Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
14.06.2018

УЙ-ЖОЙЛИ БЎЛИШ БАХТИ

Сурхондарё вилояти ҳокимлиги томонидан Термиз шаҳрида эҳтиёжманд кишиларга янги уй-жойлар топширилди. Бир ва икки хонали квартираларнинг 14 таси эҳтиёжманд оилаларга, 32 таси эса Меҳрибонлик уйи тарбияланувчиларига берилди.

Жорий йилда «Жўйжангал» маҳалла фуқаролар йиғини ҳудудидаги «Нурафшон» кўчасида жойлашган собиқ меҳмонхона капитал таъмирланди, — дейди Термиз шаҳар ҳокимлиги ташкилий-назорат гуруҳи раҳбари Зафаржон Назаров.Бу ишга 7 миллиард сўмдан ортиқ маблағ йўналтирилди. Юртдошларимиз учун муносиб туҳфа бўлган уй-жойларнинг ҳар бир қаватида алоҳида меҳмон кутиш зали ташкил қилинган. Мўъжаз ошхона ишлаб турибди, махсус кир ювиш жойлари бор. Ҳовлида тўй ва тантаналар учун тандирхона ҳамда ошхона барпо этилган. Ўйин майдончаси болажонларнинг севимли масканига айланганидан ота-оналар мамнун. Бандликни таъминлаш мақсадида хориждан 12 та замонавий тикув машинаси келтирилди ва тикувчилик цехи фаолияти йўлга қўйилди.

Турмуш ўртоғим Меҳрибонлик уйида тарбияланган, — дейди Парвина Ашурова. — 2012 йилда тўйимиз бўлганди. Икки нафар фарзандимиз бор. Шукрона 4 ёшда, Шодиёна эса яқинда икки ёшга тўлади. Ишонасизми, икки йилга яқин шифохона ҳудудидаги бир хонали харобада яшаганмиз. Қишнинг аёзли кунларида қийналардик. Баҳорда уй шифтидан тинимсиз сув ўтарди.

Икки хонали уй-жойни олган кунимиз роса йиғладим. Бундан оилам, қизалоқларим, яқинларим ва меҳмонлар ҳайрон қолишди. Аслида бу севинч кўзёшлари эди.

— Ота-онам эрта вафот этишган, — давом этади Шаҳноза Пиримқулова. — Шундан кейин Термиз шаҳридаги Меҳрибонлик уйида таълим-тарбия олдим. Турмуш ўртоғим Рашид Мусурмонов билан бир йилдан ортиқроқ қайинопамнинг уйида ижарада ҳаёт кечирдик. Тўғри, қариндошлар қўлдан келганча ёрдам қилишди. Улардан миннатдорман. Аммо ўз уйинг бўлмаса, барчаси бекор экан.

Бу йилги Рамазон ойи биз учун қутлуғ келди. Байрам арафасида ўғлимиз Аюбжон туғилган бўлса, кўп ўтмай икки хонали шинам уйга кўчиб ўтдик. Сурхондарё вилояти ҳамда Термиз шаҳар ҳокимликлари томонидан телевизор, музлаткич, шкаф, стол-стул, гилам ва уй-рўзғор буюмлари совға қилинди. Коммунал тўловларнинг икки ойлиги амалга оширилганини эшитиб янада қувондик. Қўшалоқ шодиёна қўни-қўшнилар ва яқин қариндошлар даврасида шод-у хуррамлик билан нишонланди. Ташаббускор инсонлар доим соғ-саломат бўлишсин!

Саховат ва яхшилик ойи Барно Сафарова, Миржалолиддин Мамадалиев каби кўплаб йигит-қизларнинг қалбларини ҳам қувончга тўлдирди.

Термиз шаҳар ҳокимлиги ва Ўзбекистон ХДП Термиз шаҳар кенгаши ташаббуси билан яқинда ушбу масканда давра суҳбати ташкил қилинди. Болажонларга ҳокимлик ва партиямизнинг совғалари топширилди.

— Электоратимиз вакилларини қўллаб-қувватлаш борасида вилоятда хайрли ишлар амалга оширилмоқда, — дейди Ўзбекистон ХДП Термиз шаҳар кенгаши раиси, халқ депутатлари шаҳар Кенгашидаги партия гуруҳи аъзоси Фаррух Абжалов. — Ўтган йили кам таъминланган ва ногиронлиги бўлган инсонлардан 21 нафарига янги уй-жойлар топширилган бўлса, жорий йилнинг охирига қадар яна 116 нафар киши ана шундай бахтга мушарраф бўлади.

 

Абдумалик ҲАЙДАРОВ,

«Ўзбекистон овози» мухбири.

 

СуратдаЯнги уйга кўчиб ўтишганидан Шукрона ва Шодиёна ҳаммадан кўпроқ хурсанд.



DB query error.
Please try later.