Охирги сонда



Кўп ўқилган мақолалар



Долзарб мавзу



Мақолалар архиви

«    Dekabr 2018   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
12.12.2017

АСАЛАРИ БОЛ БЕРАДИ, МЕВА ҲОСИЛИНИ ОШИРАДИ

Тошкентда Қишлоқ ва сув хўжалиги вазирлиги, Асаларичилар уюшмаси ҳамда «Алоқабанк» акциядорлик тижорат банки билан ҳамкорликда асал байрами ва асал маҳсулотлари кўргазма-ярмаркаси ташкил этилди. Унда 250 дан ортиқ асаларичи ўз маҳсулотлари билан қатнашди.

 

— Бугунги кунда олтита вилоятимизда асаларичилар уюшмаси бор, — дейди Ўзбекистон асаларичилар уюшмаси раиси Шерали Суярқулов. — Яқин орада қолган вилоятларда ҳам уюшмалар очилади. Сўнгги маълумотларга кўра, Ўзбекистон асал­аричилар уюшмасига 14 мингдан ортиқ тадбиркор аъзо бўлган. Бизда асаларичилик деганда асосан асал йиғиб олишни тушунишади. Ушбу соҳанинг яна бир фойдаси ўсимликларни чанг­латишдир. Бугунги кунда Ўзбекис­тонда 100 миллиард сўмлик асалари маҳсулотлари етиштирилаётган бўлса, чанглатиш орқали эса деҳ­қонларимиз бир триллион сўм миқдорида даромад олишмоқда. Чанглатиш тизими бизда ҳали шакллантирилмаган. Агар мазкур тизимни тўғри йўлга қўйиб олсак, даромадни энг камида яна бир триллион сўмга ошириш мумкин.

— Ярмаркага энг охирги технологиялар асосида Фарғонада ишлаб чиқарилган тарози олиб келганмиз, — дейди Фарғона вилояти асаларичилар уюшмасининг биолог тренери Ботирали Қодиров. — Мазкур ускунани Ўзбекистон бўйлаб ёки бош­қа давлатда туриб ҳам бошқариш мумкин. Исталган вақтда тарозига телефон қилсангиз, 5 сония ичида керакли маълумотларни хабар тарзида оласиз. Ушбу ускуна орқали вақт, транспорт ва ишчи кучи харажатлари тежалади. Туркиянинг ­Истанбул шаҳрида бўлиб ўтган «Апимондия» халқаро асаларичилик уюшмалари федерациясининг ­­45-конгресси ва кўргазмасида мазкур тарози тақдим этилди. Бунга бутун дунё асал­аричилари қизиқиб қолди. Бу каби ускуналар аввал ҳам бор бўлиб, уларнинг нархи 10 минг АҚШ долларигача эди. Бизни ускунамиз эса улардан анча устун, нархи эса 150 АҚШ долларини ташкил қилади. Олдинги тарозиларнинг қуввати 25-30 кунга етса, бизники 120 кун ишлаб беради. Тарозимизни Россия, АҚШ, Англия, Белоруссия, Грузия, Украина давлатларига ­сотяпмиз. Бугунги кунда 200 дан ортиқ шундай тарозиларга буюртма олганмиз.

— Апитерапия асалари маҳсулотлари билан беморларни даволашдир, — дейди апитерапевт Гулчеҳра ­Латипова. — Жорий йил хоразм­лик ҳамкасбим билан биргаликда Рязань давлат тиббиёт университетида малака ошириб, апитерапевт ихтисослигини эгалладик. Тез орада Тошкентда Апицентр очилади. Шу ерда асалари маҳсулотлари билан турли хил касалликка чалинган беморларни даволаймиз. Ривожланган давлатларда апитерапия кенг тарқалган. Сабаби, бунда бемор табиий йўл билан даволанади, зарарли томони кам. Ҳозирги замоннинг олимлари асални ҳаттоки плазмага яқин деб ҳисоблашади. Асал­ари заҳридан остеохондроз, бўғим касалликлари, артрит, вена томирларининг кенгайиши каби касалликларни даволашда фойдаланилади. Жароҳатдан кейинги оғриқларни ҳам қолдиришда ишлатиш мумкин. Шунингдек, асалари заҳрининг таркибида қон томирини кенгайтирувчи ва қонни суюлтирувчи моддалар бор.

— Асаларичилик билан шуғулланишни бошлаганимга 26 йил бўлди, — дейди жиззахлик тадбиркор Шуҳрат Сайфуддинов. — Ярмаркага 3-4 хил асал олиб келганмиз. Янтоғ асали жигар касалликларини даволайди. Ковул асалининг йўғон ичак касалликларига фойдаси катта. Қонни тозалаш учун гул чангини олиб келганмиз. Прополисдан тайёрланган маҳсулотлар йўғон ичакдаги яраларни даволайди. Бизда 200 дан зиёд асалари оиласи бор. Оилавий шу иш билан шуғулланамиз. Хориждан технологияларни олиб келишга ҳаракат қиляпмиз. ­Украинадан мум парда ишлаб чиқарадиган технологияни олиб келдик. Эндиликда асални қадоқлайдиган ускунани сотиб олиб, ўзимизда асални қадоқлашни йўлга қўйиш ниятимиз бор.

— Тиббий китоблар асосида асалга турли хил гиёҳларни қўшиб доривор асал тайёрлаймиз, улар юракни бақувват қилади, иммунитетни оширади, — дейди наманганлик Алишер Ҳакимов. — Тоғда гиёҳли ўтлар кўп ўсади. Шунинг учун тоғ асали шифобахшлиги бўйича биринчи ўринда туради. Шунингдек, арилар ҳам тоғда яхши ривожланади.

Ярмарка доирасида Қишлоқ ва сув хўжалиги вазирлиги, Ўзбекистон асаларичилар уюшмаси вакиллари ва асаларичилари иштирокида илмий-амалий семинарлар ва бош­қа тадбирлар ўтказилди.

 

Шаҳбоз САИДОВ,

«Ўзбекистон овози» мухбири.



DB query error.
Please try later.