28.12.2017

КОЛЛЕЖ ЎҚУВЧИЛАРИ СУДЛАНДИ

Бундай гапни эшитишнинг ўзи кўнгилга оғир ботади. Афсуски, ҳар қанча аччиқ бўлмасин, бу ҳақиқат.

Жиноят ишлари бўйича Яшнобод туман суди вояга етмаганлар — Тошкент банк коллежи 2-босқич ўқувчиси ­Камолиддин Иброҳимов, Тошкент маданият коллежи 2-босқич ўқувчилари Асилбек Амиров, Сарвар ­Шарифжонов ҳамда уларнинг шериги Зухрилло Исмоиловга оид ишни кўриб чиқди. Аниқланишича, коллеж ўқувчилари гиёҳванд­лик воситасини сотиш йўли билан ноқонуний бойлик орттириш мақсадида жиноятга қўл уришган. Олмазор туманида жойлашган «Фарғона» кафеси олдида гугурт қутичасига солинган марихуана гиёҳванд­лик моддасини З.Исмоиловга 50 минг сўмга сотишган. Улар жиноий ҳаракатларини давом эттириб, нав­батдаги «гугурт қути»ни 80 минг сўмга сотишган вақтда ҳуқуқни муҳофаза этувчи идора ходимлари томонидан ашёвий далил билан қўлга олинган.

Суд-кимёвий экспертизанинг хулосасига кўра, улардан олинган ўсимлик модда гиёҳванд эканлиги ва оғирлиги 3,07 ҳамда 1,94 грамм­га тенглиги аниқланган.

Суд судланувчиларнинг содир қилган жиноятига иқрор бўлиб, қилган ишидан чин кўнгилдан пушаймонлиги, вояга етмаганлиги, муқаддам судланмаганлиги, коллеж ўқувчиси эканлиги ҳамда оилавий аҳволини эътиборга олиб жазо та­йинлади.

Шу ўринда масаланинг бир жиҳати кишини ўйга толдиради. Бу болалар қандай қилиб жиноят кўчасига кириб қолган? Ота-она қаерга қараган? Ҳаёт тажрибасидан маълумки, аксарият ҳолатларда болалар назоратсиз қолдирилиши оғир оқибатларга олиб келмоқда. Ота-она боласи мактабда қандай ўқиётгани, кимлар билан дўстлашганини билмаса, дарсдан сўнг нима билан банд­лигига қизиқмаса, эрта бир кун пушаймон бўлиши аниқ.

Бугун вояга етмаганлар ўртасида тарбиявий ишларни кучайтириш, улар томонидан турли ҳуқуқбузарликлар содир этилишининг олдини олиш долзарб вазифалардан бўлиб турибди. Шу боис, болалар тарбияси билан боғлиқ масалада ота-она, мактаб ва маҳалла ҳамкорлигини талаб даражасида йўлга қўймоқ керак, деб ўйлаймиз. Ёш авлод тарбиясига барчамиз бирдек масъуллигимизни англаб олмоғимиз керак.

 

Мавлон ҒАФУРОВ,

Жиноят ишлари бўйича Яшнобод туман суди судьяси.

Равшан ШОДИЕВ,

«Ўзбекистон овози» мухбири.



DB query error.
Please try later.