11.09.2018

ХУСУСИЙ АГЕНТЛИКЛАР БАНДЛИК МАСАЛАСИДА ФУҚАРОЛАРГА ЯҚИНДАН ЁРДАМ БЕРАДИ

Олий Мажлис Қонунчилик палатасидаги Ўзбекистон ХДП фракциясининг навбатдаги йиғилишида «Хусусий бандлик агентликлари тўғрисидаги» қонун лойиҳаси муҳокама қилинди.

Ушбу лойиҳа биринчи ўқишда «Рекрутинг фаолияти тўғрисида»ги қонун сифатида киритилган эди. Қизғин муҳокамалар ва халқаро тажрибани ўрганишлар натижасида унинг номи ўзгартирилди. Чунки рекрутинг чекланган турдаги фаолият бўлиб, иш билан таъминлаш соҳасидаги барча хизматлар кўламини қамраб олмаган.

 

Бунёд ЭШОНҚУЛОВ, Олий Мажлис Қонунчилик палатасидаги Ўзбекистон ХДП фракцияси аъзоси:

— Мазкур лойиҳада аҳолини иш билан таъминлашнинг кўламини ҳамда тадбиркорлик фаолиятини кенгайтириш назарда тутилган. Халқаро меҳнат ташкилотининг «Хусусий бандлик агентликлари тўғрисида»ги Конвенцияси номига мувофиқ равишда ўзгартирилмоқда. Шундан келиб чиқиб, лойиҳага айрим ўзгартиришлар киритилган. Хусусий бандлик агентликлари юридик ва жисмоний шахслар томонидан ҳар қандай ташкилий-ҳуқуқий шаклда тузилиши мумкин. Агентлик давлат органлари, сиёсий партиялар, касаба уюшмалари ва диний ташкилотлар томонидан тузилиши мумкин эмас.

Лойиҳани ўрганиш жараёнида айрим бир-бирини инкор этувчи моддаларни учратдим. Масалан, 9-моддада келтирилган меъёр ўз-ўзидан 4-моддага зид равишда тузилган. Балким рус тилидан таржима қилишда хатоликка йўл қўйилган бўлиши мумкин. Муҳими, лойиҳада фуқароларнинг хавфсизлик масаласига кенгроқ жой берилиши керак, деб ўйлайман. Яъни ҳамюртларимизни хорижда иш билан таъминлашда уларнинг хавфсизлиги, соғлиғи ва ҳуқуқлари қонуний ҳимояланган бўлиши лозим. Хусусий бандлик агентликлари фаолиятининг асосий принциплари қонунийлик, очиқлик ва шаффофлик, камситишга йўл қўймаслик асосий тамойил бўлиши зарур. Агентликларнинг ташкил этилишининг ўзиёқ қўшимча иш ўринларини яратиши, таклиф этилаётган вариантнинг мазмунан бойитилгани учун фракциямиз аъзолари уни қўллаб-қувватлайди.

Фракция аъзолари «Ўзбекистон Республикасининг айрим қонун ҳужжатларига қўшимчалар киритиш тўғрисида»ги қонуни лойиҳаси бўйича ҳам ўз фикр-мулоҳазаларини билдиришди. Унга кўра, телекоммуникация тармоғига ундан фойдаланиш ва халқаро трафикни ўрнатилган ҳимоя тизимларини айланиб ўтган ҳолда ўтказиш мақсадида қонунга хилоф равишда, рухсатсиз уланиши қонунан тақиқланмоқда ва жавобгарлик белгиланган.

 

Саттор РАҲМАТОВ, Олий Мажлис Қонунчилик палатасидаги Ўзбекистон ХДП фракцияси аъзоси:

— Айтиш керакки, замонавий телекоммуникация технологиялари ривожланиши, уларнинг қурилмалари ва хизматлари нархларининг пасайиши натижасида халқаро алоқани ташкил этишнинг услублари ўзгарди. Маълумотлар узатиш ва мобиль алоқа тармоқлари жадал ривожланди. Бу эса халқаро товушли трафикни қонунга хилоф равишда, «Ўзбектелеком» АК халқаро коммутация марказларини четлаб ўтказиш учун телекоммуникация тармоқларидан фойдаланишнинг услубларини юзага келтирди. Демак, фаолиятнинг бу каби қонунга зид равишда йўлга қўйилишини тақиқлаш эҳтиёжи пайдо бўлди. Шу жиҳатдан олиб қаралганда таклиф этилаётган қонун лойиҳаси бугунги кун учун керак. Аммо унга киритилаётган меъёрларни пухта ва ўзимизга мос равишда ишлаб чиқиш зарур.

Масалан, халқаро трафикни ўрнатилган ҳимоя тизимларини айланиб ўтган ҳолда махсус дастурий ёки аппарат воситаларини сақлаш, фаолият кўрсатишга шароитлар яратиб бериш учун жавобгарлик белгиланмоқда. Ёки телекоммуникация тармоғига қонунга хилоф равишда, рухсатсиз уланишда жиноят аломатлари бўлмаган тақдирда маъмурий жавобгарликни белгилаш назарда тутилмоқда. Бу жойда ҳам ваколатли органларнинг номлари келтирилиши лозим, назаримда.

Ахборот хавфсизлигини таъминлаш мақсадида назорат ўрнатиш ва жавобгарликни белгилаш масалаларига янада ойдинлик киритилиши керак. Қонун кучга киргач, тўғридан-тўғри ишлаши, коррупциянинг олдини олиш, жазо турини тўғри белгилаш ва бошқа қатор масалаларга ойдинлик киритиш учун лойиҳани янада такомиллаштириш зарур, деб ўйлайман.

Фракция йиғилишида яна бошқа қонун лойиҳалари ҳам кўриб чиқилди. Лойиҳаларда ҳаволаки меъёрлардан қочиш, «Норма ижодкорлиги тўғрисида»ги Президент фармонига кўра, «ақлли тартибга солиш» модели элементларини қўллаш масалаларига эътибор қаратилди.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.