12.12.2017

ЮКСАК ЭЪТИРОФДАН БОШИМИЗ КЎККА ЕТДИ

Раъно ВАЛИЕВА, Қизилтепа туманидаги «Валиобод» фермер хўжалиги раҳбари, «Эл-юрт ҳурмати» ордени соҳиби, ЎзХДП фаоли:

— Туман ҳокимлигидан қўнғироқ қилиб, Тошкентга, байрам тадбирига боришимни айтишганида, жуда ҳаяжонландим. Мамлакатимизда илк бор нишонланаётган Қишлоқ хўжалиги ходимлари куни байрамида иштирок этиш, Президент билан учрашиб, янги режалар ҳақида суҳбатлашиш мен учун юксак бахт эди...

Поёнига етаётган 2017 йил мен учун омадли бўлди. Чунки мамлакатимиз мустақиллигининг 26 йиллиги арафасида «Эл-юрт ҳурмати» ордени билан мукофотланган эдим. Конституциямизнинг 25 йиллик тантанасида ушбу юксак мукофотни Президентимизнинг ўзларидан қабул қилиб олганим ҳаётимдаги энг бахтли онлардан бири бўлди.

Мендай оддий бир аёлга кўрсатилган бундай эътибор қалбимни қувончга тўлдирди. Ўша ондаги ҳаяжонимни сўз билан таърифлаш қийин.

1976 йилдан буён қишлоқ хўжалигининг турли тармоқларида фаолият юритдим. 10 йилдан ортиқ механизатор бўлиб ишладим. 1999 йилда Қизилтепа туманининг Ўртачўл ҳудудида 78 гектар ер олиб, «Валиобод» фермер хўжалигини ташкил этдим. Кўпчилик тасарруфимиздаги ердан яхши ҳосил олишимизга ишонмаган эди. Лекин биз астойдил меҳнат қилдик. Йилдан-йилга даромадимиз ошиб, ишимиз яхшиланиб борди. Ҳозир фермер хўжалигимизнинг умумий майдони 125 гектарни ташкил этади. 100 дан зиёд товуқ, 30 дан ортиқ қорамолимиз бор. Бу йил 31 гектар ерда 120 тонна пахта, 52 гектар майдонда 300 тоннадан ортиқ ғалла етиштириб, шартномавий режани ортиғи билан бажардик. Ғалладан бўшаган майдонларга мош, сабзи, шолғом, кунжут экиб, мўл ҳосил олдик. Даромадимиз икки баробар ошди.

 Президентимизнинг Қишлоқ хўжалиги ходимлари кунига бағишланган тантанали маросимдаги нутқида белгиланган вазифалар, илгари сурилган ғоялар барча деҳқон ва фермерларни янада руҳлантирди. «Деҳқон бу – ҳаётнинг бақувват устуни, тирикликнинг мустаҳкам таянчи». Тўғриси, оддий деҳ­қонга берилган бундай юксак таъриф, юксак эътирофдан бошимиз осмонга етди.

Президентимиз Навоий вилоятига ташрифлари чоғида пахтачиликда мутлақо янги услубни жорий қиламиз, деган эдилар. Шу асосда туманимизда пахтани етиштиришдан тортиб, ундан тайёр маҳсулот ишлаб чиқаришгача бўлган босқични ўз ичига қамраб олган кластер усулига ўтилди. Қувонарлиси, бу истиқболли тажрибани кенг ёйиш мақсадида мамлакатимиздаги ўттиздан зиёд енгил саноат корхонасига тўрт юз минг гектардан ортиқ пахта майдони бириктирилиши таъкидланди. Бундай имконият фермернинг даромадини янада оширади.

Биз фермер хўжалигимизнинг иқтисодий имкониятларини кенгайтириш ҳамда бозор юкини енгил қилиш учун келгусида асаларичилик ва балиқчиликни йўлга қўймоқчимиз. Насиб этса, бу режаларни тез фурсатда амалга оширамиз. Ҳар бир қарич ердан унумли фойдаланиб, экин майдонларининг чет қисмларига маккажўхори, қовоқ ва кунгабоқар экиш орқали қўшимча даромад оляпмиз.

Биз, фермерлар халқимиз дастурхони тўкинлиги, фаровон ҳаётимиз учун бор куч-ғайратимизни ишга соламиз.

 

«Ўзбекистон овози» мухбири

Илҳом САТТОРОВ ёзиб олди.


Фикр ва мулохазалар

Защита от автоматических сообщений

Сўнгги янгиликлар: