26.12.2017

ПРЕЗИДЕНТ МУРОЖААТНОМАСИ ХАЛҚИМИЗНИ БАХТ-САОДАТ ЙЎЛИГА ЧОРЛАМОҚДА

Гулистон АННАҚИЛИЧЕВА, Қорақалпоғистон Республикаси Жўқорғи Кенгеси депутати, Олий Мажлис Сенати аъзоси:

— Президентимизнинг биринчи марта Олий Мажлисга қилган Мурожаатномасини катта ҳаяжон билан тинглар эканман, инсон ҳақиқатга тик боқиб яшаши, тўғрисўз ва фидойи бўлиб яшаши кераклигини чуқур ҳис этдим.

Мурожаатда парламент аъзолари, барча депутатлар зиммасига катта вазифалар қўйилар экан, уларнинг халқ олдидаги масъулияти нақадар улуғвор эканлигига эътибор қаратилди.

«Интернет тармоғида Менинг фикрим деб номланган веб-саҳифа ташкил қилиш мақсадга мувофиқ», деб таъкидлади Президентимиз. Бу таклифни нафақат депутатлар, балки барча юртдошимиз бир овоздан маъқулламоқда. Ҳақиқатда ҳам, таъкидланганидек, қонунлар умумхалқ муҳокамасидан юзаки ўтмоқда. Яхши, ўринли ва ҳаётий фикрлар, тавсиялар қонунларимизга кирмай қолмоқда. «Фуқаролар томонидан илгари сурилган ташаббусларни Олий Мажлис ёки халқ депутатлари Кенгашлари кўриб чиқиши мажбурий экани қонунда белгилаб қўйилиши лозим»лиги алоҳида кўрсатиб берилди.

Шунингдек, депутатлар фаолиятидаги камчиликлар ҳақида фикр юритаркан, «Қоғозда юзлаб масалаларни ҳал қилгандан кўра амалда бир неча муаммони ҳал қилиб берсангиз, одамлар сизлардан рози бўлади», деб алоҳида айтиб ўтилганлиги биз депутатлардан ўз фаолиятимизни қайта кўриб чиқишни талаб этмоқда.

Мурожаатномада барча соҳалар сингари ижтимоий йўналишдаги муҳим ва долзарб масалалар ҳам тилга олиндики, булар айнан ЎзХДП Дастурида белгиланган устувор вазифаларга ҳамоҳанг эканлигини ҳис қилдик.

«...Аҳолининг муносиб ҳаёт даражаси учун зарур бўлган даромадларни аниқлаш бўйича «истеъмол саватчаси» тушунчасини қонунчиликда мустаҳкамлаш ва уни амалда таъминлаш механизмларини яратишимиз керак». Бу жараёнда партиямиз ташкилотлари ва депутатларимиз алоҳида жонбозлик кўрсатиши зарур.

Қорақалпоғистон Республикаси Жўқорғи Кенгеси, халқ депутатлари туман, шаҳар Кенгашлари депутатлари Мурожаатномани яна бир бор ўрганар экан, шиддат билан ўзгараётган ҳаётимиздан ор­қада қолмаслик учун белгиланган устувор вазифаларни амалга ошириш, бу борада аниқ чора-тадбирларни ишлаб чиқишда халқимизнинг фикр ва таклифларини ҳисобга олишимиз, бунинг учун халқ ичида кўпроқ бўлишимиз керак, деган якдил фикр билдирмоқдалар.

 Фахр ва ифтихор билан айта оламанки, Мурожаатнома халқимизни бахт-саодатнинг ойдин йўлига чорлаб, буюк келажакка бўлган ишончини янада мустаҳкамлади. Биз ҳар биримиз Ватанимизни ардоқлашимиз, инсонлар ўртасидаги дўстлик, биродарликни, тинчлик, осойишталигимизни мустаҳкамлашга муносиб ҳисса қўшишимиз керак.

«Ўзимиз ўзимизга хиёнат қилмасак, ўзимиз ўзимизни алдамасак, ҳалол, пок бўлиб меҳнат қилсак, мен аминман, кўзлаган барча марраларимизга албатта етамиз. Бу борада мен аввало, кўп синовлардан ёруғ юз билан ўтган олийжаноб халқимизнинг мустаҳкам иродаси ва бунёдкорлик салоҳиятига ишонаман», деган самимий ишонч­ ҳар биримизни ғурурлантиради, янада масъулият билан меҳнат қилишга ундайди.



DB query error.
Please try later.