26.12.2017

«БИЗГА РАҚАМЛАР ЭМАС, АНИҚ НАТИЖА КЕРАК»

Раимберган САБУРОВ, халқ депутатлари Хоразм вилоят Кенгашидаги ЎзХДП гуруҳи раҳбари:

— Халқимиз, мамлакатимиз тарихида бутунлай янги давр бошланмоқда. Президентимизнинг парламентга Мурожаатномаси бу ҳақиқатни чуқур тушуниб етишимиз кераклигини кўрсатди. Бу мурожаатдан кейин ҳеч қандай иккиланишга ўрин қолмади. Эртага ҳаётимиз қандай бўлиши, фарзандларимиз, набираларимизга қандай жамият қолдиришимиз фақат ва фақат ўзимизга, уйғоқ бўлиб яшашимизга боғлиқ.

Халқ депутатлари вилоят Кенгаши депутати сифатидаги фаолиятимга назар солсам, бизга нисбатан билдирилган танқидий фикр­лар чуқур асосларга эга, буни тан оламан. Энг ачинарлиси, рақамлар ортидан қувишдан, қоғозбозликдан қутилишимиз қийин бўляпти.

Жойларда сайловчилар билан учрашувлар давомида уларни қийнаётган муаммоларни, айрим ташкилотлар фаолиятидаги камчиликларни қайд этамиз-у, уларни белгиланган тартибда ҳал этишга келганида сусткашликка йўл қўямиз. Тўғрироғи, андишага борамиз, баъзида айрим раҳбарларнинг биздан хафа бўлишидан тортинамиз.

«Ўзгаришлар бўляптику, бу ишлар ҳам бир кун жойига тушиб кетар», деб ўзимизга таскин берамиз. Баъзида маҳаллий раҳбарлардан «фақат сиздан депутатлик сўрови келади», «шундай муаммоли масалаларни қаердан топасиз?» каби эътирозлар учрайди. Айрим раҳбарлар депутатлар ишига баҳо беришга уринади. Янги фикрлар ва ғояларни хушламай қабул қилади. Лекин бунақа вазиятларда, афсуски, депутатлар бир-бирини фаол қўллаб-қувватлашдан, ўз фикр ва таклифларини қатъий туриб ҳимоя қилишдан ийманади.

Биз депутат фаолиятига ҳақиқий баҳони халқ беришини мудом ёдда тутишимиз керак. Депутат мақомига эришгач, бизга ишонган одамларни унутсак, қонунларга ҳурматсизлик, виждонимизга хиёнат қилган бўламиз.

Депутат — халқ вакили. Шундай экан, биз сайловчиларнинг манфаатини ўйлаб иш олиб боришимиз шарт.

Халқ билан мулоқот ва инсон манфаатлари йилида сиёсий партиялар, депутатлар одамларнинг турмуш тарзи, жойлардаги ҳақиқий аҳволни ўрганишга алоҳида эътибор қаратди. Аммо афсуски, бу борадаги ишларимиз ҳам асосан расмий тадбирлар ўтказишдан иборат бўлиб қолди. Нечта хонадонга кирганимиз, қанча одам билан мулоқот қилганимиз ҳақида маълумот йиғиш, бу борада ҳам рақамлар ортидан қувишга тушиб кетдик. Мулоқотдан айнан қандай самара бўлди, деган саволга жавоб беришга эса депутатлар ҳам, партиямиз ташкилотлари мутасаддилари ҳам қийналади.

Мурожаатномада бу масала қаттиқ танқид қилинди. «Ҳисоботларга эътибор берсак, маҳаллий Кенгашлар фаолиятида гўёки ижобий ўзгаришлар рўй бераётгандек туюлади, лекин улар фақат рақамларда акс этмоқда, холос. Бизга рақамлар эмас, аниқ натижа керак».

Биз бу даъватдан бугун хулоса чиқариб, ишимизни ўзгартирмасак, эртага кеч бўлади. Мен ҳамма депутатларни бирдамликка, одамларнинг манфаати учун қатъий позицияда туришга, депутат деган юксак мақомга муносиб бўлишга чақираман.



DB query error.
Please try later.