26.07.2018

КАМЧИЛИКЛАРГА ЕЧИМ ТОПИЛЯПТИМИ?

Бошланғич партия ташкилотларининг пойдевори мустаҳкам бўлса, таклиф ва ташаббуслар кўпаяди. Электоратимиз вакилларининг партияга ишончи ортади. Сафларимизга шижоатли ўғил-қизлар қўшилади.

Жорий йилнинг 18-23 май кунлари Ўзбекистон ХДП Марказий Кенгаши Бошланғич партия ташкилотлари билан ишлаш сектори томонидан Сурхондарё вилоятидаги қуйи бўғин фаолияти атрофлича ўрганилган эди. Хўш, шундан кейин жойлардаги аҳвол ўзгардими? Камчиликлар ечим топдими? Шу каби саволларга жавоб топиш мақсадида Ўзбекистон ХДП Термиз шаҳар кенгашида бўлдик.

 

 — Танқидий-таҳлилий ўрганишлардан кейин депутатлар ва фаоллар иштирокида йиғилиш ўтказдик, — дейди Ўзбекистон ХДП Термиз шаҳар кенгаши раиси, халқ депутатлари Термиз шаҳар Кенгашидаги партия гуруҳи аъзоси ­Фаррух Абжалов. — «Йўл харитаси» тузилиб, 68 та бошланғич партия ташкилоти фаолияти яна бир бор танқидий-таҳлилий кўриб чиқилди. «Термиз Нефть база» унитар корхонаси, «Қишлоқ қурилиш банк» вилоят бошқармасида фаолият кўрсатаётган қуйи бўғинларнинг кенгашлар билан алоқани узгани ёки фаолияти бугунги кун талабига жавоб бермаслиги аниқланди. Айрим бошланғич ташкилотларда эса ҳужжат юритиш ишларида нуқсонлар кўзга ташланди.

Қисқа даврда 2 минг 300 га яқин аъзо қайта рўйхатдан ўтказилиб, йигирмага яқин муассасада давра суҳбати ташкил қилдик. Вилоят сил касалликлари шифохонаси, 5-сонли оилавий поликлиникада бошланғич партия ташкилоти тузилди. Мазкур жамоаларда меҳнат қилаётган 65 нафар кишининг сафларимизга қўшилганидан хурсандмиз. Йил охиригача яна ўнга яқин ташкилот шакллантириб, 120 нафар йигит-қизни аъзоликка қабул қилиш кўзда тутилган. Шунда аъзоларимиз сони 2 минг 400 нафардан ошади...

— Тўғрисини айтганда, сиёсий партиялар фаолиятида камчиликлар бор, — дейди Термиз шаҳридаги 5-сонли оилавий поликлиника бош шифокори, бошланғич партия ташкилот етакчиси Зилола Эшонқулова. — Шифо масканимиз 2014 йилдан буён фаолият кўрсатиб келаяпти. Жамоамизда 68 нафар саломатлик посбонлари меҳнат қилади. «Аму соҳили», «Паттакесар», «Мажнунтол», «Жўйжангал» маҳаллаларининг 21 минг 100 нафардан ортиқ аҳолисига тиббий хизмат кўрсатамиз. Ўтган даврда бирор-бир партия мутасаддиси ёки фаоли биз билан учрашгани йўқ. Давра суҳбати ёки партиявий йўналишда тарғибот-ташвиқот ишлари ҳам олиб борилмаган. Ўзбекистон ХДП Термиз шаҳар кенгаши мутасаддиларидан, тўғриси, хурсанд бўлдик. Самимий ва ошкора руҳда кечган мулоқотда муаммоларни бартараф қилиш чора-тадбирлари белгиланди. Ўн беш нафар саломатлик посбони Ўзбекистон ХДП аъзолигига қабул қилинди. Келажакда уларнинг сони янада кўпайишига ишонаман...

— Мамлакатимизда олиб борилаётган кенг кўламли ислоҳотларнинг фаол иштирокчиси бўлишимиз керак, — дейди халқ депутатлари Термиз шаҳар Кенгашидаги Ўзбекистон ХДП гуруҳи аъзоси Ҳикмат Файзуллаев. — Аммо бу борада кўзланган мақсадга эришилгани йўқ. Бунинг асосий сабабларидан бири аксарият бошлан­ғич партия ташкилотлари ­фаолиятининг тўғри йўлга қўйилмаганида, деб ўйлайман. Айрим масъулларда лоқайд ва бепарволик кузатилса, ишни ўз ҳолига ташлаб қўйган етакчилар борлигидан ҳам кўз юмиб бўлмайди.

Таянч ва суянчимиз бўлган бўғин фаолиятини янада яхшилаш учун аввало унинг моддий-техник базасини мустаҳкамлаш керак, деб ҳисоблайман. Иккинчидан, БПТларни турли адабиёт ва ўқув қўлланмалари билан таъминлаш ҳам кечиктириб бўлмас вазифалардан биридир. Шу билан бир қаторда, намунали бошланғич партия ташкилотларини моддий қўллаб-қувватлаш ва рағбатлантиришни йўлга қўйишни таклиф қилган бўлардим. Ана шунда қуйи бўғин кучаяди, тўпланиб қолган долзарб масалаларга ижобий ечим топилади.

 

Абдумалик ҲАЙДАРОВ,

«Ўзбекистон овози» мухбири.



DB query error.
Please try later.