Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
10.05.2018

FACEBOOK ИЖТИМОИЙ ТАРМОҒИДАГИ «САХОВАТ» ГУРУҲИНИ БИЛАСИЗМИ?

Ўзбекистон ХДП Тошкент шаҳар ва Олмазор туман кенгашлари масъул ходимлари Уруш ва меҳнат фахрийлари республика пансионатига боришди.

— Ёлғиз қизим 19 ёшида хасталаниб қолди, — деди Манзура Ҳусаинова. — Онам билан маслаҳатлашиб, уни даволатиш учун яшаб турган уйимни сотдим. Тақдир экан, бироз ўтиб у вафот этди. Шундан сўнг мутасаддилар бизни пансионатга жойлаштиришди. Бу масканда бизга ўхшаган инсонлар учун барча шароитлар яратилган.

— Шукр, ҳеч нарсадан камимиз йўқ, — дейди Неъмат Бобожонов. — Хонамизга бир кириб кўринг. Ҳар биримизга алоҳида телевизор, музлатгич, юмшоқ мебеллар берилган. Пансионат ходимлари ўғил-қизимиздек. Саховатпеша инсонлар ҳолимиздан хабар олиб туришибди. Улардан жуда мамнунмиз, барака топишсин.

Суҳбатдошларимиз билан ташкилотчилар томонидан уюштирилган байрам дастурида учрашишга ваъдалашдик. Шу вақт нималарнидир муҳокама қилаётган бир гуруҳ одамларга кўзимиз тушди. Улар томон бордик. Бу инсонларнинг барчаси «Саховат» гуруҳи аъзолари экан.

— Ҳайрон бўлманг,— деди гуруҳ ташкилотчиларидан бири Нодир Абдуллажанов. — Биз Facebook ижтимоий тармоғидаги «Саховат» гуруҳи аъзоларимиз. Пансионатга тез-тез келиб, бу ердаги нуронийларнинг ҳолидан хабар оламиз, суҳбатидан баҳраманд бўламиз. Уларнинг кўнглини олиш учун қўлдан келганча ҳаракат қиламиз. Тадбирлар уюштирамиз.

Гуруҳимизнинг пайдо бўлиши ҳақида ҳам озгина тўхталиб ўтсам. Синфдош дўстим Баҳром Алимов билан тижорат мақсадида гуруҳ ташкил этган эдик. Шу вақтда эҳтиёжманд оила вакилларига ёрдам зарурлиги ҳақидаги хабарга кўзимиз тушди. Гуруҳ аъзолари бирлашиб, савоб ишда бош-қош бўлдик. Шундан сўнг гуруҳимиз номини «Саховат» деб ўзгартирдик. Ҳозир гуруҳимизда 16 мингга яқин турли ёшдаги, турли касб эгалари бор. Улар хайрия тадбирларига ўз фарзандларини ҳам олиб келишади. Бу ҳам тарбиянинг бир усули, деб ўйлайман. Негаки, ёшлар ота-оналарининг нафақат панду насиҳатларини эшитишади, балки амалий ишларига ҳам гувоҳ бўлишади. Келажакда улардан ибрат олишади.

Республика кўз касалликлари шифохонаси бош шифокори, халқ депутатлари Олмазор туман Кенгашидаги ЎзХДП гуруҳи аъзоси Отабек Икромовни бир гуруҳ нуронийлар орасида учратдик.

— Отахон-онахонлар билан суҳбатлашиб дил яйрайди, — деди у. — Нуронийларнинг ҳар бир сўзи олтинга тенг. Пансионатда кўп бўламан. Улар билан ўзаро ҳамкорликда иш олиб борамиз. Вақти-вақти билан тиббий кўриклар ўтказамиз. Кўзида муаммоси бор инсонларга бепул жарроҳлик амалиёти ўтказилиши йўлга қўйилган. Шу боисдан ҳам пансионат директори Фарангиз Акрамовага ота-оналарингизнинг барини кўзидан танийман, деб айтаман.

— Ростдан ҳам шундай, — деди Фарангиз Акрамова. — Муассасамизда 145 нафар отахон-онахонлар истиқомат қилишади. Барчалари ўзига хос феъл-атворга эга. Баъзан ёш боладек бўлиб қолишади. Бу ерда яшаётганларнинг барчаси меҳрга зор. Биз буни яхши биламиз. Уйдан қандай кайфиятда чиқмайлик, уларга буни билдирмасликка ҳаракат қиламиз.

Шунингдек, Ўзбекистон ХДП Марказий Кенгаши масъул ходимлари, депутатлар зоминлик 97 ёшли Иккинчи жаҳон уруши қатнашчиси Абдураззоқ Орипов хонадонида ҳам бўлишди.

— Мен 1940 йилда 19 ёшимда Смоленскдаги ҳарбий билим юртига ўқишга юборилдим, — деб хотирлайди Абдураззоқ Орипов. — 1941 йил 22 июнда Смоленск шаҳрига немислар томонидан бомба ташланди. Ўқишимизни Урал шаҳрига кўчиришди. 3 ойдан сўнг бизни фронтга жўнатишди. Урушнинг сўнгги кунларигача душманларга қарши жанг қилдим...

Ўзбекистон ХДП Сирдарё вилоят кенгаши фаоллари ҳам Сирдарё туманидаги «Мурувват» ногиронлиги бўлган аёллар учун интернат уйида бўлишди. Ёшлик маҳалласида истиқомат қилган 2000 йилда Сўх воқеаларида ватан учун мардонавор курашиб, жон берган Хайрулла Бозоровнинг хонадонига боришди.

Ўзбекистон ХДП Қорақалпоғистон Республика кенгаши ва Нукус шаҳар кенгаши томонидан ҳам мазкур санага бағишлаб тадбирлар ташкил этилди. Нукус шаҳрида истиқомат қилаётган Иккинчи жаҳон уруши қатнашчилари Нурулла Абдуллаев, Атабай Ермағанбетов, Қадирбай Нарманов хонадонига боришиб, уларни байрам билан қутлашди.

ЎзХДП Деҳқонобод туман кенгаши ходимлари 94 ёшли уруш фахрийси Инат Шарипов ҳолидан хабар олиб, партиянинг эсдалик совғаларини топширишди.

Тошкент вилоят партия кенгаши ҳам Чиноз, Оққўрғон, Бектемир тумани ҳамда Чирчиқ шаҳрида умргузаронлик қилаётган уруш фахрийлари ҳолидан хабар олишди. Байрам билан табриклаб, совғалар топширишди.

 

Маҳлиё АЛИҚУЛОВА

тайёрлади.



DB query error.
Please try later.