17.07.2018

ИҚТИСОДИЙ ҲАМКОРЛИКНИНГ ЯНГИ БОСҚИЧИ

Мамлакатимизга ўтган ҳафтада Швейцария федерал иқтисодиёт, таълим ва илмий тадқиқотлар вазири, жаноб Йоҳанн Шнайдер-­Амманн бошчилигида делегация ташриф буюрди.

Швейцариянинг дунёга танилган йирик компаниялари раҳбарлари ва ишбилармонларидан иборат ушбу нуфузли делегация ташрифнинг биринчи куни Бектемир туманидаги «Ўзтўқимачиликсаноат» уюшмаси ҳамда Швейцариянинг «Rieter Group» компанияси томонидан ташкил этилган тўқимачилик жиҳозлари учун бутловчи қисмлар ва металлконструкциялар ишлаб чиқарувчи «Metal Processing» МЧЖнинг тантанали очилиш маросимида иштирок этди. Мазкур завод Марказий Осиёда ягона бўлиб, тўқимачилик машинасозлиги учун зарур деталлар, келгусида эса оғир саноат корхоналари учун импорт ўрнини босувчи маҳсулотлар етказиб бериши кўзда тутилган.

Делегация аъзолари ташрифнинг иккинчи куни пойтахтимиздаги Халқаро ҳамкорлик марказида Ўзбекистон — Швейцария бизнес форумида қатор вазирликлар, қўмиталар, Савдо-саноат палатаси, банк-молия институтлари, маҳаллий ҳокимликлар вакиллари, ишбилармонлар билан мулоқотда бўлди. Анжуманда Ўзбекистон Республикаси иқтисодиёт вазири ­Ботир Хўжаев ва жаноб Йоҳанн Шнайдер-Амманн сўзга чиқиб, мамлакатимизда Президентимиз бошчилигида савдо-иқтисодий ва банк-молия соҳаларида олиб борилаётган ислоҳотлар натижасида хорижий сармоядорлар учун янада қулай муҳит яратилганини алоҳида таъкидлади. Ўзаро ҳамкорлик ўрнатилганидан буён Швейцария томонидан Ўзбекистонда 33 та лойиҳа амалга оширилгани қайд этилди.

Бугунги кунда Швейцария инвестицияси иштирокида иқтисодиёт, молия ва банк, таълим, тадбиркорлик ва ­ходимлар малакасини ошириш соҳасида 7 та қўшма лойиҳа бўйича иш олиб борилмоқда.

Тадбирда Ўзбекистоннинг инвестицион салоҳияти, ҳудудларнинг сайёҳлик имкониятлари, озиқ-овқат саноатининг истиқболдаги тараққиёти юзасидан тақдимотлар ўтказилди.

Форумнинг шўъба йиғилишларида Швейцариянинг «ABB Group ABB Switzerland», «Stadler», «Buhler AG», «Swiss Medical Network», «Rieter Group», «Economiesuisse», «Reyl», «At a Glance», «Trub Trading Internаtional AG», «Switzerland Global Enterprise» каби ­экспорт, импорт ва инвестицияларга кўмаклашувчи, электротехника, энергетика машинасозлиги ва ахборот технологиялари, темир йўл транспорти, тўқимачилик, инновацион қурилиш материаллари ишлаб чиқаришга ихтисослашган 20 дан зиёд йирик компанияси вакилларига Ўзбекистонда янги замонавий инвес­тиция лойиҳаларини амалга ошириш таклиф этилди.

 

Ўзбекистон Республикаси иқтисодиёт вазири Ботир Хўжаев:

— Мамлакатимиздаги кўплаб тўқимачилик корхоналарида Швейцариянинг дунёга машҳур «Rieter Group» компанияси асбоб-ускуналари ўрнатилган. Ушбу форум жараёнида яна бир муҳим лойиҳа, яъни юртимизга қўшимча тўқимачилик асбоб-ускуналарини олиб келиш, нафақат ип-калава, балки тайёр тўқимачилик маҳсулотларини ишлаб чиқариш ҳамда экс­портга жўнатиш билан боғлиқ лойиҳалар имзоланиши режалаштирилган.

Бизнес форумда ўта муҳим масала — Ўзбе­кис­тоннинг Жаҳон савдо ташкилотига аъзо бўлишига тайёргарлик жараёнлари ҳам алоҳида эътиборда бўлди. Томонлар бу йўналишдаги тизимли тадбирларда яқиндан ҳамкорлик қилишга келишиб олди.

 



Швейцария федерал иқтисодиёт, таълим ва илмий тадқиқотлар вазири, жаноб Йоҳанн Шнайдер-Амманн:

— Мақсадимиз ягона — барча учун фойдали битимларни имзолаш ва фуқароларни иш билан таъминлаш базасини янада яхшилашдир. Ўйлашимча, келгуси учрашувларимизда ҳам ҳамкорлик бўйича бир қатор меморандумлар имзолаймиз. Сўнгги йилларда Ўзбекистонда кенг кўламли ислоҳотлар изчил давом этмоқда. Иқтисодиётда олдинлари кузатилмаган янгиликлар рўй бермоқда. Бу эса мамлакатингизга хорижлик инвесторларни жалб қилиш орқали истиқболли лойиҳаларни юзага чиқаришда, аҳоли бандлигини таъминлашда, маҳсулотлар ва хизматлар сифатини оширишда қўл келади.

 

***

Бизнес форум якунида сайёҳлик, савдо-сотиқ, соғ­лиқни сақлаш, енгил саноат, банк-молия каби соҳаларда ўзаро ҳамкорликка оид 6 та меморандум имзоланди.

 

Ноила МАРУПОВА



DB query error.
Please try later.