05.04.2018

ТИНЧЛИККА УМИД УЙҒОНМОҚДА

Халқимизда «Қўшнинг тинч – сен тинч», деган азалий нақл бор. Бу ҳикмат ҳеч бир замонда эскирмайди. Ўтмишда ҳам қўшнилар билан тинч-тотув, ҳамжиҳатликда ҳаёт кечирилган. Ота-боболаримиз бу муқаддас каломни дил-дилидан ҳис этишиб, тинчлик ва осойишталикнинг қадрига етишган. Қўни-қўшничилик ришталарини мустаҳкам боғлаган аждодларимиз қўшни давлатлар тақдирига ҳам бефарқ қарашмаган.

Халқимизга тарихдан мерос бўлиб келаётган бу азалий анъананинг келажакда ҳам давом этишига шубҳа йўқ. Негаки, мамлакатимиз амалга ошираётган тинчлик сиёсати ана шундан далолат бериб турибди. Бу сиёсат кўп миллатли халқимиз томонидан қўллаб-қувватланмоқда.

Тошкент шаҳрида Афғонистон бўйича бўлиб ўтган «Тинчлик жараёни, хавфсизлик соҳасида ҳамкорлик ва минтақавий шериклик» мавзусидаги халқаро конференциянинг мақсади ҳам тинчлик ва осойишталикка хизмат қилишини алоҳида таъкидлаш жоиз.

Президентимиз БМТ Бош Ассамблеясининг 72-сессиясида минтақавий хавфсизлик ва барқарорликни таъминлашга доир Ўзбекистон позициясини батафсил баён қилганди. Самарқанд шаҳрида бўлиб ўтган «Марказий Осиё: ягона тарих ва умумий келажак, барқарор ривожланиш ва тараққиёт йўлидаги ҳамкорлик» мавзусидаги конференцияда Марказий Осиё, жумладан, Афғонистонда мустаҳкам тинчлик ва барқарорликни таъминлаш бўйича кенг қамровли дастур қабул қилиш таклифи илгари сурилган эди.

Ҳақиқатдан ҳам Афғонистон Евроосиёнинг «юраги»да жойлашган Марказий Осиё Европа ва Яқин Шарқ, Жанубий ва Шарқий Осиёни боғловчи кўприкдир.

Қарийб 40 йилдан буён афғон халқи мамлакатдаги уруш ва бошқа можаролар туфайли рўшнолик нималигини билмай келмоқда. Бу даврда мамлакат катта йўқотишларга дуч келди. Ён қўшнимиз бўлган жафокаш афғон халқи мамлакатимиздаги тинчлик-осойишталик, тараққиёт ва ривожланишга ҳамиша ҳавас қилади. Ўзбекистон раҳбарияти эса Афғонистонда тинчлик ўрнатиш борасида доимий ташаббус кўрсатиб келмоқда. Тошкентда ўтказилган халқаро конференция бунинг яққол исботидир.

Конференция иштирокчилари Афғонистонда тинчлик ва хавфсизлик ўрнатилиши минтақада барқарорлик ва фаровонликни таъминлаш ҳамда афғон халқининг азоб-уқубатларига чек қўйишда салмоқли аҳамиятга эга эканлигини тасдиқлашди.

Шунингдек, Афғонистоннинг мустақиллиги, ҳудудий яхлитлиги, миллий бирдамлиги, Афғонистон халқи ва ҳукуматининг ўз мамлакатида тинчлик, барқарорлик ва тараққиётни таъминлаш бўйича саъй-ҳаракатларни ҳурмат қилишларини билдиришди. Конференцияда толиблар билан муносабатларни сиёсий йўл билан ҳал этиш Афғонистонда зўравонликка барҳам беришнинг энг мақбул йўли эканлиги, Афғонистон ҳукуматининг «Толибон» билан тўғридан-тўғри музокараларни бошлаш бўйича саъй-ҳаракатларининг қўллаб-қувватланиши энг муҳим масала эканлиги таъкидланди.

Тошкент конференцияси халқаро миқёсда алоҳида эътироф этилмоқда. Афғонистон ҳаётида янги саҳифа очилишига умид уйғотмоқда.

 

Мажидхон УСМОНОВ,

ЎзХДП Самарқанд вилоят кенгаши раиси.


Фикр ва мулохазалар

Защита от автоматических сообщений

Сўнгги янгиликлар: