14.06.2018

ИШИ БОР ОДАМНИНГ ИШОНЧИ ҲАМ БЎЛАДИ

Хабарингиз бор, 12 июнь куни «Аҳолининг ижтимоий заиф қатлами бандлигини таъминлашни рағбатлантиришнинг ташкилий чора-тадбирлари тўғрисида» Президент қарори эълон қилинди. Унда ногиронлиги бўлган шахсларнинг жамоат бирлашмалари ва тадбиркорлик субъектларининг аҳолининг ижтимоий заиф қатлами, жумладан, ногиронлиги бўлган шахсларни меҳнат фаолиятига жалб этиш имкониятларидан тўлиқ фойдаланилмаётгани таъкидланди. Шуни ҳисобга олган ҳолда, аҳолининг ижтимоий заиф қатлами турмуш даражасини яхшилаш, бандлигини таъминлаш борасида чора-тадбирлар белгиланди.

 

Ойбек ИСОҚОВ, Ўзбекистон Ногиронлар ассоциацияси раиси:

Ногиронлиги бўлган кишилар ҳам яхши яшаш, жамият ҳаётида фаол иштирок этишга ҳақлидир. Шунинг учун мамлакатимизда ногиронлиги бўлган шахсларни қўллаб-қувватлаш масаласига катта эътибор қаратилмоқда.

Президентимизнинг «Аҳолининг ижтимоий заиф қатлами бандлигини таъминлашни рағбатлантиришнинг ташкилий чора-тадбирлари тўғрисида»ги қарорида ногиронлар жамиятлари қошидаги корхоналарни ривожлантириш бўйича муҳим вазифалар белгиланди.

Тўғриси, қарордаги масалалар узоқ йиллардан бери кўпчиликни ўйлантириб келаётганди. Бугунги кунда ҳар бир ногиронлар ташкилоти таркибида камида беш-олтитадан унитар корхоналар мавжуд. Уларнинг 70 фоизидан ортиғи ачинарли ҳолатда, ўз айланма маблағларига эга эмас, кредит ҳам ололмасди. Натижада ишлаб чиқараётган маҳсулотини реализация қилолмасди. Қарорга кўра, ишчи гуруҳ тузилди, ногиронлар жамоат бирлашмаларининг корхоналари тасарруфидаги ишлаб чиқариш объектлари ва ер майдонларидан самарали фойдаланиш масаласи комплекс ўрганиладиган бўлди. Ўрганишлар натижасида асосли таклиф ва тавсиялар ишлаб чиқилади, албатта.

Ногиронлар ташкилотлари қошидаги корхоналар штатидаги ходимларнинг 50 фоизини ногиронлиги бўлган шахслар ташкил этиши шартлиги қонунан белгилаб қўйилган. Ҳозирга қадар амалиётда ногиронлиги бўлган ишчилар учун 4,7 фоиз ягона ижтимоий тўлов тўланарди. Қолган 50 фоиз соғлом инсонлар учун бу кўрсаткич 15 фоизни ташкил этарди. Қарорда ягона ижтимоий тўлов ставкаси қатъий 4,7 фоиз миқдорда белгиланди. Ягона ижтимоий тўлов суммаси белгиланган тартибда тақсимланади. Бу тартиб жорий йилнинг 1 августидан кучга киради. Бу корхоналар ишининг янада ривожланишига хизмат қилади, деб ўйлайман.

 Ногиронлиги бўлган шахсларни иш билан таъминлаш ҳамда ногиронлар ташкилотларига маблағ ажратиш биз айтаётган корхоналарнинг асосий вазифаларидан ҳисобланади. Мана шу ажратилган маблағ ҳисобидан ногиронлар ташкилотлари ўз фаолиятини олиб боради. Бундай корхоналар солиқдан озод этилган. Лекин улар ўз ишини ривожлантириш, асбоб-ускуналарни янгилаш учун кредит олишда қийналарди. Негаки, уларда гаровга қўйиладиган объект йўқ эди. Қарорда бу масала ҳам ўз ечимини топган. Кредит маблағлари олинишида қатор имтиёзлар яратилди. Яъни, корхоналар кредит олишларида гаровга қўйиладиган мулк кафилликка алмаштирилди. Бунда кафиллик Тадбиркорлик фаолиятини ривожлантиришни қўллаб-қувватлаш давлат жамғармаси зиммасига юклатилди.

Бир сўз билан айтганда, қарорда белгиланган барча имтиёз ва имкониятлар ногиронлиги бўлган шахсларнинг бандлиги таъминланиши ҳамда улар ишлаётган иш ўринлари кафолатли ва барқарор бўлишига хизмат қилади.



DB query error.
Please try later.