06.07.2017

ПАХТА САНОАТИ ЯНАДА РИВОЖЛАНАДИ

«Ўзпахтасаноатэкспорт» холдинг компанияси томонидан пахта саноатини ривожлантириш борасида амалга оширилаётган ишлар ҳақида матбуот анжумани ўтказилди.

Унда Ўзбекистон Республикасини 2017-2021 йилларда ривожлантиришнинг Ҳаракатлар стратегиясига мувофиқ пахтачилик соҳасини ривожлантириш концепцияси ишлаб чиқилгани, шу орқали соҳа корхоналарини модернизация қилиш, маҳсулотларни маҳаллийлаштириш, хорижий инвестицияларни кенг жалб этиш бўйича аниқ вазифалар белгилаб олингани тўғрисида ахборот берилди.

— Компаниямиз зиммасига юклатилган вазифаларни ўз вақтида ва сифатли бажаришга ҳаракат қилиб келмоқдамиз, — дейди «Ўзпахтасаноатэкспорт» холдинг компанияси бошқарув раи­си ўринбосари, «Ўзпахтаэкспорт» АЖ бош директори Жамшид Қодиров. — Халқаро пахта уюшмаси, Бремен пахта биржаси ва бошқа қатор йирик пахта ассоциа­цияси ва биржаларига аъзо бўлдик. Покистон, Индонезия, Вьетнам каби янги бозорлар ўзлаштирилди. Пахта хомашёсига бирламчи ишлов бериш технологиясини оптималлаштириш бўйича амалга оширилган тадбирлар натижасида 2016 йилги мавсумда «олий» ва «яхши» синфларидаги толанинг умумий пахта ҳосилидаги улуши 92 фоизни ташкил этди. Бу эса аввалги йилдаги кўрсаткичдан 10 фоиз кўпдир. Пахта толасини таснифлашнинг миллий тизими такомиллаштирилиб, пахта толаси бўйича янги стандарт қабул қилинди.

Бундан ташқари, ёғ-мой ишлаб чиқариш соҳасида техник қайта жиҳозлаш бўйича дастурлар сифатли амалга оширилмоқда. 2016 йил ҳосил бўйича биринчи синфдаги биринчи навли сифатли уруғлар улуши 76,4 фоизни ташкил этиб, 2015 йилга солиштирганда салкам 10 фоизга ортган. Пахта ёғи сифати кескин ошиб, унинг ранги 5 қизил бирликкача ортди (жаҳон стандарти), қадоқланган ўсимлик ёғлари ишлаб чиқариш миқдори кўпайди. Мой чиқишининг 1,3 фоизга ортиши ҳисобига 10 миллиард сўм миқдорида қўшимча даромад олинишига эришилди.

Халқаро молия корпорацияси билан ҳамкорликда Фарғона ва Жиззах вилоятларида «ВС1» (Пахтани яхшилаш ташаббуси) принципларига асосланган ҳолда пахтачиликни барқарор ривожлантириш стандартини жорий этиш бўйича музокаралар олиб борилмоқда.

Матбуот анжуманида пахта тозалаш заводи, ёғ-мой комбинати ва пахта терминалларидаги капитал таъмирлаш жараёнлари, истиқболли лойиҳалар бўйича атрофлича маълумотлар берилди.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.