17.07.2018

ОЗОДАЛИК ОСТОНАДАН БОШЛАНАДИ

Рустам КАЛОНОВ, «Нуроний» жамғармаси Тошкент шаҳар кенгаши раиси, халқ депутатлари Тошкент шаҳар Кенгашидаги ЎзХДП гуруҳи аъзоси:

— Мамлакатимиз миқёсида, хусусан, Тошкент шаҳрида ҳайрат­омуз бунёдкорлик ишлари олиб борилмоқда. Яқин келажакда юртимиз жаҳоннинг энг гўзал, обод ва тинч мамлакатига айланишига шак-шубҳа йўқ. Бироқ бу ўз-ўзидан бўлмайди. Бунинг учун барчамиз бир ёқадан бош чиқариб, астойдил ҳаракат қилмоғимиз зарур. Ўзбекистонга турли давлатлардан келаётган сайёҳлар оқими кундан-кунга кўпайиб бормоқда. Келаётган хорижий меҳмонлар юртимиз жамолини кўриб, ҳавас қилишсин, яхши таассуротлар олишсин.

Зеро, халқимиз қадим-қадимдан орасталик, покизаликка эътибор бериб келган. Саранжом-саришта жойда фаришта, ҳар бир ишда қут-барака, файз, унум бўлади. Қиз-келинларимизнинг саҳар туриб, ҳовли-эшик олдиларини супириб-сидиришлари, сув сепиб қўйишлари энг сара ­ўз­бекона қадриятларимиздандир.

Афсуски, бундай қадриятларимиз кейинги пайтларда бироз сусайгандек, назаримизда. Тўғриси, баъзи одамлар феъл-атворида лоқайдлик, боқимандалик кай­фия­ти ҳукмронлик қилмоқда. Айниқса, кўп қаватли уйларда истиқомат қилувчи айрим кишилар озодаликка беэътиборлик билан қараб, ободончилик ишларини давлат қилиб бериши керак, деб ўйлайдилар. Қўни-қўшнилар билан деярли борди-келди қилишмайди: на салом бор, на алик. Ҳафтанинг жума куни уйларига кириб кетиб, душанба кунигача қораларини кўрсатишмайди. Турар жойларида ҳашарлар бўлаётгани билан асло ишлари йўқ. Йўлакларни супуриб-сидириш сансалорликка айланаётгани, ҳовлиларга экилган дарахт, гулларнинг суғорилмай, қовжираб ётгани, қачонлардир шарқираб оққан ариқларнинг кўмилиб, ахлатхонага айланиб кетгани ниҳоятда ачинарлидир. Йўлакларда электр ёритгичларининг кеча-кундуз ўчирилмай туришига беэътиборлик хўжасизликнинг ёрқин кўриниши, десак бўлади. Тартиб-интизом, озодаликка риоя қилиш остонадан бошланади. Умуман, ҳар бир фуқаро кўпчилик бўлиб жамоада яшаш одоби ва маданиятига риоя қилиши зарур.

«Обод маҳалла» дастури доирасида пойтахтимизда талайгина ибратли ишлар амалга оширилмоқда. Бироқ, булар мавсумий тус олмаслиги керак. Мавзелардаги ободонлаштирилган ҳудудлар, болаларнинг ўйин майдончалари сал ўтмай қаровсиз қолиши, арғимчоқ, ўриндиқларнинг яроқсиз ҳолга келганини кўриб, кўнглимиз ғашланади. Наҳотки, шу атрофда яшаб турган одамларда озгина бўлса ҳам инсоф, диёнат, масъулият ҳис-туйғуси йўқ? Биз фарзанд, набираларимизга халқ мулкини асраб-авайлаш, уларнинг қадрига етишга ўргатишимиз, ўзимиз шахсий намуна кўрсатишимиз зарур эмасми?!

Афсуски, бу борада ҳам баъзи маҳалла-кўйларда арзимаган ишларни кўр-кўрона мақтаниб кўрсатиш, расмиятчиликка йўл қўйилмоқда. Ваҳоланки, бу ишлар барчамизнинг кундалик одатий вазифамизга, ёшлар эса бизнинг доимий ишончли ҳамкорларимизга айланиши керак.

Фуқаролик бурчи нуқтаи назаридан келиб чиқиб фикрлайдиган бўлсак, ҳар биримиз ўз ҳовлимиз, уй-жойимиз, маҳалламиз тоза ва обод бўлиши учун масъулмиз.



DB query error.
Please try later.