Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
24.07.2018

РЕКТОРЛАР МУРОЖААТИ: АБИТУРИЕНТЛАР, ЎЗ БИЛИМИНГИЗГА ИШОНИНГ!

Халқаро пресс-клубнинг навбатдаги сессияси «Қабул – 2018: шаффофлик, ҳалоллик, адолат мезонлари ва инновацион ёндашув» мавзусида ўтказилди. Видеоселектор тарзида ўтган сессияда олий ўқув юртларига қабул жараёни ва тест имтиҳонларига тайёргарлик ишлари таҳлил қилинди.

Тадбирда Олий ва ўрта махсус таълим вазирлиги, Давлат тест маркази, Таълим сифатини назорат қилиш давлат инс­пекцияси раҳбарияти, олий таълим муассасалари ректорлари ҳамда оммавий ахборот воситалари ходимлари қатнашди. Қорақалпоғистон Республикаси ҳамда вилоятлардаги олий таълим муассасалари ректорлари ва масъул ходимлари жойлардаги студиялар орқали боғланишди.

2018/2019 ўқув йилида бакалаврлар учун умумий квота 69 минг 200 тани ташкил этади. Шундан давлат грантлари учун — 17 минг 654, тўлов-контрактга эса — 51 546 та жой ажратилди. Магистратура бос­қичида 5 минг 903 нафар, давлат грантига 1 минг 552 нафар ва тўлов-контракт асосида 4 минг 351 нафар талаба қабул қилинади.

ОТМларнинг сиртқи ва кечки таълим бўлимларида ўқитиш қиймати тегишли бакалавриат таълим йўналиши бўйича кундузги ўқитиш шакли қийматидан кам бўлмаган миқдорида белгиланади. Республика бўйича жами 60 та олий таълим муассасаси ва уларнинг 19 та филиалига 675 минг 49 нафар абитуриент ҳужжат топширди.

Олий ва ўрта махсус таълим вазирлиги абитуриентлардан ҳужжатларни қабул қилиш ва касбий (ижодий) имтиҳон жараёнларини юқори савияда, абитуриентлар ва уларнинг ота-оналарига қулайлик яратган ҳолда адолатли ва шаффоф ташкил этиш мақсадида қатор ишларни амалга оширди. Жумладан, бакалавриатга тест синовларисиз касбий (ижодий) имтиҳонлар орқали ўқишга қабул қилиш бўйича тасдиқланган таълим йўналишлари учун кириш имтиҳонлари жорий йилнинг 25 июлидан 10 августигача бўлган даврда олий таълим муассасаларида ўтказилиши белгиланди.

Иқтидор талаб этиладиган таълим йўналишлари бўйича касбий (ижодий) имтиҳонлар адолатли ва шаффоф ўтказилишини таъминлаш мақсадида жорий йилда илк маротаба олий таълим муассасаларида келишув асосида маҳаллий ҳокимликлар кенгашларига сайланган депутатлар ҳамда абитуриентларнинг ота-оналари иштирокида жамоатчилик назорати ўрнатилади.

Шунингдек, сессияда Ўзбекистон олий таълим даргоҳлари тарихида биринчи марта Ректорларнинг Мурожаати ҳавола этилди ва қабул қилинди.

Матнда абитуриентларнинг ўз билимигагина ишониши лозимлиги қайд этилган: «Кўряпсизки, ёшларнинг илм-фан ва касб-ҳунар сирларини эгаллашлари учун юртимизда барча шарт-шароитлар муҳайё қилиб берилмоқда. Бугун ўзингиз учун касб танлаб, ўқишга киришга аҳд қилдингизми, ўз билимингизга, ақл-заковатингизга ва сизларга шу шароитларни яратиб берган Президент ишончига муносиб бўлинг ва муносиб иш қилинг. Кириш имтиҳонларига, тест синовларига пухта тайёргарлик кўриб, бу имтиҳонлардан ўз билимингиз билан ўтишга бел боғланг».

Шунингдек, ота-оналар ҳам ҳалолликка чақирилди. «Афсуски, товламачилар ва фирибгарларнинг дунёқараши ўзгармаяпти. Улар ҳамон эскича ўй-хаёлларда, мўмай ва қинғир йўллар билан даромад топиш илинжида юрибди. Уларнинг тузоғига илиниб қолманг», дейилади мурожаатда. Халқимизда «қарс икки қўлдан чиқади» деган нақл бор. «Коррупция тўғрисида»ги қонуннинг тегишли бандларига кўра пора берган ҳам, пора олган ҳам қонун олдида тенг жавобгар саналади ва муқаррар жазога тортилади. Фарзандингизга ёрдам бераман десангиз, ноўрин ва пинҳона хатти-ҳаракатларга йўл қўйманг! Бу йўлдаги ножўя қадам билинг­ки, кун ўтиб бир кун болангиз келажаги учун қаттиқ зарба бўлиши мумкин.

Тадбир давомида Қорақалпоғистон Республикаси ва вилоятлардаги олий таълим муассасалари раҳбарлари қабул жараёнлари, Ректорларнинг Мурожаати бўйича ўз муносабатларини билдирди.

 

Нурилло НАСРИЕВ,

ЎзА мухбири.



DB query error.
Please try later.