27.02.2018

ЯНГИ ИШ ЎРИНЛАРИ — ФАРОВОНЛИК КАФОЛАТИ

Сурхондарё вилоятида ўтган йили саноат, хизмат кўрсатиш, қишлоқ хўжалиги маҳсулотларини қайта ишлаш, кичик бизнес ва хусусий тадбиркорлик, халқ истеъмоли моллари ишлаб чиқариш, озиқ-овқат ва ноозиқ-овқат маҳсулотлари тайёрлаш ва бошқа соҳалар бўйича 1880 дан ортиқ лойиҳа амалга оширилиши нитижасида 67 мингга яқин янги иш ўрни яратилди. Фаол тадбиркорлик, инновацион ғоялар ва технологияларни қўллаб-қувватлаш йилида умумий қиймати 3 триллион 991 миллиард сўмдан ортиқ 1945 лойиҳа амалга оширилиши кўзда тутилмоқда.

Давлатимиз раҳбари вилоятимизга ташрифи чоғида аҳоли фаровонлигини ошириш учун ишлаб чиқаришни кенгайтириш, қўшма корхоналар ташкил қилиш, йирик завод ва фабрикаларни ишга тушириш борасида кўплаб таклифлар билдирди. Ҳудудларнинг иқтисодий салоҳия­тидан келиб чиққан ҳолда, боғдорчилик, асаларичилик каби соҳаларни ривожлантириш давр талаби эканлигига эътибор қаратилди.

Президентимиз «ASG Group» корхоналар уюшмасига қарашли «Жарқўрғон мева-сабзавот экспорт» масъулияти чекланган жамиятида амалга оширилаётган ишлар билан яқиндан танишар экан, 2016-2017 йилларда 74 миллион долларлик қишлоқ хўжалиги маҳсулотлари экспорт этилганини эътироф қилди. Жорий йилда эса экспорт ҳажмини 150 миллион долларга етказиш мўлжалланаётгани қайд этилди. Келгусида Денов, ­Сариосиё, Олтинсой, Ангор, Музработ туманларида йирик логистика марказларини ишга тушириш бўйича амалий таклифлар билдирилди.

Бу борада Россия, Швейцария, ­Малайзия, Хитой, АҚШ каби ривожланган мамлакатлар билан қўшма корхоналар ташкил қилинаётгани айни муддао бўлмоқда. Яқин келажакда Бойсун туманида умумий қиймати 5,2 миллиард долларни ташкил этадиган газ-кимё комплекси фойдаланишга топширилса, ­Шеробод туманида 213,0 миллион долларга тенг бўлган цемент заводи қурилиши изчиллик билан давом эттирилади. Ушбу мажмуа йилига 1,5 миллион тонна цемент ишлаб чиқариш қувватига эга бўлиши кутиляпти. Вилоятда газ таъминотини яхшилаш, қурилиш ишларини жадаллаштиришда бу лойиҳаларнинг аҳамияти беқиёс. Албатта бундай лойиҳалар бозорни сифатли маҳсулот билан таъминлаш баробарида қўшни давлатларга экспорт имкониятини ҳам оширади.

Сурхон воҳасининг табиий иқлими тўқимачилик саноатига хомашё етиштириш учун қулай. Юртимизда хорижий сармоядорлар учун қатор имтиёз ва преференциялар қўлланилаётгани соҳа ривожида муҳим омил бўлмоқда. Жорий йилда ишга тушириладиган «Амудар Текс» Ўзбекистон — Англия қўшма корхонасида йилига 7 минг тонна ип-калава ишлаб чиқарилади. Бундан ташқари, «Жануб текстиль» МЧЖда 5 минг тоннадан ортиқ, Шеробод туманидаги «Sherobod textile invest» МЧЖда эса 17 минг тоннагача ип-калава ишлаб чиқариш имконияти яратилади.

Бу лойиҳаларнинг энг катта аҳамияти нимада? Ушбу саволга мен янги ва барқарор иш ўринлари, деб жавоб берган бўлардим. Одамлар иш билан таъминланган жойда фаровонлик бўлади.

 

Бахтиёр АҲРОРОВ,

Денов тоғ-кон саноати касб-ҳунар коллежи директори, халқ депутатлари вилоят Кенгашидаги ЎзХДП гуруҳи аъзоси.



DB query error.
Please try later.