08.05.2018

«САБР СУЛТОНИ»

Қашқадарё вилоятида Иккинчи жаҳон уруши қатнашчиларига Ўзбекистон Республикаси Президентининг совғалари топширилмоқда. Шунингдек, бугун орамизда бўлмаган собиқ жангчилар номи хотирланмоқда. ЎзХДП Қашқадарё вилоят кенгаши «Нуроний» жамғармаси вилоят бўлими, Қаршидаги 4-мактаб жамоаси ҳамкорлигида уруш қатнашчиси, устоз муаллим Узоқ Қурбонов ҳаёт йўлига бағишланган «Сабр султони» китоби тақдимотини ўтказди.

...Қарши шаҳрининг Чақар маҳалласидаги оддийгина хонадонда туғилган ўғил фарзандга ота-она умри узоқ бўлсин, деган қутлуғ ниятда Узоқ деб исм қўйди. У ёшлигидан илмга қизиқди. Яхши ўқиди. Ўша йилларда муаллим етишмасди. Мактабда тил-адабиёт ўқитувчиси бўлиб ишлай бошлади. Ота-онаси уни уйлантириб қўйишди. Аммо дунё тинч турмас экан, қаттол уруш бошланиб кетди, Узоқ Қурбонов ҳам фронтга сафарбар этилди. Онаси ­Муҳаррам ая, умр йўлдоши Ҳаловат остонада зор йиғлаб қолишди...

У Ленинград фронтида жанг қилди, Россиянинг бир қатор шаҳар ва қишлоқларини озод қилишда қатнашди. Узоқ ­Қурбоновни юрт меҳри, она дуоси асради, оёғидан оғир яраланиб, урушдан қайтди. Илмга ташна эмасми, Бухоро педагогика институтида ўқиб, математика фани ўқитувчиси бўлди. Бутун умрини ёш авлод таълим-тарбиясига бағишлади. Аввал мактабга директорлик, кейин Қарши шаҳар халқ таълими бўлимига раҳбарлик қилди. Узоқ Қурбонов 2001 йил 6 март куни 82 ёшда оламдан ўтди. Агар ҳозир ҳаёт бўлганида 100 ёшга етган бўларди...

ЎзХДП вилоят кенгаши, «Нуроний» жамғармаси вилоят бўлими, 4-мактаб жамоаси хотира тадбирини тайёрлаш учун кўп меҳнат қилди. Мактаб ўқувчилари Узоқ Қурбоновнинг ҳаёти, уруш хотираларини ­саҳнада жонлантириб беришди. Юзлаб шогирдларга устозлик қилган Узоқ Қурбонов умр йўлдоши Ҳаловат ая билан 5 қиз ва 3 ўғилни улғайтириб, барини олий маълумотли қилишди. Унинг фарзанди ­Илҳом ­Қурбонов вилоятдаги йирик сув иншоотларидан бирининг раҳбари. У самарали меҳнатлари учун бу йил ­«Меҳнат шуҳрати» ордени билан тақдирланди.

Қашқадарё вилояти ҳокими ­Зафар Рўзиев Китоб туманининг Олақўйлик қишлоғида яшаётган 98 ёшли Мажид ­Хидировга ҳам Президент сов­ғаларини топширди. Ҳарбий оркестр собиқ жангчига уруш йиллари оммалашган қўшиқларни ижро қилиб берди. Ке­йин миллий куй-қўшиқлар ­янгради. Бобо Президентимизни дуо қил­ди...

— Боболаримизнинг ҳаёти, жасорати, меҳнати биз ёшлар учун тенгсиз ибрат, — дейди ЎЁИ Қашқадарё вилоят бўлими қошидаги «Камалак» болалар ташкилоти етакчиси, 4-умумтаълим мактабининг 8-синф ўқувчиси, «Йил сардори» кўриги Республика босқичи ғолиби Маржона ­Жўрақулова. — Биз ёшлар мамлакатимиз раҳбари даъват қилаётганларидек кўп китоб ўқиб, илм сирларини ўрганамиз, муносиб касбларни эгаллаймиз, юртимизга астойдил хизмат қиламиз!

 

Юнус УЗОҚОВ,

«Ўзбекистон овози» мухбири.



DB query error.
Please try later.