18.01.2018

МАХСУС МАКТАБ-ИНТЕРНАТДАГИ ШАРОИТДАН КЎНГИЛ ТЎЛАДИМИ?

Мамлакатимизда ёш авлоднинг замон талаблари даражасида таълим-тарбия олиши, касб-ҳунар ўрганиши учун барча шароит яратиб берилмоқда. Шаҳар ва қишлоқларда ҳар томонлама қулай таълим муассасалари бунёд этилиб, мавжудлари тегишли дастурлар асосида капитал ва жорий таъмирланаётир. Ўқув ва лаборатория қуроллари, компьютер ва мебель жиҳозлари билан таъминлаш ҳам муаммо эмас. Гап ушбу имкониятлардан унумли фойдаланиш, ўқиш сифати ва самарадорлигини оширишда.

Самарқанд вилояти Оқдарё туманидаги 63-махсус ёрдамчи мактаб-интернатида ҳам болалар учун давлатимиз томонидан зарур шароит ва имкониятлар яратилган. Вилоят халқ таълими бошқармасига қарашли ушбу таълим муассасасида бугунги кунда 297 нафар ўқувчи таҳсил олаётир. Уларга 106 нафар ўқитувчи ва тарбиячи сабоқ беради.

Муассаса раҳбари М.Саидмуродовнинг айтишича, дастур асосида 2013 йилда мактаб ётоқхонаси таъмирланиб, ўқувчилар учун замонавий қулайликлар яратилган. Табиий газ ва кўмир билан иситишга мўлжалланган қозонхона ўрнатилган. Газ босими пасайганда кўмирдан фойдаланилар экан. Ўтган йили эса 1 миллиард 200 миллион сўм маблағ сарфланиб, ўқув биноси ва спорт зали капитал таъмирланган. Бино иситиш тизими янгиланган. Жорий мавсум учун мактабга 69 тонна кўмир ажратилган. Лекин айрим синфларда ўқитувчи ва ўқувчилар пальтода ўтиргани бинонинг етарли даражада иситилмаётганини кўрсатади.

Мактаб ҳовлисида ташкил этилган иккита иссиқхонада бугунги кунда кўкат ва лимон парваришланаётгани эътиборга лойиқ, албатта. Аммо ана шу катта ҳовлидаги болалар майдончалари ва спорт майдонларининг қаровсизлиги, маънан эскирган қурилмалардан фойдаланилаётгани тушунарсиз. Ётоқхона биноси олдидаги болалар майдончасидаги ўтирғич ва ўйин қурилмалари аллақачон яроқсиз ҳолга келиб қолган. Йўлаклар четидаги панжараларга болаларнинг ювилган кийим-кечаклари илиб қўйилганини кўриб, наҳотки муассасада кирхона бўлмаса, деган савол ўтди кўнглимиздан. Кирхона бор экан, бунинг устига замонавий ювиш, қуритиш, дазмоллаш ускуналари ҳам ўрнатилган. Шундай имконият бўлатуриб, нега кир ташқарида қуритилмоқда, деган саволимизга кирхона бекалари «бу тарбиячиларнинг иши-да» деб жавоб беришди.

Ҳовлидаги ҳожатхона антисанитария ҳолатида бўлиши баробарида, болаларнинг юз-қўл ювишига мўлжалланган воситалар ҳам ўтган асрдан мерос қолган эскича усулда — сув қувури бир неча жойидан тешиб қўйилган, холос. Энг ёмони, мактаб ҳудудидаги нечта сув жўмрагини кўрган бўлсак, барчасидан тоза ичимлик суви оқиб ётган эди. Мактаб учун алоҳида артезиан қудуғи мавжуд ва ичимлик сувидан муаммо йўқ. Лекин бу ушбу азиз неъматни исроф қилиш керак, дегани эмас-ку?!

Муассаса ходимлари ётоқхонада ҳар томонлама қулай ҳожатхона, ювиниш хоналари борлигини айтишди ва қулфланган бу хоналарни очиб кўрсатишди. Ҳақиқатдан ҳам, сув иситиш воситалари ўрнатилган. Лекин улардан қачон фойдаланилади, юз-қўл ювишга мўлжалланган битта нуқтадан (унда ҳам иссиқ сув йўқ) бир вақтда нечта бола фойдалана олади — буниси бизга қоронғулигича қолди

Ётоқхоналарда диванлар қўйилган. Аммо бу ерда кийим-кечак, шахсий гигиена воситаларини сақлаш имконияти йўқ. Маcъуллар бу воситалар ҳар бир гуруҳнинг ишчи хонасида сақланишини айтишди. Лекин биз кўрган битта ишчи хонада ҳам кийим-кечак сақлаш учун шкаф, амалда фойдаланилаётган шахсий гигиена ашёлари тўлиқ эмас эди. Бошқа ишчи хоналар калити тарбиячиларда экани сабабли уларни кўришнинг имкони бўлмади.

Ўғил болаларга мўлжалланган учинчи қаватда бирорта ҳам ишчи хона йўқ. Бундан шундай хулоса чиқадики, бу қаватда турадиган ўқувчилар сочиғи, совун ёки тиш пастасини олиш учун биринчи ёки иккинчи қаватга тушиши керак.

Ошхонага киришда ўқувчилар кийимини ечиб қўйишлари учун шкаф ёки илгичлар йўқ. Бу ерда ҳам қўл ювиш воситалари мавжуд, аммо улардан яқин орада фойдаланилмагани шундоқ кўриниб турибди.

Ўқувчилар саломатлигини доимий назорат қилиш учун муассасада икки шифокор ва икки ҳамшира фаолият кўрсатар экан. Биз муассасада бўлганимизда, афсуски, бир нафар ҳамширадан бошқа ҳеч ким йўқ эди.

Кўрганларимиз, эшитганларимиздан шундай хулоса қилиш мумкин: мактабда ўқувчиларнинг таълим-тарбия олиши учун давлат томонидан нимаики зарур бўлса, яратилган. Лекин, муассаса жамоаси-чи? Шунга муносибми?! Очиғи, бу саволга тасдиқ жавобини бериш қийин. Шундай экан, жамоа ҳам замон талаби даражасида ишлаши, янгиликка интилиши, ташаббус кўрсатиши ва энг муҳими, ўқувчиларни ўз фарзандидек кўриши лозим. Инсон ўз фарзандига фақат яхшиликни, қулайлик яратишни истайди, унинг келажагини ўйлайди-да.

 

Ғолиб ҲАСАНОВ,

ЎзА мухбири.



DB query error.
Please try later.