Охирги сонда



Кўп ўқилган мақолалар



Долзарб мавзу



Мақолалар архиви

«    Yanvar 2019   
Du Se Cho Pa Ju Sha Ya
31 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3
14.06.2018

ЁШЛАР ЯНГИ ДАВРНИ ЯХШИ ҲИС ҚИЛИШАЯПТИ

Яқинда телевизор орқали Тошкент вилоятининг қайсидир туманида «Ноодатий меҳнат ярмаркаси» ўтказилаётганига кўзим тушиб қолди. Анча томоша қилгач, бизга ҳар бир ишда янгича ёндашувчилар зарурлигига амин бўлдим. Шу заҳоти Китоб туманида «Ёш сиёсатчи» танловининг вилоят босқичи қандай ўтказилганини эсладим...

Рости, анчадан буён Китоб шаҳри марказидаги 500 ўринли маданият саройига бунча одам келганини эслай олмайман. Бу ерга фақат коллеж ўқувчиларигина эмас, балки ўрта ёшли кўплаб ота-оналар ҳам келишган.

— Анъанани буздик, — деб кулади ЎзХДП Китоб туман кенгаши раиси, партиямиз Марказий Кенгаши аъзоси Зилола Норова. — Барча маҳаллалардан нуроний фаолларни ҳам таклиф қилдик. Ёшларимизнинг бугунги ҳаётга қандай кириб бораётгани, орзу умидлари барчамиз учун муҳим...

— Ҳозирча вилоят партия ташкилоти 39 минг аъзони бирлаштирган бўлса, уларнинг 31 фоизи ёшлар, — дейди ЎзХДП Қашқадарё вилоят кенгашининг ходими Шаҳло Худойқулова. — Ёшлар йирик масалаларни кўтариб, тадбиркорликка қўл уришмоқда. Кўрикнинг савол-жавобларида китобхонлик, кўп китоб ўқишга ҳам катта эътибор берилган.

Кўрик бошланганда шуни ҳис қилдимки, партиямиз ёшлари кўп мақсад ва умидларга интилишар, айрим соҳаларда бир мунча ютуқларга ҳам эришган экан. Китоб туманидан Соҳибжамол Қурбонованинг «Ёш авлод ташаббуси — фаровон келажак гарови» лойиҳаси ёшларни курашга, ҳаётдан ўз ўрнини топишга ундайди. Касби туманида бугун 188 минг аҳоли яшаса, шундан 30 ёшгача бўлганлар 63 минг киши. Салмоқли пахта ва ғалла етиштираётган туманда саноат кейинги йиллардагина ривожлана бошлади. Шунинг учун ҳам касбилик Асадбек Дўлтаевнинг кредит олиб, тикувчилик цехини ишга тушириш режаси умид уйғотади.

Маълумки, нодавлат таълим хизматлари кўрсатиш фаолиятини янада ривожлатириш чора-тадбирлари тўғрисида қарор қабул қилинди. Бу — келажак сари дадил ва муҳим қадамдир. Муборак туманидан Даврон Наврўзов ўз лойиҳасида Германияда жами мактабларнинг 12 фоизини, Францияда 17, АҚШда 18, Англияда 20, Исландия ва Исроил давлатларида 30 фоизини хусусий мактаблар ташкил этишини санаб ўтиб, шундай таълим маскани очиш орзусини баён қилиб берди. Деҳқонобод туманидан Дилрабо Янгибоева уйда декоратив ва манзарали гул кўчатлари етиштиришнинг фойдасини шарҳлашга уринди.

Кўрикнинг савол-жавоб ва нотиқлик санъати шартларини ҳам ёшлар зўр ҳаяжон билан бажаришди. Чироқчи туманидан қурилиш коллежи ўқувчиси Собир Абдужалиловнинг шеърий китобчаси чиққан экан. У ўз шеърларидан ҳам ўқиб берди.

Шундай қилиб, биринчи ўринни Қарши туманидан Умид Каримов эгаллади ва кўрикнинг Республика босқичига йўлланмани қўлга киритди. Иккинчи ўрин Яккабоғ туманидан Мафтуна Норбоевага насиб этди. Учинчи ўрин Косон туманидан Назокат Боборажабовага берилди. Косоннинг Қуйибоғ маҳалласида ўз тикувчилик цехини очган ёш тадбиркор Назокатнинг интилишлари кўпчиликка маъқул тушди. У ҳозир цехда саккиз кишини иш билан таъминлаган. Келажак учун аниқ режалари бор.

— Қарши муҳандислик иқтисодиёт институти биринчи босқич талабасиман, — дейди ғолиб Умид Каримов. — Оилада 4 ўғилмиз. Отам тадбиркор, онам уй бекаси. Менинг лойиҳам «Саховат», деб аталади. Ғояси — ижтимоий кўмакка муҳтож кишиларга ёрдам бериш. Бугун кўп ўқиб-ўрганмасанг, ниятингга етолмайсан. Танлов давомида бадиий адабиётларни кам ўқиганимни ҳис қилдим. Келажакда бу танловда яна қатнашиш ниятидаман.       

 

Юнус УЗОҚОВ,

«Ўзбекистон овози» мухбири

 

Суратда: «Ёш сиёсатчи — 2018» танловининг Қашқадарё вилоят босқичи қатнашчилари.



DB query error.
Please try later.