12.06.2018

МУБОРАК РАМАЗОН КУНЛАРИДА ЮРТДОШЛАРИМИЗ

хайрли амалларни ихлос билан адо этишга қулайлик яратилди

Вазирлар Маҳкамаси ҳузуридаги Дин ишлари бўйича қўмита ҳамда «Вақф» хайрия жамоат фонди ҳамкорлигида ушбу фонднинг ташкил этилиши ва келгусидаги фаолиятига бағишланган матбуот анжумани ташкил этилди.

Тадбирда Президентимизнинг 2018 йил 16 апрелда «Диний-маърифий соҳа фаолиятини тубдан такомиллаштириш чора-тадбирлари тўғрисида»ги фармонига асосан «Вақф» хайрия жамоат фонди ташкил этилгани ва ҳозирда фондга «Payme», «Click» ва «Mbank» электрон тўлов тизимлари орқали маблағларни жалб этишга мўлжалланган хизматлар ишга туширилгани таъкидланди. Шунингдек, фондга маблағ ўтказиш учун Тошкент шаҳридаги 12 масжидга ва Тошкент вилоятининг Зангиота зиёратгоҳига инфокиоскалар ўрнатилгани ҳам айтиб ўтилди.

 «Вақф» хайрия жамоат фонди ҳисобига 5 июнь санасигача, яъни 10 кунда 18 миллион сўмдан ортиқ маблағ келиб тушган. Бу маблағнинг 1,9 миллион сўмга яқини хайрия учун, 15,5 миллион сўмдан кўпроғи закот, ушр, фитр ва фидя учун, салкам 584 минг сўми вақф учун ўтказилган. Бир сўз билан айтганда, эзгулик, саховат ва мурувват ойи бўлган Муборак Рамазон кунларида юртдошларимиз савоб иш қилиш, закот бериш каби хайр­ли амалларни ихлос билан адо этишмоқда.

— Давлатимиз раҳбарининг фармони асосида «Вақф» хайрия жамоат фондининг ташкил этилгани халқимизнинг кўнглидаги ишлардан бири бўлди, — дейди Вазирлар Маҳкамаси ҳузуридаги Дин ишлари бўйича қўмита раиси ўринбосари Нуриймон Абулҳасан. — Боиси фондга тушадиган маблағлар масжидлар ва диний таълим муассасаларининг биноларини қуриш, таъмирлаш, реконструкция қилиш, диний таълим муассасалари ходимлари ва талабаларини, аҳолининг ижтимоий ҳимояга муҳтож қатламлари, шу жумладан, имконияти чекланган шахсларни моддий ва маънавий қўллаб-қувватлашга йўналтирилади. Яна шуни айтиш мумкинки, авваллари фуқароларимиз диний мажбуриятларни бажариш чоғида кўплаб тушунмовчиликларга дуч келган. Мисол учун, закот беришни олайлик. Улар кимга ва қандай тартибда закот бериш лозимлигини билмаган. Эндиликда ушбу фонднинг ташкил этилгани бу каби ва бош­қа муаммоларнинг барчасига чек қўйди.

Фондга нақд пул, пластик карталари ва элек­трон тўлов тизимлари орқали тушаётган маблағлар махсус дастур ёрдамида ягона серверда тўпланиб, таҳлил қилинади. Фонднинг алоҳида ҳисоб рақамида тўпланган маблағларнинг мақсадли сарфланишида шаффофликни таъминлаш тўғрисидаги маълумотлар ҳам тақдим этиб борилади.

— Фонднинг асосий мақсадларидан бири юртимизда етишиб чиққан буюк алломаларимизни дунё маданияти ва илм-фанига қўшган ҳиссасини тараннум этишдир, — дейди «Вақф» хайрия жамоат фонди бошқаруви раҳбари Жалолиддин Ҳамроқулов. — Шу билан бирга, ҳамюртларимиздаги мурувват, саховатлилик туйғуларини янада оширишга кўмаклашиш. Хусусан, диний-маърифий соҳага ёрдам бериш, масжидларимизни ободонлаштириш, унда хизмат кўрсатаётган имом-хатиб ва ноиблар, мутаваллиёт ва муаззинларга моддий-маънавий кўмак беришдир. Бундан таш­қари, уларга янги қурилаётган уйлардан олиб бериш, кўп йиллардан буён хизмат қилиб келаётган имом-домлаларимизни рағбатлантириш, диний таълимни ҳам моддий, ҳам маънавий қўллаб-қувватлаш ҳам муҳим вазифалардан бири ҳисобланади. Халқимиз орасида кам таъминланган, моддий кўмакка эҳтиёжи бор оилаларга ёрдам бериш ҳам ҳисобга олинган. Яна шуни айтишни истардимки, Муборак Рамазон ойида ҳар бир қилинган амалнинг савоби 700 баробар зиёди қилиб берилиши ҳадиси шарифларда келтирилган. Шунинг учун мамлакатимизда динимизнинг устунларидан бири бўлмиш закот ибодатини йилда бир бор рамазон ойида адо этишади. Зеро, Закот — поклик ва барака демакдир.

Кўнгилларга меҳр улашиб, ўз маблағларини динимиз манбаларида белгиланган тартибда эзгу ишларга етказишни истаган мўмин-мусулмонлар, электрон тўлов тизими орқали закот, хайрия ва бошқа алоҳида тўловларни қуйидаги ҳисоб рақамига ўтказиши мумкин: 20212000100881753003.



DB query error.
Please try later.