Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
22.03.2018

ЭЗГУЛИКНИ УЛУҒЛАГАН АЙЁМ

Баҳор келиши билан юртимизда байрамлар бошланади. Уйғониш фаслида жисму жонимиз яшнаш, яшариш ишқида ёнади. Варрак учирган болакайлар қийқириғи ложувард уфққа қадар етади. Сочларига толбаргак таққан қиз-жувонлар алёридан олам мунаввар, момоларнинг чеҳраси чароғон. Кунгайларда ўтирган боболарнинг гурунглари авжида.

Наврўз нафаси кўзларда, юзларда намоён. Қалбларни қувончга тўлдирган бу айём сайиллари ҳар гўшада давом этаяпти. Чунки Наврўз шунчаки оддий байрам эмас, бу — халқ билан улғайиб, не-не синовларни бошидан ўтказган ва тараққий этиб келаётган улуғ айёмдир.

Бу байрамнинг ибтидосида эзгулик ғояси, зулмат устидан ғолиб келган ёруғлик тантанаси ётибди, — дейди Ўзбекис­тон Фанлар Академияси Алишер ­Навоий номидаги Тил ва адабиёт инс­титути етакчи илмий ходими, филология фанлари доктори Жаббор ­Эшонқул. — Азалдан бу шукуҳли лаҳзаларда урушлар тўхтаган, тартибсизликларга барҳам берилган. Турли миллат ва элатлар орасидаги ришталар қайта боғланган. Инсонлар муқаддас деб билган тушунчаларини, туйғуларини асраган. Шунинг учун ҳам унинг қадри осмон қадар баланд, баҳоси йўқ.

Жамиятда табора қадр топиб бораётган бу айём эндиликда янада янгича мазмун-моҳият касб этмоқда. Бобо ва момоларимиздан қолган анъаналар сайқал топмоқда. Эҳтиёжмандга ёрдам қўлини чўзиш, бир-бирига яхшилик тилаш, елкадошлик фазилатлари кучайиб бормоқда.

Аслида, одам боласига кўп нарса керак эмас, унинг эркинлиги қўлида бўлса бас, муқаддас туйғулари топталмаса бўл­гани. Шунда у тинч ва фаровон ҳаёт кечиради, сўзи маъноли бўлади, қадамидан ўт чақнайди, ҳаётига мазмун киради. Уни ҳеч ким енголмайди.

Бугун ўзлигини англаган, ҳурлиги, эркинлиги қўлида бўлган миллат байрами. Қаерга борсангиз, дошқозонда сумалак, ҳалим қайнаяпти. Бундай урф-одатлар, удумлар, анъаналар халқ ҳаётининг ажралмас қис­ми эканини юракдан ҳис қиласиз.

Шу фикрларни қоғозга тушираётганимда, Самарқанднинг чекка Қўшробод туманида яшовчи Зокир тоғам телефон қилиб қолди. Дилим равшан тортди. Содда ва дўлвор тоғам қувончи ичига сиғмаганида, нимадандир ҳайратланганида, дилидаги бор гапни айтиш одоби бор. Наврўз билан табриклади, қўнғироқ қилмаганимга бироз гина ҳам қилди.

Жиян, бизда ҳам катта байрам бошланди. Ҳар бир қишлоқда, қир-адрда байрам тадбирлари ўтаяпти. Яна дегин, Қозоғистон Президенти Нурсултон Назарбаев­нинг Самарқандга келгани, Наврўз байрамида қатнашганини телевизордан томоша қилдим, самимийлик, биродарлик тимсолини кўрдим, тўғриси, кўзларимдан ёш чиқиб кетди. Биз азалдан бир-бирига елкадош, бир-бирига яхшилик соғинган халқ­миз...

Тоғам тўлиб-тошиб гапирди, жўшиб-жў­шиб сўзлади. У ҳақ эканини юрак-юракдан ҳис этиб турардим...



Аслиддин СУЮНОВ



DB query error.
Please try later.