20.09.2018

БОШЛАНҒИЧ ПАРТИЯ ТАШКИЛОТЛАРИГА АМАЛИЙ ЁРДАМ КЎРСАТИЛМОҚДА

Партияни ҳаракатга келтирувчи куч, унинг асосий пойдевори, шубҳасиз бошланғич партия ташкилотидир. Шу боис БПТларни керакли адабиётлар билан бойитиб бориш, етакчиларнинг сиёсий билимини ошириш партия дастури ва мақсадига хайрихоҳлар сони ортиши ҳамда унинг жамиятдаги нуфузи мустаҳкамланишига хизмат қилади.

Жорий йилнинг июль ойида ЎзХДП Марказий Кенгаши масъул ходими Акмал Турсунбоев Навоий вилоятида хизмат сафарида бўлиб, бошланғич партия ташкилотлари фаолиятини танқидий-таҳлилий ўрганган эди.

Фаолиятини қониқарсиз ташкил этган айрим туман(шаҳар) партия ташкилотлари етакчилари огоҳлантирилиб, уларга амалий тавсиялар ҳам берилди.

Орадан икки ой вақт ўтди. Хўш, бошланғич партия ташкилотларида ўзгариш бўлдими?

Мазкур саволга жавоб олиш мақсадида ЎзХДП Навоий вилояти кенгаши Бошланғич партия ташкилотлари билан ишлаш сектори мудири Муборак Маҳмудовага мурожаат қилдик.

— Бугунги кунда Навоий вилоят партия кенгаши тасарруфида 22108 нафар аъзони бирлаштирган 457 бошланғич ташкилот фаолият олиб бормоқда, — деди у. — Биз партия Марказий Кенгаши томонидан берилган тавсия асосида мазкур БПТлар фаолиятини тубдан такомиллаштириш бўйича чора-тадбирларни амалга оширдик. Дастлаб, ҳаракатларни етакчилар билан партия ташкилотлари ўртасидаги ҳамкорликни мустаҳкамлашдан бошладик. Уларнинг сиёсий саводхонлигини ошириш мақсадида «Партия ходимларида лидерлик хислатларини ривожлантириш технологиялари», «Нотиқликнинг психологик асослари» мавзусида олимлар ва сиёсатчиларни жалб этган ҳолда сиёсий ўқув машғулотлари ўтказилди.

Шу вақтга қадар айрим қуйи бўғинларда иш ўз ҳолига ташлаб қўйилгани рост. Масалан, Конимех тумани «Шўртепа» МФЙдаги қониқарсиз фаолият юритаётган БПТ фаолияти қайта кўриб чиқилди ва тарғибот воситалари билан таъминланди. Конимех туман тиббиёт бирлашмасига қарашли бўлимда янги бошланғич ташкилот ташкил қилинди.

Хатирчи туманидаги айрим таянч ташкилотлар фаолияти бугунги кун талабига мос эмаслиги танқидий муҳокама қилиниб, ижрочи котиб вазифасидан озод этилган эди. Шундан сўнг вазиятни ўнглаш мақсадида вилоятда ишчи гуруҳ ташкил этилиб, қуйи бўғинларга амалий ёрдам кўрсатилди. 10 дан ортиқ корхонада янги бошланғич ташкилотлар очилди.

Бундан ташқари, вилоят кенгаши тавсияси билан туман(шаҳар) кенгашларида ҳар ойда фаолияти қониқарсиз бўлган бошланғич ташкилотлардан камида иккитасининг фаолиятини тўлиқ йўлга қўйиш ҳамда ҳар чоракда камида битта бошланғич ташкилот ташкил этиш чоралари белгилаб олинди.

 

«Ўзбекистон овози» мухбири

Илҳом САТТОРОВ ёзиб олди.



DB query error.
Please try later.