05.06.2018

БОЛАЛАР ҚУВОНЧИ

Ўзбекистон ХДП Қаш­қадарё вилоят кенгаши ташаббуси билан «Деҳқонобод калийли ўғитлар заводи» МЧЖда «Ёшлар – келажагимиз таянчи» мавзусида ёшлар форуми ўтказилди.

— Халқаро болаларни ҳимоя қилиш куни сифатида айнан 1 июнь санаси танлангани бежиз эмас, — деди Ўзбекистон ХДП вилоят кенгаши раиси ўринбосари Музаффар Туропов. — Байрам арафасида болалар учун амалга оширилаётган ишлар сарҳисоб қилинади. Янги вазифалар белгилаб олинади. Бугунги тадбир ҳам болажонлар хотирасида узоқ вақт сақланиб қолади, деб ўйлайман.

Байрам тадбирига туманда истиқомат қилаётган эҳтиёжманд оилаларнинг фарзандлари таклиф қилинди. Уларнинг 20 нафарига Яккабоғ туманидаги «Кимёгар» болалар ёзги дам олиш оромгоҳига йўлланмалар берилди. Бундан ташқари, ҳомийлар томонидан болажонларга эсдалик совғалари ва пул маблағи қўйилган омонат дафтарчалари топширилди.

Олий Мажлис Қонунчилик палатасидаги Ўзбекистон ХДП фракцияси аъзоси Комила Каромова, вилоят ҳокими ўринбосари Баҳодир Қодиров, Ўзбекистон ХДП вилоят кенгаши раиси, халқ депутатлари вилоят Кенгашидаги партия гуруҳи раҳбари Олим Равшанов болажонларни байрам билан табриклаб, дил изҳорларини билдиришди.

Тадбирнинг бадиий қисми театр­лаштирилган саҳна кўриниши, таниқли санъаткорлар, сўз усталарининг чиқишлари билан давом этди. Айниқса, «Ниҳол» давлат мукофоти соҳибаси Малика Эгамбердиеванинг қўшиқлари барчада илиқ таассурот қолдирди.

Ўзбекистон ХДП Тошкент вилоят, шаҳар ва туман кенгашлари ҳам мазкур санага бағишлаб хайрия тадбирлари ўтказди.

 — Халқаро болаларни ҳимоя қилиш куни бутун дунё болалари учун энг беғубор ва қувончли байрам ҳисобланади, — деди Ўзбекистон ХДП Оҳангарон туман кенгаши раиси Феруза Холтўраева. — Партия ташкилотимиз туман марказий истироҳат боғида байрам тадбири уюштирди. Барчамиз бирга болажонларга концерт дастурини намойиш қилдик. Уч ёшдан ўн ёшгача бўлган ўғил-қизлар иштирокида «Менинг оилам» мавзусида расм чизиш танлови ўтказилди. Ғолиблар Ўзбекистон ХДП туман кенгаши томонидан мукофотланди. Шунингдек, барча иштирокчиларга совға-саломлар топширилди.

Байрам кунлари хоразмлик болажонларнинг ҳам қувончи чексиз бўлди. Урганч шаҳрининг марказида жойлашган Амир Темур истироҳат боғи байрамона безатилди. Куй-қўшиқлар янгради. Бир томонда спортчи болалар, бир томонда санъаткорлар, жажжи ўғил-қизлар рақсга тушди.

— Куни кеча навбатдаги ўқув йили якунланди, дейди ёш ижодкор Ҳулкарой Ражапова. — Йил давомида бир қатор ижодий конкурсларда, фестиваль ва китоб байрамларида қатнашдим. Энди таътилда маза қилиб дам оламиз.

Гулистон шаҳар 15-сонли ихтисослаштирилган мактабгача таълим муассасасида Ўзбекистон ХДП Сирдарё вилоят кенгаши ташаббуси билан уюштирилган байрам тадбири ҳам кўтаринки кайфиятда ўтди. Вилоят кенгаши раиси Холбек Жалолов болаларни байрам билан табриклаб, эсдалик совғалари улашди.

 

Маҳлиё АЛИҚУЛОВА

тайёрлади.



DB query error.
Please try later.