05.07.2018

МУРОЖААТ ВА МАСЪУЛИЯТ

Халқ билан мулоқот қилиш ва инсонларнинг дарду ташвиши билан яшаш бугунги сиёсатнинг асосини ташкил этади. Бу эса барча даражадаги раҳбарлар, жумладан, сиёсий партиялар масъуллари ва депутатлар зиммасига ҳам катта масъулият юклаши табиий. Хўш, бугунги кунда ҳудудларда электоратимиз вакилларини қандай масалалар қийнаяпти, муаммоларни бартараф қилиш борасида амалга оширилаётган ишлардан одамларнинг кўнгли тўлаяптими?

Ана шу саволларга жавоб топиш мақсадида Жарқўрғон туманида бўлдик.

Тўғрисини айтганда, ютуқлар билан бир қаторда камчиликларимиз ҳам бор, — дейди Ўзбекистон ХДП Жарқўрғон туман кенгаши раиси, туман Кенгашидаги партия гуруҳи аъзоси Алишер Маматмуродов.Аҳолини бандлик, йўл қурилиш, уй-жой олиш, ичимлик суви ва табиий газ масалалари кўпроқ ўйлантиради. Таълим ва тиббиёт, молия-банк соҳаларида ҳам салбий ҳолатлар кўзга ташланади. Йиллар давомида тўпланиб қолган долзарб муаммоларни бартараф қилиш учун партиядошларимиз ва депутатлар замон талабига мос иш юритишлари лозим. Айниқса, Жамоатчилик қабулхонаси фаолиятини жонлантириш муҳим аҳамият касб этади. Жойларда сайёр қабуллар ташкил қилиш асосий вазифаларимиздан ҳисобланади.

Ўтган йили Жамоатчилик қабулхонамизга 113 киши мурожаат қилган. Жорий йилнинг тўрт ойида эса 27 нафар фуқаро турли масалада қабулга келган. Уларни ҳал этиш учун қўлимиздан келганча ҳаракат қиляпмиз. Аммо бу рақам бизни қониқтирмайди. Биламиз, юзлаб одамлар турли муаммоларга ечим ахтариб овора бўлиб юрибди. Бизга эса қарийб ярим йил орасида улардан бор-йўғи 27 нафари мурожаат қилаяпти. Нега? Бу савол ҳар биримизни ўйлантириши керак.

Айрим мутасаддиларда ҳамон бепарволик кузатилаётгани афсусланарли, — дейди «Қўлдовли» маҳалласида истиқомат қилувчи меҳнат фахрийси Абдусаттор Фозилов.Муаммоингизга ечим топиш нари турсин, ҳатто дардингизни тингламайдиганлар ҳам топилади. Бу одамларнинг ҳақли эътирозига сабаб бўлиб, турли норозиликларни келтириб чиқаряпти. Жамоатчилик қабулхонаси эса халқимизнинг ишончли масканига айланаётганидан хурсандман.

Ўғлим Салимжон Фозилов ўтган йили Андижон давлат тиббиёт институтини муваффақиятли тамомлади. Бундан онаси иккимиз ниҳоятда мамнун бўлдик. Таҳсилни тўлов-контракт асосида магистратурада давом эттирмоқчи бўлганида янада қувондик. Аммо 9 миллион 660 минг сўм пул топишга қийналдик. Ҳомийлик ёрдами сўраб, турли корхона ва ташкилотлар мутасаддиларига учрашдим. Кўплаб масъул идоралар раҳбарларига мурожаат қилдим. Лекин фойдаси бўлмади. Шундан кейин Жамоатчилик қабулхонасига бордим. Ўзбекистон ХДП Жарқўрғон туман кенгаши раиси кутиб олди. Оилавий шароитимиз билан яқиндан танишгач, албатта ёрдам беришини айтди.

Ишониб-ишонмай уйга қайтдим. Орадан уч-тўрт кун ўтгандан кейин Алишер Маматмуродов шартнома ҳужжатларини сўради. Хуллас, Ўзбекистон ХДП Жарқўрғон туман кенгашининг ташаббуси ва «Жарқўрғон нефтни қайта ишлаш» қўшма корхонаси раҳбариятининг саъй-ҳаракати билан 4 миллион 830 минг сўм ҳомийлик ёрдами кўрсатилди. Саховатпеша инсонлардан бир умр миннатдорман.

Шу ўринда муҳим масала хусусида тўхталмоқчиман, — дейди халқ депутатлари туман Кенгашидаги Ўзбекистон ХДП гуруҳи раҳбари Шукур Бозоров.Бугунга қадар чекка ва бориш қийин бўлган ҳудудлар тўлиқ қамраб олингани йўқ. Инфратузилмани яхшилаш, коммунал хизматлардаги нуқсонларни бартараф қилиш, ёшлар ва хотин-қизлар бандлигини таъминлаш масалалари долзарблигича қолмоқда. Аҳолига намунали транспорт хизмати кўрсатишни йўлга қўйиш ҳамда вақтинчалик автомобиллар турар-жойларини ташкил қилиш муҳим вазифалардан ҳисобланади. Партиядошларимиздан янада фаол ва фидойи бўлиш талаб этилади.

 

Абдумалик ҲАЙДАРОВ,

«Ўзбекистон овози» мухбири.



DB query error.
Please try later.