17.04.2018

ТЕМИР ЙЎЛ ВА АВИАЧИПТАЛАР НАРХЛАРИГА 20 ФОИЗГАЧА ЧЕГИРМА

Бандлик ва меҳнат муносабатлари вазирлиги ёшларни ишга жойлаштириш самарадорлигини ошириш, хорижий давлатларда меҳнат қилаётганларнинг ҳуқуқларини ҳимоя қилиш, хорижга ишга юбориш тизими шаффофлигини таъминлаш масалалари ҳақида матбуот анжумани ўтказди.

— Жорий йилнинг январь-март ойларида туман, шаҳар аҳоли банд­лигига кўмаклашиш марказларига иш сўраб мурожаат қилган 122,5 минг нафар фуқародан 53,8 минг нафари доимий ишга жойлашишига кўмаклашилди, 62,6 минг нафар ишсиз фуқаро ҳақ тўланадиган жамоат ишларига жалб этилди, — дейди Бандлик ва меҳнат муносабатлари вазири ўринбосари Баҳодир ­Низомов. — Шунингдек, 297 маротаба бўш иш ўринлари ярмаркаси ташкил этилиб, уларда 15,2 мингга яқин иш берувчилар вакиллари ҳамда 46 мингдан ортиқ иш қидираётган фуқаро иштирок этди. Ўтказилган ушбу ярмаркалар натижасида 10,1 минг нафар фуқаро ишга жойлашди.

Бундан ташқари, 3,3 мингдан ортиқ ишсиз фуқаро тикувчилик, тўқувчилик, электрик, пайвандчилик, бўёқчилик, сувоқчилик, компьютер техникаси оператори ва бош­қа шу каби меҳнат бозорида талаб юқори бўлган мутахассисликлар бўйича касбларга ўқитилди.

— Агентлигимиз томонидан Россия Федерацияси, Польша, Жанубий Корея ва Япония давлатлари билан ташқи меҳнат миграцияси соҳасида фаол ҳамкорлик йўлга қўйилди, — дейди ­Ташқи меҳнат миграцияси агентлиги бошлиғи Равшан ­Ибрагимов. — Шунингдек, Қозоғистон, Туркия, Омон Султонлиги, Бирлашган Араб Амирликлари ва бошқа кўплаб мамлакатлар билан ҳамкорликни йўлга қўйиш, ўзаро англашув меморандумларини имзолаш бўйича керакли ишлар олиб борилмоқда. Ташқи меҳнат миграцияси масалалари бўйича хал­қаро тажриба ўрганилмоқда.

Хорижда ишлаш ниятини билдираётган фуқаролар учун зарур шароитларни яратишга алоҳида эътибор қаратилмоқда. Вилоятларда агентликнинг тўртта минтақавий бюроси фаолият юритган бўлса, бугунга келиб барча вилоятларда ва Қорақалпоғистон Республикасида филиаллар очилди. Японияга кетувчи фуқароларни кетиш олдидан ўқитиш ва кўниктириш маркази иш бошлади. Ушбу марказ Японияга кетадиганларга бошланғич таълим бериш билан бирга, япон тили, мадания­ти, қонунларини ўргатишда яқиндан ёрдам беради.

Санк-Петербург «Меҳнат ре­сурс­лари маркази» муассасаси билан ҳамкорликда меҳнат мигрантларини кетиш олдидан тайёрлаш ва Россияга юбориш бўйича ­Самарқанд маркази ташкил қилиш юзасидан меморандум имзоланди. Ушбу марказ ишга тушди, тест синовлари, тиббий кўрик, патент олиш масалалари марказда ҳал этиляпти. Ҳозирда шундай марказнинг Фарғона вилоятида очилишини тезлаштириш бўйича саъй-ҳаракатлар амалга оширилмоқда.

Президентимизнинг жорий йил 5 мартдаги қарорининг ижроси юзасидан «Ўзбекистон темир йўллари» АЖ ва «Ўзбекистон ҳаво йўллари» МАК томонидан вақтинчалик меҳнат фаолия­тини амалга ошириш учун республикадан ташқарига чиқаётган фуқароларга плацкарт ва умумий вагонларга темир йўл чипталари ҳамда иқтисодий, яъни эконом класс авиачипталар нархларига 20 фоизгача чегирма тақдим этадиган, темир йўл ва авиачипта харид қилиш харажатларини қисман қоплаш учун 300 минг сўм миқдорида беғараз тўлов бир йилда бир марта амалга ошириладиган имтиёзли билетларни тақдим этиш учун барча маъмурий ҳудудларда махсус кассалар ташкил этилиб, иш бошлади.

Имтиёзли тарифларда чипта тақдим этишнинг шаффофлигини таъминлаш мақсадида элек­трон маълумотлар базаси яратилди. Агентликка муро­жаат қилган фуқаронинг бўлғуси иш жойи, йўл маршрути ва кетиш истагидаги санаси кўрсатилган ҳолда қайд этилади. Агентлик ўша куниёқ фуқаро ҳақидаги маълумотларни валюта ҳисоби очиш учун ва махсус «VIZA-migrant» карталари бериш учун «Алоқабанк»ка ва агентлик қошидаги темир йўл чипталари ва авиабилетларни бронлаш ҳамда сотишга ихтисослашган кассаларга йўллайди. Шундан сўнг уч ёки тўрт иш кунида фуқарони билет сотиладиган манзил ва кетиш санаси ҳақида хабардор қилади. Ушбу маълумотларни олган фуқаро ихтисослашган кассага мурожаат қилади ва касса ўша куннинг ўзидаёқ имтиёзли билет, яъни 20 фоиз ҳамда 300 минг сўмлик чегирмаларни ҳисобга олган ҳолда билет сотади. «Алоқабанк» эса меҳнат мигрантига бир иш кунида валюта ҳисоб рақами очади ва «VIZA-migrant» пластик картасини беради. Меҳнат мигрантлари транспорт ва бошқа харажатлар учун «Ипотека-банк» орқали 1000 АҚШ долларигача кредит олишлари мумкиндир.

Шунингдек, тадбирда вазирликнинг туман, шаҳар бандликка кўмаклашиш марказлари тузилмасида умумий 300 штат бирлигида вақтинчалик меҳнат фаолиятини амалга ошириш учун республика ташқарисига чиқаётган фуқаролар билан ишлаш секторлари ташкил этилгани, секторлар ходимлари уйма-уй юриб, яратилган имтиёзлар тўғрисида тушунтириш бераётгани айтиб ўтилди.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.