10.04.2018

«БУ УЙ БИЗНИКИМИ, ОЙИЖОН?!»

Ғиждувонлик Ҳулкар Шариповани тақдир кўп синовдан ўтказди. 5 нафар фарзандига ҳам ота, ҳам она бўлиб, камтарингина ҳаёт кечирди. Кичкинагина ҳовлида 11 жон истиқомат қиларди.

Фарзандларини бағрига босганча «қачон бизнинг ўз уйимиз бўлар экан?», дея Яратганга ёлворарди. Иккинчи фарзанди ногирон туғилди, бунинг устига бевақт ўлим турмуш ўртоғини оила бағридан юлиб кетди. Бу синовлар унга қаттиқ зарба бўлди. Аммо фарзандларининг бахтини ўйлаб, ўзини қўлга олди. Меҳр тошқини дарёдан кучли, деганлари рост экан: ҳаётга чексиз муҳаббати уни турмуш чорраҳаларида қўллади.

— 2017 йил ҳаётимда энг яхши йил сифатида эсда қоладиган бўлди, — дейди Ҳулкар Шарипова биз билан суҳбатда. — Яхши кунлар бор экан. Туман ҳокимлигидан ижтимоий ҳимояга муҳтож, боқувчисини йўқотган, ногирон фарзанди бор оилаларни қўллаб-қувватлаш мақсадида янги қурилган уйлардан сизларга ҳам берилади, уйнинг бошланғич бадали эса Президентимиз совғаси бўлади, дейишганида аввалига ишонмадим. Янги йил арафасида вилоят ҳокими янги уйнинг калитини топширганида, ишонасизми, худди туш кўраётгандек бўлдим, қувонганимдан йиғлаб юбордим. Орзуим ушалиб, болаларим билан «Позагари» ҚФЙ ҳудудида қурилган уч хонали намунали уйга кўчиб ўтдик. Узоқ муддатли имтиёзли кредит, бу ерда яратилган қулайликлар бизни беҳад қувонтирмоқда.

Айниқса, янги уй учун музлатгич, телевизор, мебелларни беришганида болаларимнинг хурсандлигини кўрсангиз эди. «Бу уй бизникими, булар ҳаммаси бизникими, ойижон?», дейишганида иккиландим ҳам. Ҳа, десам, эртага олиб кетишса-чи, пулини тўла, тейишсачи, деган ўйга ҳам бордим.

Туман раҳбарияти «Бу совғалар ҳаммаси сизлар учун», дейишганидан сўнг Ҳулкар Шарипова қувончи ичига сиғмай яна кўзларига ёш келади. Бу ғамхўрликдан, рағбатдан боши осмонга етди. Ногирон фарзандини даволатиш учун республика муассасасига йўлланма берилгани эса яна бир қувончли воқеа бўлди.

— Бундай эътибор учун беҳад миннатдормиз, — дейди у. — Янги уйга янги орзулар билан қадам қўярканман, шу элнинг фарзанди эканимдан фахрландим, меҳр-мурувватнинг, яхшиликнинг тафтини туйдим. Шундан кейин ҳаётим бутунлай ўзгарди. Умид билан, орзу билан яшашни ўргандим...

 

Шаҳло БАҚОЕВА



DB query error.
Please try later.