08.02.2018

ДАВЛАТ ДАСТУРИ АСОСИДА

фракция иш режаси ишлаб чиқилди

Ўзбекистон ХДП Олий Мажлис Қонунчилик палатасидаги фракциясининг навбатдаги йиғилиши бўлиб ўтди.

Унда Ҳаракатлар стратегиясини «Фаол тадбиркорлик, инновацион ғоялар ва технологияларни қўллаб-қувватлаш йили»да амалга оширишга оид Давлат дастури ижросини таъминлашда фракциянинг ўрни ва роли, олдида турган вазифалар атрофлича муҳокама қилинди. Хусусан, фракция фаолия­тининг 2018 йилга мўлжалланган асосий йўналишлари бўйича Иш режаси ишлаб чиқилгани ва унга Давлат дастури асосида тегишли ўзгартиришлар киритилгани хусусида атрофлича маълумот берилди.

Иш режа 6 бўлим, 45 банддан иборат. Фракциянинг ташкилий-ҳуқуқий фаолияти бўлимида сифатли тиббий хизмат кўрсатиш ва аҳолини арзон дори-дармон воситалари билан таъминлаш масалаларини таҳлил қилиб бориш белгилаб қўйилган. Унга кўра, жорий йилда фракция аъзолари ҳудудлардаги реал ҳолатни ўрганиш жараёнида мазкур масалани атроф­лича таҳлил этади. Натижалар умумлаштирилиб, тегишли вазирлик ва идоралар билан муҳокама қилинади ҳамда ахборотлар мунтазам ёритиб борилади.

Фракция Давлат дастурида кўзда тутилган қонунчилик билан боғлиқ вазифалар ижросига алоҳида эътибор қаратади. Ўрганиш ҳамда таклифларни шакллантириш ишлари бошлаб юборилган.

Бундан ташқари, партия дастурий мақсадларидан келиб чиқиб, тегишли вазирликлар билан меморандумлар имзоланди. Бугунги кунда қонун лойиҳалари ана шу ҳамкорлик асосида яратилмоқда. Масъул депутатларга жамоатчилик муҳокамаларини ташкил этиш юзасидан партия Марказий Кенгаши билан ҳамкорликда тадбирлар режасини ишлаб чиқиш вазифаси юклатилди. Бу масалада маҳаллий Кенгашлардаги ижрочи котиблар масъулиятини ошириш бўйича кўрсатмалар берилди.

Йиғилишда фракциянинг назорат-таҳлил фаолияти билан боғлиқ масала атрофлича таҳлил қилинди. Мазкур соҳада Иш режада 8 устувор масала белгиланган бўлиб, «Ногиронлиги бўлган шахсларни давлат томонидан қўллаб-қувватлаш тизимини тубдан такомиллаштириш чора-тадбирлари тўғрисида»ги Президент фармони ҳамда «Меҳнатни муҳофаза қилиш тўғрисида»ги қонун ижроси маҳаллий Кенгашлардаги партия гуруҳлари билан ҳамкорликда ўрганилиши таъкидланди. Давлат бюджетидан ижтимоий соҳага, хусусан, эҳтиёжманд оилаларга ажратилаётган нафақалар, таълим, пенсия, соғлиқни сақлаш соҳаларида маблағларнинг самарали ишлатилиши устидан депутатлик назорати йўлга қўйилади.

Белгиланган вазифаларга шунчаки ҳисобот тайёрлаш учун эмас, амалда ўзгаришга эришиш нуқтаи назаридан ёндашиш зарурлиги қайд этилди.

 

Ўз мухбиримиз.



DB query error.
Please try later.