19.04.2018

ЖАМИЯТДА ТЎСИҚСИЗ МУҲИТ ЯРАТИЛИШИ ҲАММАМИЗ УЧУН МУҲИМ

Ўзбекистон ХДП Марказий Кенгаши «Ногиронлиги бўлган шахсларнинг ҳуқуқлари тўғрисида»ги қонун лойиҳаси муҳокамасига бағишланган йиғилиш ўтказди. Унда партия фаол­лари, Ногиронлар, Кўзи ожизлар, Карлар жамиятлари, Ногиронлар ассоциа­цияси ва Соғлиқни сақлаш вазирлиги масъуллари ҳамда депутатлар иштирок этди.

1991 йилда қабул қилинган «Ногиронларни ижтимоий ҳимоя қилиш тўғрисида»ги қонун мамлакатимизда ногиронлиги бўлган шахсларга тўсиқсиз муҳит яратиш, уларнинг манфаатларини таъминлаш борасидаги ­ислоҳотларга асос бўлиб хизмат қилиб келмоқда. Вақт ва замон янгиланишларни, юксалишларни талаб қилади. Шу маънода, амалдаги қонун БМТ­нинг «Ногиронлар ҳуқуқлари тўғрисида»ги Конвенциясида белгиланган халқаро стандартларга жавоб бермайди.

Давлатимиз раҳбарининг 2017 йил 1 декабрда қабул қилган «Ногиронлиги бўлган шахсларни давлат томонидан қўллаб-қувватлаш тизимини тубдан такомиллаштириш чора-тадбирлари тўғрисида»ги фармони мавжуд муаммоларни бартараф этиш, қонунчилигимизни такомиллаштиришга хизмат қилиши билан аҳамият­лидир. Унда ногиронлиги бўлган шахсларни қўллаб-қувватлаш тизимини янада такомиллаштириш, уларнинг ҳуқуқ ва эркинликларини ҳимоя қилиш кафолатларини кучайтириш масалалари қамраб олинган.

Ушбу Фармонга мувофиқ, БМТ­нинг «Ногиронлар ҳуқуқлари тўғрисида»ги Конвенциясини ратификация қилишга тайёргарлик кўриш, «Ногиронлиги бўлган шахсларнинг ҳуқуқлари тўғрисида»ги қонун ло­йиҳасини ишлаб чиқиш юзасидан амалий чора-тадбирлар олиб борилмоқда. Бу қонун ногиронлиги бўлган шахсларга тиббий-ижтимоий ёрдам кўрсатиш ва реабилитация қилиш самарадорлигини ошириш, уларнинг таълим олиши, касб-ҳунар эгаллаши, ишга жойлашишида муҳим омил бўлади.

Йиғилишда «Ногиронлиги бўлган шахсларнинг ҳуқуқлари тўғрисида»ги қонун лойиҳасига таклифлар берилди. Хусусан, бундай шахслар турмуш кечириши, ўқиши, ишлаши учун қандай тўсиқларга дуч келаётганини ўрганиб, уларни бартараф этиш чораларини қонунчиликда акс эттириш бўйича фикр-мулоҳазалар билдирилди. Таъкидландики, мазкур ҳужжат ногиронлиги бўлган шахсларнинг қонуний манфаатларини таъминлашни сифат жиҳатидан янги босқичга олиб чиқиши лозим.

Қонун лойиҳасида давлат ва нодавлат тузилмалар масъулиятини ошириш, «ногирон» тушунчасини муом­иладан чиқариш, унинг ўрнига «ногиронлиги бўлган шахс» атамасини жорий этиш кўзда тутилган. Яъни ногиронлиги бор кишига ногирон сифатида эмас, шахс сифатида муносабатда бўлиш белгиланади. Бу ёндашув янги қонун лойиҳасининг бутун мазмун-моҳиятига сингдирилади.

Йиғилишда ногиронлиги бўлган шахсларни қўллаб-қувватлаш тизимини янада такомиллаштириш ҳамда уларнинг ҳуқуқ ва эркинликларини ҳимоя қилиш кафолатларини кучайтириш бўйича комплекс чора-тадбирлар дастурини амалга ошириш борасида ҳамкорлик масалалари келишиб олинди.



Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.