24.04.2018

ХОРАЗМДАГИ САРИМОЙ ҚИШЛОҒИДА ТУРКМАН ҚИЗИНИ КЕЛИН ҚИЛМАГАН ОИЛА ЙЎҚ...

Саримой қишлоғи Хоразм воҳасининг энг чеккасида — Амударё ёқа­сида, «Бухоро — Нукус» йўлининг устида жойлашган. Саримой қишлоғи нафақат Ҳазорасп туманида, балки вилоятда ҳам энг кўп миллат вакиллари яшайдиган маскан саналади. Бугун қишлоқдаги тўққиз юзга яқин хонадонда 5442 нафар киши яшамоқда. Буларнинг 3479 нафарини туркман миллатига мансуб кишилар ташкил этади. Шунингдек, ўзбеклар, қорақалпоқлар, қозоқлар ҳам истиқомат қилишмоқда.

Қишлоқда иккита мактаб фаолият юритмоқда. Уларда туркман тилида ўқитиладиган синфлар мавжуд ўз она тилида сабоқ олмоқ ниятида бўлган ўқувчиларга тажрибали педагоглар устозлик қилишяпти. Туркман тилидаги ўқув дарсликлар етарлича.

Узоқ йиллар мактабда сабоқ бериб, ҳозирда кексалик гаштини сураётган Души Муродниёзов юртимиздаги миллатлараро тотувлик, бағрикенглик ҳақида фахр билан сўзлайди:

— Қишлоғимиз одамлари жуда аҳил яшашади, — дейди у. — Урф-одатларимиз, тўй-томошаларимиз бир. Қишлоқда туркман қизини келин қилмаган оила йўқ, шунингдек ўзбек қизларига қайнона бўлмаган туркман онахонларимиз ҳам.

Илдизимиз бир — Махтумқули ўзбекларга қанчалик қадрли бўлса, Навоий ҳазратлари туркманлар учун шунчалик азиз. Яқинда Урганч туманидаги Ғойбу қишлоғига йўлим тушди. Асосан туркманлар истиқомат қилаётган бу қишлоқда замонавий мактаблар, намунали турар жойлар барпо этилган. Кўриб кўзингиз қувонади. Президентимиз Шавкат Мирзиёев Хоразмга ташрифи давомида айнан шу қишлоқдаги ободончиликлар билан танишди, туркман биродарларимиз билан учрашди. Уларни ойнаи жаҳон орқали кўриб, икки халқнинг иноқлигига, бунга мамлакатимиз раҳбари алоҳида эътибор бераётганига, бу сиёсатни ўз ҳаётимизда кўриб, ҳис қилиб ғоятда бахтиёрлигимиздан кўзларимга ёш келади.

Саримой қишлоғининг яна бир ўзига хос томони — бу ерда табиий яйловларнинг кўплиги. Шундан қишлоқда яшайдиган ҳар бир хонадонда эллик бошдан уч юз бошгача қўй, беш бошдан ҳатто 40 бошгача қорамол асралади. Чорва асосан яйловларда боқилгани учун сердаромад, чиқими оз. Айнан шу сабаб саримойликлар ўзига тўқ, тўкин ҳаёт кечираётган инсонлардир.

Саримой қишлоғи билан Қорақалпоғистон Республикасининг Тўрткўл тумани деярли чегарадош. Айнан Тўрткўл туманидаги бир қатор қишлоқларда ҳам туркманлар бир оила фарзандлари каби ўзбеклар, қорақалпоқлар билан аҳил-дўст бўлиб яшашмоқда.

Саримой қишлоғига Тўрткўлдан, Урганч шаҳри ҳамда Ҳазорасп тумани марказидан йўловчи автобуслар ҳамда йўналишли «Газель» таксилари мунтазам қатнови йўлга қўйилган. Бу эса энг чекка қишлоқдаги фуқароларнинг оғирини енгил, борди-келдиларини осон қилмоқда.

— Ўзаро тотувликка нима етсин, — дейди қишлоқ оқсоқоли Жумадурди Тўраев. — Барча миллат вакиллари бир ёқадан бош чиқариб, юртимиз ободлиги, буюк келажагимизни бунёд этиш йўлида ­баҳамжиҳат меҳнат қилмоқдамиз. ­Президентимизнинг яқин қўшнилар билан олиб бораётган дўстона сиёсати — тинч, фаровон ҳаётимизнинг пойдеворига айланмоқда.

 

Рўзимбой ҲАСАН,

«Ўзбекистон овози» мухбири.



DB query error.
Please try later.