Охирги сонда



Кўп ўқилган мақолалар



Долзарб мавзу



Мақолалар архиви

«    Sentabr 2019   
Du Se Cho Pa Ju Sha Ya
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6
28.04.2018

БОЙСУН – МОДДИЙ ВА НОМОДДИЙ МАДАНИЯТ БЕШИГИ

28-29 апрель кунлари Бойсун туманида бўлиб ўтадиган ­«Бойсун баҳори» очиқ фольклор фестивали доирасида Термиз давлат университетида «Бойсун — моддий ва номоддий маданият бешиги» мавзуида халқаро илмий-амалий конференция ўтказилди.

Анжуманнинг очилиш маросимида мамлакатимизда миллий урф-одат ва анъаналаримизни, моддий ва номоддий маданият бойликларимизни асраб-авайлаш, тиклаш ва ривожлантиришга қаратилаётган доимий эътибор ёш авлодни Ватанга муҳаббат, истиқлол ғояларига садоқат ва умуминсоний қадриятларга ҳурмат руҳида тарбиялашга хизмат қилаётгани таъкидланди.

Пурвиқор тоғлар қўйнида жойлашган Бойсун — дунё тамаддунининг энг қадимги бешикларидан бири сифатида жаҳон илм-фани аҳлида катта қизиқиш уйғотиб келади. Инсониятнинг илк манзилгоҳларидан бири бўлган бу гўша гўзал табиат манзаралари, ўзига хос ўсимлик ва ҳайвонот дунёси, моддий ва номоддий маданий бойликлари, сержило ноёб қадриятлари билан ҳам машҳур.

Минг йиллар давомида ноёб маданий меросни ўз бағрида авайлаб-асраб келаётган Бойсун 2001 йилда ЮНЕСКО томонидан «Инсониятнинг оғзаки ва номоддий маданий мероси» дурдонаси сифатида эътироф этилиб, 2008 йилда ЮНЕСКОнинг «Инсониятнинг номоддий маданий мероси» репрезентатив рўйхатига киритилди. Бундай нодир бойликни жаҳонда кенг тараннум этиш мақсадида «Бойсун баҳори» очиқ фольклор фестивалига асос солинди.

— Дунё цивилизацияси тараққиётига улкан ҳисса қўшган қадимий бу ҳудуднинг миллий ҳунар­манд­чилиги, этнографияси, археологиясини ўрганиш ва тадқиқ этишга қизиқиш тобора ортиб бормоқда, — дейди Термиз давлат университети ректори А.Тошқулов. — Кўплаб хорижлик олимлар ҳам бу борада турли изланишлар олиб бораётир. Мазкур халқаро илмий-амалий конференцияда юртимиз олимлари, мутахассислари билан бирга Хитой, Чехия, Қозоғистон каби давлатлардан ўнга яқин олим ва илмий тадқиқотчилар қатнашаётгани ҳам бунинг яққол тасдиғидир. Анжуман иштирокчилари қадим юрт тарихи, нафис ва бой маданий меросининг дунё тамаддунида тутган ўрни, шунингдек, Бойсун миллий ҳунарманд­чилиги, этнографияси ва археологиясини ўрганиш, ҳудудда туризмни ривожлантириш билан боғлиқ масалаларни илмий муҳокама этди. Қизиқарли таклиф ва тавсиялар билдирилди.

Конференция иштирокчиларининг маъруза ва мақолалари алоҳида тўплам сифатида чоп этилди.

Анжуманда Сурхондарё вилояти ҳокими Э.Турдимов сўзга чиқди.

 

Холмўмин МАМАТРАЙИМОВ,

ЎзА мухбири.


Фикр ва мулохазалар

Защита от автоматических сообщений

Сўнгги янгиликлар: