Охирги сонда



Кўп ўқилган мақолалар



Долзарб мавзу



Мақолалар архиви

«    Sentabr 2019   
Du Se Cho Pa Ju Sha Ya
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6
13.11.2018

САВОБ ИШЛАР УМРНИ УЗАЙТИРАДИ

дейди ўз жамғармасидан маҳаллада болалар футбол майдончаси қурган 90 ёшли Жаҳонгир ҳожи ота Усмонов

Пойтахтимизнинг Шайхонтоҳур туманига қарашли Камолон дарвоза маҳалласи шундоққина Олий Мажлис биносининг рўпарасидаги тўққиз қаватли уйларнинг ортида. Маҳаллага кираверишда ўнг қўлда болалар боғчаси, чап томонда турли қурилмалар ўрнатилган болалар ўйин майдончаси. Давомида атрофи симтўр билан ўралган, сунъий қопламали ям-яшил футбол майдони. Ҳамроҳим — ЎзХДП фаоли, меҳнат фахрийси Носир ­Тоиров билан отахонни йўқлаб бордик. У футбол майдончасида бизни кутиб турган экан.

— Илгари бу жойлар Янги­обод маҳалласи ҳудудига қарашли эди, — деди Жаҳонгир ота. — Кейинчалик аҳоли сони ўсиши билан «Камолон дарвоза» маҳалла фуқаролар йиғини алоҳида ажралиб чиқди. Бу футбол майдончаси ўрнида жуда катта чиқиндихона бўларди, қарасангиз, кўнгилни хира қиларди, баъзан тутаб ётарди. Бир томонида тўққиз қаватли уйларда яшаётган фуқароларнинг 70 дан ошиқ гаражлари жойлашган эди. Шу ердан ўтаётганимда «Маҳалла аҳли бирлашиб, шу жойни обод қилса бўладику», деб ўйлардим. Охири шу ерда футбол майдончаси қуришни ният қилдим. Чунки маҳаллада болалар учун спорт майдончалари йўқ эди.

Жаҳонгир ота пенсияга чиққанидан кейин ҳам 15 йил мобайнида маҳалла фуқаролар йиғинида маслаҳатчи сифатида ишлади. 2003 йилда ҳамманинг жонига теккан чиқиндихонани йўқотиб, ўрнида маҳалла болалари спорт билан шуғулланиши учун майдонча қуришга киришди. Бунда Тошкент шаҳар ободонлаштириш бош­қармаси уни қўллаб-қувватлади. Тегишли ташкилотлар кўмаги билан гаражлар олдирилди. Бу ердан 35 машина ахлат олиб чиқиб кетилди. Жаҳонгир ота Ҳаж сафарига, деб ният қилиб йиғиб қўйган маблағини спорт майдончаси қурилишига сарфлади. Узунлиги 55 метр, эни 20 метрлик спорт майдончаси, унинг ёнида болалар ўйин майдончаси қурилиб, керакли ускуналар ўрнатилди.

— Маҳалламизда 4 мингга яқин аҳоли яшайди, ярмидан кўпини ёшлар ташкил этади, — дейди отахон. — Улар дарсдан кейин кўча-кўйда бекор юрмасдан, шу ерга келишади. Футбол билан шуғулланаётган болалар 4 гуруҳга бўлинган, ҳар бирида 20-25 нафар бола бор. Улар мурабби­йимиз Ҳасан Тошпўлатов томонидан тузилган жадвал бўйича ҳар куни эрталаб ва кечки пайт машғулотлар ўтказишади. Биргина бизнинг маҳалламиздан эмас, қўшни маҳалладаги болалар ҳам шу ерда спорт билан шуғулланишади. Ҳаммага эшигимиз очиқ, машғулотлар бепул.

— Ўн икки-ўн тўрт ёшли болалардан иборат «Камолон» ўсмирлар футбол жамоамиз бор, — дейди мураббий Ҳасан Тошпўлатов. — Болаларимиз жуда тириш­қоқ, соатлаб машғулот ўтказамиз. 2017 йилда Фар­ғона вилоятининг Бешариқ туманида ўтказилган «Пахтакор — 79» Хотира турнирида фахрли 2-ўринни эгалладик. Яқинда Чирчиқ шаҳрида ўтказилган мусобақада ғолиб бўлдик. Ютуқларимиз кўп. Шу ерда футбол билан шуғулланишни бошлаган Забиҳилло Ўринов Ўзбекистон терма жамоаси таркибида ўйнамоқда. Биз бундан фахрланамиз албатта.

— Яхшиликнинг, савоб ишнинг умри узун бўлади, дейишади, бу ҳақ гап, — дейди Жаҳонгир ота. — Маҳаллада қурилган спорт майдончамиз республикага ўрнак қилиб кўрсатилди, қарангки, шу туфайли кутилмаганда 2005 йилда давлат томонидан сафар харажатлари қопланган 25 нафар фуқаролар сафида ҳаж зиёратини адо этиш менга ҳам насиб этди. 2015 йилда спорт майдончамиз ташкил этилганининг 15 йиллигини тантанали байрам қилдик. Президентимиз Шавкат ­Мирзиёев маҳалламизга келганида футбол майдончасини кўрди, болалар ва ўсмирлар қизиқадиган спорт турларини кўпайтириш бўйича қимматли маслаҳатлар берди.

Яқинда шахмат клубини ташкил этдик. Ҳар куни тонг саҳарлаб спорт майдончасини айланиб чиқаман, жадвал бўйича машғулотларга келаётган болаларни кузатаман. Уларнинг сафи кенга­йиб бораётганидан қувонаман.

— Жаҳонгир ота болажонларимизнинг севимли бобожони, — дейди 491-мактабгача таълим муассасаси мудири Саодат Убайдуллаева. — 45 нафар тарбияланувчимиз спорт майдончасида кичик гуруҳ таркибида маш­ғулотларга қатнашади. Болаларни ҳар куни бу ерга олиб чиқамиз.

— Маҳалламиз ҳудудидаги кўп қаватли уйларда 630 хонадон бор, 319 оила ҳовлиларда истиқомат қилади, — дейди «Камолон дарвоза» маҳалла фуқаролар йиғини оқсоқоли Омонжон Тоҳиров. — Аҳолининг 25-30 ­фоизга яқинини болалар ва ўсмирлар ташкил этади. Уларнинг аксарияти шу ерга келиб, спорт билан шуғулланади. Сиз эрталаб ёки кечки пайт келиб кўринг, спорт майдончаси ёшларга тўлиб кетади. Бу ерга қўшни Камолон, Янгиобод маҳалласидан ҳам ёшлар келишади.

— Спорт билан шуғулланган бола қинғир ишларга қўл урмайди, вақти ҳам бўлмайди, — деди Шайхонтоҳур туманига қа­рашли 2-ИИБ бошлиғи ўринбосари, подполковник Шокир Жумаев. — Туманимиздаги ­«Камолон дарвоза» ҳамда Каттабоғ маҳалла фуқаролар йиғинида спорт майдончалари бор. ­Бошқа маҳаллалар билан таққослаганда, ана шу маҳаллаларда жиноятчилик, майда безорилик кўринишлари 40-50 фоиз камайган. Ҳар бир маҳаллада спорт майдончалари, тренажёр заллари бўлса, болалар жон-жон деб спорт билан шуғулланарди. Фақат маҳаллий ҳокимият томонидан жой ажратилса бўлди, ҳар бир маҳалладан тадбиркор топилади...

Дарҳақиқат, Жаҳонгир ота ­Усмоновнинг ибратли ишлари ўрнак олишса муносиб, деб ўйлаймиз.

 

Нуруллоҳ ДОСТОН,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: