05.05.2018

АҲОЛИ БАНДЛИГИ — МУҲИМ МАСАЛА

Урганчда «Аҳоли бандлигини таъминлаш — долзарб ижтимоий масала» мавзуида давра суҳбати ўтказилди.

Ўзбекистон Халқ демократик партияси Хоразм вилояти кенгаши томонидан ташкил этилган тадбирда вилоят бандлик бош бошқармаси масъул ходимлари, халқ депутатлари вилоят, туман ва шаҳар Кенгашлари депутатлари, Марказий банк Хоразм вилояти бўлими, вилоят солиқ бошқармаси, вилоят хотин-қизлар қўмитаси, «Маҳалла» жамғармаси, уй-жой коммунал хизмат кўрсатиш бошқармаси, касб-ҳунар таълими бошқармаси, Урганч шаҳар ободонлаштириш бошқармаси, Ўзбекистон ёшлар иттифоқи вилоят кенгаши, вилоят ногиронлар жамияти ва бошқа ҳамкор ташкилотлар вакиллари, партия фаоллари иштирок этди.

Президентимизнинг 2017 йил 6 майдаги «Аҳоли бандлигини таъминлаш бўйича олиб борилаётган ишлар натижадорлиги ва самарадорлигини оширишда маҳаллий ижро ҳокимияти ва иқтисодий комплекснинг ҳудудий органлари раҳбарларининг шахсий масъулиятини ошириш чора-тадбирлари тўғрисида»ги қарори ижроси доирасида амалга оширилаётган ишлар ҳудудий органлар раҳбарларининг шахсий масъулиятини кучайтириш, шу асосда банд бўлмаган аҳоли, айниқса, касб-ҳунар коллежи битирувчилари бандлигини таъминлашда муҳим аҳамият касб этаётгани таъкидланди.

— Ҳар йили янги иш ўринлари яратиш бўйича Давлат дастури ишлаб чиқилиб, парламент томонидан тасдиқланади, — дейди халқ депутатлари вилоят Кенгашидаги ЎзХДП депутатлик гуруҳи раҳбари Р.Собуров. — Шундай бўлса-да, бандлик масаласи ҳамон долзарблигича қолмоқда. Масалан, вилоятимизда жорий йилда иш билан банд бўлмаган аҳолини пуллик жамоат ишларига жалб қилиш учун 42 миллиард сўм сарфланиши кўзда тутилган, лекин биринчи чоракда атиги 2 миллиард сўм ўзлаштирилган, холос. Демак ҳали вилоятда бу борада қилинадиган ишлар кўп.

Тадбирда Президент фармонлари, қарорлари, Ўзбекистон Республикаси Вазирлар Маҳкамаси қарорида белгиланган вазифалар ижроси бўйича соҳа ходимлари томонидан маълумот берилди.

Ёшлар, айниқса, касб-ҳунар коллежлари битирувчиларини ишга жойлаштириш, ногиронлиги бўлган шахслар бандлигини таъминлаш, банд бўлмаган аҳолини жамоат ишларига жалб қилиш орқали уларни моддий қўллаб-қувватлаш борасида қилинган ишлар, бу борада йўл қўйилган камчиликлар, уларни бартараф этиш йўллари хусусида фикр алмашилди.

 

А.ШОКИРОВ,

ЎзА мухбири.



DB query error.
Please try later.