01.01.2018

ОДАМЛАР БИЛАН ҲАМФИКР БЎЛАЙЛИК

Кечагина барчамиз катта ҳаяжон ва қувонч билан кутиб олган Халқ билан мулоқот ва инсон манфаатлари йилини ҳам ортда қолдирдик. 2017 йил юртимизда барча соҳада катта ютуқларга эришилди, деб бемалол айтишимиз мумкин. Кўплаб соҳаларда самарали ишлар қилинди. Амалга оширилаётган ислоҳотлар ҳар бир юртдошимизнинг ҳаётига, тақдирига, турмуши даражаси ошишига бевосита таъсир кўрсатмоқда.

Ўзбекистон Халқ демократик пар­тия­си ислоҳотларнинг ижтимоий самараси ошиб боришидан манфаатдор эканини намоён этиб, электорат фойдасига хизмат қиладиган муайян ишларни бажарди. Айниқса, ижтимоий ҳимоя, аҳоли бандлигини таъминлаш, ижтимоий-сиёсий фаолликни ошириш масалаларига алоҳида эътибор қаратилди.

2017 йилда депутатлар билан бирга 50 нафарга яқин пенсионер ҳолидан хабар олдик, 22 нафар ногиронлиги бўлган шахслар Ал-Ҳаким Ат-Термизий ҳамда Имом Абу Исо Ат-Термизий зиёратгоҳларига боришлари учун ҳомийлик ёрдами кўрсатилди.

Ўтган йили депутатларимиз фаолиятида оз бўлса-да, жонланиш сезилди. Қатор ижтимоий масалаларни ўрганиб, реал ҳолатдан хабардор бўлдик. Масалан, мактабгача таълим муассасалари фаолияти билан яқиндан танишиб, масалани сессияда танқидий кўриб чиқдик. Тўғриси, соҳада ечимини кутиб турган ­муаммолар оз эмас.

Ўтган йилдан бошлаб ҳудудларнинг ижтимоий-иқтисодий ривожланишини фаол қўллаб-қувватлаш масаласига эътибор кучайди. Маҳаллий ҳокимликларнинг ваколатларини кенгайтириш, маҳаллий бюджетларнинг даромадлар базасини ошириш масалаларида муҳим янгиликлар бўлди. Бир сўз билан айтганда, ислоҳотлар тақдири ҳудудларда ҳал бўлади, деган ёндашув ­устувор аҳамият касб этяпти. Бундай жараёнда маҳаллий Кенгашлар депутатлари зиммасидаги масъулият янада ошади.

Шунинг учун Президентимиз ўтган йил июль ойида парламент вакиллари билан ўтган видеоселектор йиғилишида ҳамда Олий Мажлисга Мурожаатномасида маҳаллий Кенгашлар фаолиятини кучайтириш ­масаласига алоҳида эътибор қаратди, бизга катта далда берди. Депутатларнинг мавқеи оширилди. Депутатлик сўровларига жавоб бериш мажбурий экани белгилаб қўйилди. Биз, депутатлар ана шу эътиборга муносиб натижалар билан жавоб қайтаришимиз, одамларнинг ишончини оқлашимиз зарур.

Давлатимиз раҳбарининг Олий Мажлисга Мурожаатномасида йўл қўйилган хатолар ҳақида аччиқ хулосалар айтилди, жорий йилда амалга ошириладиган ишлар ҳақида батафсил фикрлар билдирилди, вазифалар белгилаб берилди. Бундан ҳар биримиз тўғри хулоса чиқаришимиз керак. Камчиликларимизни бартараф қилиш вақти келди. Давр биздан фаол ва ташаббускор бўлишни талаб қилмоқда. Одамлар билан елкама-елка туриб, дардини тинглаш, муаммоларини ечишда ҳамкор, ҳамфикр бўлишимиз лозим.

 

Алишер МАМАТМУРОДОВ,

ЎзХДП Жарқўрғон туман кенгаши раиси,

халқ депутатлари туман Кенгашидаги партия гуруҳи аъзоси. 



DB query error.
Please try later.