27.03.2018

ЎЗБЕКИСТОН ЎЗ ТАРАҚҚИЁТ ЙЎЛИГА ЭГА МАМЛАКАТ. УНИНГ ТАШАББУСИ ЭСА ЭЪТИРОФГА МУНОСИБ

Пойтахтимиз икки кун давомида йирик халқ­аро анжуманга мезбонлик қилади. Президентимиз Шавкат Мирзиёев ташаббуси билан ташкил этилаётган «Тинч­лик жараёни, хавфсизлик соҳасида ҳамкорлик ва минтақавий шериклик» мавзусида Афғонистон бўйича юқори даражадаги Тошкент халқаро конференцияси доирасида ЎзА мухбирлари анжуман иштирокчиларининг фикрлари билан қизиқди.

 

Ибрат ЖУМАБОЕВ (Ибрат Сафо), BBC мухбири:

— Халқаро ҳамжамият эътиборини тортган ушбу анжуман Афғонистонда тинчликка эришиш жараёни, хавфсизлик масалаларига қаратилган. Бу биргина давлатнинг иши эмаслиги, тинчлик ҳамма учун, дунё аҳли учун ҳаётий муҳим масала эканини ҳисобга олсак, анжуманнинг аҳамияти янада ортади. Конференцияни тинчликка эришиш йўлидаги жуда улкан ҳаракат деб ҳисоблайман. Ўзбекистон айни эзгу ҳаракатга бошчилик қилаётгани ҳар қанча таҳсинга сазовор.

Бу эса Ўзбекистоннинг қўшни Афғонистондаги мувозанатли ҳаётга, у ерда тинчлик ўрнатиш жараёнига бефарқ эмаслигини кўрсатади. Ўзбекистонда бу каби конференциянинг ташкил этилиши ва уни кенг оммага ёритишнинг тизимли йўлга қўйилгани биз, журналистларни қувонтиради. Бу жараёнда журналистлар учун яратилган имкониятлардан унумли фойдалан­япмиз.

 

Меҳмет ЖОНПЎЛАТ, Туркия телерадиокомпаниясининг Ўзбекистондаги ваколатхонаси мухбири:

— Ўзбекистоннинг қўшни давлатлар билан турли соҳалардаги ўзаро ҳамкорликни мустаҳкамлаш борасида олиб бораётган ишлари, уларнинг ижтимоий, иқтисодий, сиёсий жиҳатдан ривожланишига бефарқ эмаслиги эътиборга молик. Ҳар қандай давлат учун тинчликнинг аҳамияти юксак. Қаерда тинчлик бўлса, ўша ерда ҳар томонлама ривожланиш бўлади, мамлакат тараққиётга эришади. Президент Шавкат Мирзиёев ташаббуси билан ташкил этилаётган конференция икки қўшни давлат учун ҳам юксак аҳамиятга эга эканини таъкидлаш жоиз. Бу саъй-ҳаракатлар ўзаро алоқаларни мус­таҳкамлаш билан бирга, Афғонистондаги сиёсий вазиятни барқарорлаштиришга хизмат қилиши кутилмоқда. Зеро, тинч­лик иқтисодий барқарорликка эришиш ва жадал ривожланиш асосидир.

 

Гюнтер КНАБЕ, Германиянинг «Deutsche Welle» телерадиокомпанияси мухбири:

— Ўзбекистон Республикаси Президенти Шавкат Мирзиёев ўз ечимини кутиб турган масалалар доирасида Афғонистонда мустаҳкам тинчликка эришишга оид ғоят оламшумул таклифни ўртага ташлади. Дунё экспертлари, бевосита қўшни мамлакатлар эътиборини айни давлатга қаратиш орқали вазиятни тубдан таҳлил қилиб, барқарор тинчлик ва ривожланишга эришиш асосий вазифа этиб белгиланган. Ўзбекистон мезбонлик қилаётган ушбу конференция ўз самарасини беради, деб ўйлаймиз. Бутун дунё ҳамжамиятининг эътибори қаратилган анжуманда вазиятни ўрганиб, уни таҳлил қилиб, барқарор тинчликка эришиш йўлида муҳим қарорлар қабул қилиниши кутилмоқда. Айни вақтда бу воқеаларни жаҳон афкор оммаси кузатаётгани ушбу мамлакатлар тақдири барча учун муҳим эканидан далолатдир.

 

Даниил КИСЛОВ, Россиянинг «Фергана.ру» ахборот агент­лиги бош директори:

— Ўзбекистоннинг ҳар томонлама тараққий этаётганини эътироф этишдан мамнунман. Айниқса, унинг туристик жиҳатдан юксалаётгани мени ҳайратда қолдирди. Анчадан буён бу жаннатмонанд юртда бўлмагандим. Ўз тараққиёт йўлига эга бўлган ушбу давлатдаги ривожланиш, унинг қўшни мамлакатларга муносабати, Афғонистондаги вазиятга алоҳида эътибор билан ёндашуви мени журналист сифатида жуда мамнун этади.

Айни вақтда бутун дунё экспертлари билан бирга журналистлар ҳам ушбу воқеани алоҳида эътибор билан кузатмоқда. Чунки қўшни давлатда тинчлик ва осойишталик ўрнатишга қаратилган қатор ташаббуслар билан чиқиб, турли лойиҳа ва анжуманларга бош бўлаётган Ўзбекистон кўплаб мамлакатлар билан мустаҳкам ҳамкорлик алоқаларига эга. Бу ташаббус унинг ўз принциплари, тизимли тараққиёт режасига эга давлат эканидан далолат.

Бу анжуман кейинчалик ҳам ташкил этиладиган бир қатор хайрли ишларнинг, кўп томонлама ҳамкорликнинг асоси бўлиб хизмат қилишига ишонаман.

 

Муҳаммет ЭНЕС ПЎЛАТ, Туркия телерадиокомпанияси мухбири:

— Ўзбекистон — жуда юксак салоҳиятга эга мамлакат. Имкониятлари жуда кенг. Шу билан бирга, ташаббуслари ҳам халқаро миқёсда ғоят аҳамиятли. Қўни-қўшничилик муносабатларига жиддий ёндашуви бошқа давлатларга ўрнак бўлгулик даражада. Марказий Осиё минтақасида барқарорликни таъминлаш, мамлакатларнинг ўзаро савдо-иқтисодий ва инфратузилмавий муносабатларини тизимли йўлга қўйишдан кўплаб давлатлар бирдек манфаатдор.

Афғонистонда узоқ вақтдан буён давом этиб келаётган турли низолар кўплаб давлатларни ташвишга солади. Албатта, биргина конференция доирасида ушбу муаммо ҳал бўлмаслиги мумкин. Аммо бу каби эзгу ишларнинг ҳамкорликда ва тизимли давом эттирилиши, қабул қилинадиган қарорлар, таклифлар, албатта, ўз самарасини беради, деб ўйлайман. Ушбу анжуман давомида хавфсизлик масалалари, тинчлик ва фаровонликка эришиш, уни ҳал этишнинг муносиб ва ўзаро манфаатли йўлларини топиш, ўзаро ҳамкорликни ривожлантиришга ҳаракат қилинади. Бу масалаларнинг натижаси биз учун муҳим.

 

Барно МЕЛИҚУЛОВА,

Улуғбек ШОНАЗАРОВ

ёзиб олди.



DB query error.
Please try later.