиҳаси ҳам қизғин баҳс-мунозараларга сабаб бўлди.

 

Шуҳрат МАМАЖОНОВ, Олий Мажлис Қонунчилик палатасидаги Ўзбекистон ХДП фракцияси аъзоси:

— Прокуратура органлари томонидан валюта қимматликларини қонунга хилоф равишда олиш ёки ўтказиш билан боғлиқ ҳуқуқбузарликларни аниқлаш ва профилактикаси борасида муайян ишлар амалга оширилмоқда. Соҳада қонунни қўллаш амалиёти тизимли равишда таҳлил қилинмоқда. Шунга қарамасдан фуқаролар томонидан валюта қимматликларини қонунга хилоф равишда олиш ёки ўтказиш билан боғлиқ ҳолатлар кузатилмоқда. Бу эса жавобгарликни кучайтиришни тақазо этмоқда.

Лойиҳада қонун талабларини бузган ҳар икки томон, яъни сотувчи ҳам, олувчи ҳам жавобгарликка тортилиши назарда тутиляпти. Бу — яхши. Лекин аҳоли эҳтиёжларини таъминлаш учун шароитлар етарлими? Биз аввал шу саволга жавоб топишимиз керак эмасми? Кимдир яқинини зудлик билан даволаш ёки операция қилиш учун чет элга кетиши керак бўлиб қолди, дейлик. Банкдан карточка очдириб, унга валюта тушишини кутиб туришга ўша инсонда вақт етарли бўлмаса нима бўлади? Бундай ҳолда, муҳтож инсон қонунни бузаётгани, жавобгарликка тортилишини билса ҳам қора бозордан фойдаланишга мажбур бўлиб қолмайдими?.. Бу каби ҳолатларга йўл қўймаслик учун мавжуд талабга яраша шароит ва имконият яратиш зарур.

Йиғилишда, шунингдек, «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳаси ҳам атрофлича муҳокама қилинди.

Унга кўра Давлат бюджетининг ижро этилиши билан боғлиқ маълумотлар, бюджет харажатларини режалаштириш, шакл­лантириш ҳамда ижро этишга оид маълумотлар давлат ҳокимияти ва бош­қаруви органлари расмий веб-сайтларида жойлаштириши мажбурийлиги белгиланмоқда. Бу борада хориж тажрибасидан ўрнак олиш кераклиги таъкидланди.

Қонун лойиҳалари концептуал жиҳатдан маъқулланди.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.