01.07.2017

ИМКОНИЯТ, ИСТЕЪДОД ВА РАҒБАТ

«Ёш сиёсатчи — 2017» кўрик-танловининг Сурхондарё вилоят босқичи якунланди

Ёшлар байрамига айланиб кетган танловда шаҳар ва туман босқичларида ғолиб бўлган 14 нафар иштирокчи «Лойиҳа тақдимоти», «Билимдон сиёсатчи» ва «Нотиқлик санъати» шартлари асосида куч синашди.

— Вилоятда партиямиз сафига 12 мингга яқин ёшлар бирлашган, — дейди ЎзХДП Сурхондарё вилоят кенгаши «Истиқбол» ёшлар қаноти етакчиси Камол Абдуллаев. — Эртамиз эгаларининг сиёсий-ҳуқуқий онги ва маданиятини юксалтириш бўйича анжуман, семинар ҳамда давра суҳбатлари ташкил этилмоқда. Кўрик-танловнинг дастлабки босқичларида 800 нафарга яқин иштирокчи ўз билимини синовдан ўтказган бўлса, 100 дан зиёд фаол ва ташаббускор ёшлар партиямиз сафига қабул қилинди.

Ёш сиёсатчиларнинг ҳар бир чиқиши ҳакамлар ҳайъати томонидан одилона баҳолаб борилди. Танловнинг якуний натижаларига кўра, Термиз давлат университети талабаси Адҳам Намозов 1-ўринни эгаллаб, республика босқичида иштирок этиш ҳуқуқини қўлга киритди. Иккинчи ўрин қумқўрғонлик Отабек Қўзиевга, учинчи ўрин эса Олтинсой маиший хизмат кўрсатиш касб-ҳунар коллежи ўқувчиси Гулноза Тўлқиновага насиб этди.

— Имконият бор жойда истеъдодлар вояга етади, — дейди танлов ғолиби Адҳам Намозов. — Ўзбекис­тон ҳам ана шундай диёрдир. Биз учун бугун барча шароитлар яратилмоқда. Нуфузли кўрик-танловда иштирок этиш ҳар бир йигит-қизнинг орзуси бўлса, ғолиблик шараф ва масъулият юклайди. Республика босқичида ҳам юқори ўринларни қўлга киритишга ҳаракат қиламан.

Танлов якунида ғолиб ва совриндорларга вилоят партия кенгашининг махсус диплом ҳамда эсдалик совғалари топширилди.

 

Абдумалик ҲАЙДАРОВ,

«Ўзбекистон овози» мухбири.



DB query error.
Please try later.