Охирги сонда



Кўп ўқилган мақолалар



Долзарб мавзу



Мақолалар архиви

«    Avgust 2018   
Du Se Cho Pa Ju Sha Ya
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
10.12.2017

АДОЛАТ УСТУВОР БЎЛГАН ЖАМИЯТДА

инсон, унинг манфаатлари қадр топади

Президентимизнинг Ўзбекистон Республикаси Конституцияси қабул қилинганлигининг 25 йиллигига бағишланган тантанали маросимдаги маърузаси бутун халқимиз, кенг жамоатчилик вакиллари, зиёлилар ҳамда ёшлар томонидан катта қизиқиш ва ҳаяжон билан кутиб олинди. Кенг қамровли маърузада ўтаётган 2017 йилда эришилган натижалар танқидий-таҳлил этилди, инсон ҳуқуқларини таъминлаш, давлат бошқарувини демократлаштиришнинг муҳим йўналишлари белгилаб берилди. Ушбу вазифалар Конституциямизнинг инсонпарвар ва эзгу ғоялари, халқимизнинг бу борадаги хоҳиш-истакларини рўёбга чиқаришда долзарб аҳамиятга эгадир. Шу боис маърузада билдирилган тан­қидий-таҳлилий фикрлар, илгари сурилган ғоялар Ўзбекис­тон Халқ демократик партияси фаоллари, депутатлари томонидан чуқур ўрганилмоқда.

 

Бунёджон ЭШОНҚУЛОВ, Олий Мажлис Қонунчилик палатаси депутати, Ўзбекистон ХДП фракцияси аъзоси:

— Маърузада асосий эътибор суд-ҳуқуқ соҳасида амалга оширилган ислоҳотлар, жумладан, суд, прокуратура, ички ишлар органлари тизимида йўлга қўйилган янгиликларга қаратилди. Чунки бу йўналишда қилинган ишларнинг барчаси инсон ҳақ-ҳуқуқи ва қонуний манфаатларини таъминлашда катта аҳамияга эга.

Очиғини тан олиш керак, сўнгги йилларда инсон ҳуқуқлари бузилиши, одамларнинг норозилиги кўпроқ ушбу тизим фаолияти билан боғлиқ эди. Президентимизнинг Виртуал қабулхонаси ва жойлардаги Халқ қабулхоналарига бўлаётган мурожаатлар таҳлили ҳам буни тасдиқлайди.

Эндиликда бу йўналишда жуда кўп нарсалар ўзгаради. Буни биргина Президентимизнинг «Суд-тергов фаолиятида фуқароларнинг ҳуқуқ ва эркинликлари кафолатларини кучайтириш бўйича қўшимча чора-тадбирлар тўғрисида»ги фармони мисолида асослаш мумкин. Яъни фармонга кўра, бундан буён Ўзбекистонда қийноққа солиш, руҳий, жисмоний босим ўтказиш ва бошқа зўравонлик ҳолатларига мутлақо йўл қўйилмаслиги белгилаб қўйилди. Жиноят ишлари доирасида ноқонуний усуллар билан олинган ҳар қандай маълумотлардан, жумладан, аудио ва видео материаллардан, ашёвий далиллардан фойдаланиш қатъиян тақиқланади.

Қийноққа солиш, ҳимоя­га бўлган ҳуқуқни бузиш, алдаш ва тергов жараёнида бошқа ноқонуний усуллардан фойдаланиш инсоннинг шаъни, қадр-қимматини ерга уриш билан баробар. Бу — оғир жиноят.

Эндиликда тергов ва вақтинча сақлаш ҳибсхоналарида видео кузатув камералари ўрнатилади. Бу эса ушбу жойда сақланаётган шахсларга нисбатан жисмоний ва руҳий тазйиқларнинг олдини олишга хизмат қилади.

Қонунчилигимизга бундай меъёрларнинг киритилиши Конституциямизда мустаҳкамланган инсон ҳуқуқларининг муҳим кафолати бўлади.

Маърузада бир фикр алоҳида таъкидланди. Яъни Президент фармон қабул қилиши билан ҳаммаси жой-жойига тушиб кетади, деб ўйлаш тўғри эмас. Шунинг учун инсон ҳуқуқларини кафолатлаш бўйича белгиланган вазифаларнинг амалда ижросини таъминлаш, эзгу ниятлар қоғозда эмас, инсонлар тақдирида ўзининг ифодасини топишига эришишимиз лозим.

Бу йўлда айниқса, биз — депутатлар бошқаларга ибрат бўлишимиз, қонунларнинг ижроси юзасидан парламент ва жамоатчилик назоратини янада кучайтиришимиз талаб этилади.

 

Жасур ҚУЛМУҲАММЕДОВ, Халқ депутатлари Тошкент шаҳар Кенгашидаги Ўзбекистон ХДП гуруҳи аъзоси:

— Президентимиз маърузасини диққат билан тинглаган одам юртимизда тарихий ислоҳотлар бошланганини чуқур ҳис қилади, ҳаётга, келажакка ишончи ортади.

Бу йил аҳолининг ижтимоий муҳофазага муҳтож қатламларини ҳар томонлама қўллаб-қувватлаш, ногиронларга тиббий ва ижтимоий жиҳатдан зарур шарт-шароитлар яратиш борасида қилинган ишларни кўпчилик яқинлари, қўни-қўшнилари ҳаётида ёки оммавий ахборот воситалари орқали ўқиб, эшитиб турибди.

Маърузада айнан шу йўналишда қилинган ишларга ҳам алоҳида эътибор қаратилди. Мен ҳам депутат, ҳам партия фаоли сифатида ногирон, ижтимоий кўмакка муҳтож инсонларнинг хонадонида кўп бора бўлганман. Уларга қўлимиздан келганча ўзимиз, қайсидир ҳомийнинг ёрдами билан ижтимоий кўмак кўрсатардик. Улар бундан хурсанд бўларди, албатта.

Бироқ, айрим эҳтиёжманд кишилар бошпанаси, уйи йўқлиги учун шу масалада ёрдам сўрарди. Тан оламиз, бу борада уларга бирор-бир жўяли маслаҳат, ёрдам беролмасдик. Шу ­нарса мени доим ўйлантириб қўярди. Лекин ҳозир вазият ўзгаряпти.

Эътибор беринг, жорий йилнинг ўзида кам таъминланган, уй-жойга муҳтож, ногиронлиги бўлган шахслардан 1 минг 200 нафардан кўпроғини арзон уй-жой билан таъминлаш бўйича шартномалар имзоланиб, бошлан­ғич тўловлар учун 22 миллиард сўмдан ортиқ маблағ ажратилди. Яъни, уйларнинг бошланғич тўловлари давлат томонидан тўлаб берилди. Қолаверса, уйларнинг кредит маблағини тўлашлари учун 972 нафар ногирон аёлга тикув машиналари олиб берилди. Улар шу орқали доимий даромад манбаига эга бўлди.

Бир ўйлаб кўрайлик, шунча маблағ даромад келтириладиган соҳага эмас, оддий, эҳтиёжманд инсонларнинг манфаатлари учун сарф этилди. Бу дегани минглаб инсонларнинг ҳаётга, яшашга бўлган интилиши ортди, давлат ва жамиятдан розилик ҳисси кучайди, ўзига ишончи кучайди. Ўз кучи ва имкониятларига ишонган одамлар эса катта ютуқларга эришади, мамлакатни қудратли қилади.

 

«Ўзбекистон овози» мухбири

Нурали ОРИПОВ ёзиб олди.



DB query error.
Please try later.