10.04.2018

ДЕПУТАТЛИК ГУРУҲИ ҚАРОР ИЖРОСИНИ ЎРГАНДИ

Бағрикенглик, инсонпарварлик ва меҳр-мурувват кўрсатиш халқимизга хос анъаналардан ҳисобланади. Бугунги кунда ҳам ана шундай ўлмас қадриятлар янада равнақ топиб, давлатимиз сиёсатининг устувор йўналишларидан бирига айланди. Президентимиз аҳолининг эҳтиёжманд қатламларига тиббий-ижтимоий ёрдам кўрсатиш тизимини такомиллаштириш бўйича ташкилий чора-тадбирлар тўғрисидаги қарори бу борада ўзига хос янгилик бўлди.

Бу тарихий ҳужжатда белгиланган устувор вазифалар ижроси қандай амалга ошириляпти? Тиббий ва ижтимоий хизматлардан юртдошларимизнинг кўнгли тўляптими? Халқ депутатлари Шўрчи тумани Кенгашидаги Ўзбекистон ХДП гуруҳи томонидан ушбу масала атрофлича ўрганилди.

— Туманимизда 200 минг нафардан ортиқ аҳоли истиқомат қилмоқда, – дейди халқ депутатлари Шўрчи туман Кенгашидаги Ўзбекистон ХДП гуруҳи аъзоси Сайёра Абрайқулова. – Ўтган асрнинг 70-80 йилларида қурилган тиббий муассасалар бугунги кун талабига жавоб бермай қолганди. Шуни эътиборга олиб, туман тиббиёт бирлашмаси тасарруфидаги ўнга яқин бўлим қайта таъмирланди. Қишлоқ оилавий поликлиникалари замонавий асбоб-ускуналар билан жиҳозланди.

Қарордан кейин туманимизда ҳам тиббий-ижтимоий ёрдам кўрсатиш бўйича бўлим иш бошлади. Ўтган йил мобайнида бўлим томонидан 800 нафарга яқин киши турли йўналишда қўллаб-қувватланди. Жумладан, 115 киши ногиронлик аравачаси, 17 киши эшитиш мосламаси билан таъминланди. 200 нафардан ортиқ юртдошимиз қўлтиқтаёқ, махсус ҳасса ва бошқа воситаларга эга бўлишди.

— Туманимизда тиббий ва ижтимоий соҳада айрим муаммолар бор, — дейди Шўрчи туман Кенгашидаги Ўзбекистон ХДП гуруҳи аъзоси Гулмирза Норбоев. — Бугунги кунда аҳолининг 16 минг нафардан ортиғини пенсионерлар, ногиронлиги бўлган шахслар, уруш қатнашчилари ҳамда меҳнат фахрийлари ташкил қилади. Ўтган беш йил давомида 100 га яқин киши ногиронлик аравачаси, эшитиш мосламаси ва турли воситалар билан таъминланган бўлса, 2017 йилда бу кўрсаткич қарийб 350 тани ташкил қилгани қувонарли, албатта. Аммо ҳозирги кунда яна 150 нафарга яқин юртдошимиз тиббий ускуна ва жиҳозларга эҳтиёж сезмоқда. Долзарб масалани бартараф қилиш учун саховатпеша ҳомийлар жалб қилинса, мақсадга мувофиқ бўларди.

Шу ўринда яна бир масала хусусида тўхталмоқчиман. Шўрчи туман молия бўлими мутасаддиларининг лоқайдлиги туфайли 2017 йилда тегишли хизматлар ва интернет тармоғи тўлови учун бўлимга зарур маблағ ажратилмаган.

 — Иш бор жойда камчилик бўлиши табиий, — дейди Шўрчи туман тиббий-ижтимоий ёрдам кўрсатиш бўйича бўлим бошлиғи Тоҳир Садриддинов. – 2016 йилнинг баҳорида фаолият бошлаган бўлсак, аввалига турли ҳолатларга дуч келдик. Ҳамкор ташкилотлар билан мустаҳкам алоқа ўрнатилгач, муаммолар барҳам топа бошлади. Депутатларнинг кўмаги билан стол-стул, шкаф, телефон ва компьютер жамланмаси ажратилди. Реабилитация воситаларига эҳтиёж борлиги ҳақида туман ҳокимига мурожаат қилдик. Бу масала яқин кунларда ижобий ечим топишига ишонаман.

 — Туман ногиронлар жамияти томонидан эзгу ишлар амалга ошириб келинаётганди, — дейди Шўрчи туман Кенгашидаги Ўзбекистон ХДП гуруҳи аъзоси Тўйчи Жангиров. — Аммо уч-тўрт йил илгари унинг фаолияти тўхтаб қолди. Ўзбекистон ХДП туман Кенгаши ва туман тиббий-ижтимоий ёрдам кўрсатиш бўйича бўлим томонидан жамиятни қайта ташкил қилиш борасида туман ҳокимлигига таклифлар берилган. Аммо натижа йўқ, вақт эса ўтиб боряпти.

— Тўғрисини айтганда, тиббий-ижтимоий ёрдам кўрсатиш соҳасида бепарволикка берилган эканмиз, — дейди Ўзбекистон ХДП Шўрчи туман кенгаши раиси, туман Кенгашидаги партия гуруҳи раҳбари Ботиржон Ражабов. — Эътиборсизлик туфайли қатор камчиликларга йўл қўйилгани ҳақиқат. Шундай экан, эҳтиёжманд кишиларга ёрдам бериш, уларнинг ҳуқуқ ва манфаатларини ҳимоя қилиш фаолиятимиз мезонига айланиши керак. Депутатларимиз томонидан ўрганилган ушбу долзарб масала туман Кенгаши сессиясида атрофлича кўриб чиқилиши учун ҳаракат қиламиз.

 

Абдумалик ҲАЙДАРОВ,

«Ўзбекистон овози» мухбири.



DB query error.
Please try later.