02.08.2018

ПАРТИЯМИЗ ТАЯНЧИ

Мамлакатимиз аҳолисининг 64 фоизини ёшлар ташкил этишини ҳисобга олсак, юрт тараққиёти кўп жиҳатдан нав­қирон йигит-қизларга боғлиқ эканини янада теранроқ англаймиз. Дарҳақиқат, бугун ёшлар мамлакатимизни демократлаштириш ва фуқаролик жамиятини ривожлантириш жараёнларининг фаол иштирокчисига айланмоқда. Уларнинг сиёсий-ҳуқуқий, ижтимоий-иқтисодий билимини ошириш, ислоҳотларга дахлдорлик ҳиссини кучайтириш — долзарб вазифа. Бу давлат ва жамоат ташкилотлари, жумладан, сиёсий партиялар зиммасига ҳам катта масъулият юклайди.

Ўзбекистон ХДП Дастурий ғоя ва мақсадларида ҳам ёшларнинг сиёсий-ҳуқуқий, ижтимоий-иқтисодий билимларини янада ошириш, дахлдорлик ҳиссини кучайтириш, кам таъминланган оилаларнинг иқтидорли фарзандларини ижтимоий қўллаб-қувватлаш каби вазифалар белгилаб қўйилган. Шундан келиб чиқиб, Ўзбекистон Халқ демократик партияси мазкур жараёнда фаол иштирок этишга алоҳида эътибор қаратиб, «Истиқбол» ёшлар қаноти орқали ёшлар ташаббусларини амалга оширишга кўмаклашмоқда.

Хусусан, «Ёш сиёсатчи» кўрик-танлови, «Ҳаёт гўзал, яшаш — бахт», «Жаҳолатга қарши маърифат», «Жиноятсиз келажак сари», «Ёшлар — келажак таянчи», «Ёшларни ёт ғоялар ва турли қарашлар таъсиридан асраш мақсадимиз» каби лойиҳалар орқали йигит-қизлар билан мулоқотга киришиб, уларнинг муаммолари ўрганиляпти. Биргина, жорий йилда «Ёш сиёсатчи» танловининг шаҳар ва туман босқичларида минглаб тенгдошларимиз иштирок этиш истагини билдирган. Улар орасидан энг билимли, зукко, интеллектуал салоҳияти юксак бўлган 200 нафари саралаб олинди.

«Истиқбол» ёшлар қаноти томонидан ўтказиб келинаётган мазкур танлов келгусида сиёсатчи бўламан, деган йигит-қизларга яратиб берилган катта имкониятдир.

Юртимизда мустақил фикрлайдиган, замонавий технология­ларни ўзлаштиришга қодир, миллий ва умуминсоний қадриятлар руҳида ёшларни тарбиялашнинг мукаммал тизими яратилмоқда. Бу партиямиз томонидан ўтказилаётган учрашувларда, семинар тренинг, давра суҳбатларида ҳам намоён бўлмоқда. Аммо орамизда жиноят оламига кириб қолаётган, онгини ёт ғоялар эгаллаб олганлар ҳам йўқ эмас. Йигит-қизларни қизиқтираётган, уларнинг саволларига жавоб топишга ҳисса қўшувчи мавзуларни ўйлашимиз, ана шу асосда тадбирлар режасини ишлаб чиқишимиз зарур. Ҳар ойда ўтказилаётган давра суҳбатлари, учрашувларда зерикарли усуллардан анча чекиндик. Тенгдошларимиз билан эркин мулоқот жараёнида жи­но­я­т­нинг келиб чиқиш сабаблари ҳамда унинг олдини олиш борасидаги таклифлар муҳокама қи­линмоқда. Келгусида бу йўналишдаги ишларимизни янги бос­қичга, замонавий кўринишга олиб чиқишимиз лозим.

«Оммавий маданият», «Глобаллашув жараёнлари» ва шунга ўхшаш тушунчалар моҳиятини, аниқ мазмунини англаб етиш учун албатта инсонда ғоявий, мафкуравий тафаккур шаклланган бўлиши даркор. Шу маънода жойларда, айниқса, энг олис ҳудудларда ҳам тизимли учрашувлар, давра суҳбатлари ўтказиляпти. Тарғибот таъсирчанлигини ошириш мақсадида мутахассислар томонидан интерактив машғулотлар, видеофильмлар ёрдамида мавзуларни кенгроқ очиб беришга ҳаракат қилиняпти. Ёшлар ўз фикр ва таклифлари билан фаол иштирок этаётгани қувонарли ҳолдир.

Мухтасар қилиб айтганда, Ўзбекистон ХДП ўз электорати, хусусан, ёшлар вакиллари билан ишлашнинг самарали ва таъсирчан механизмларидан фойдаланмоқда.

 

Ойдинисо ҲАЙИТОВА,

ЎзХДП Марказий Кенгаши ахборот хизмати бош мутахассиси.



DB query error.
Please try later.