29.06.2017

«ЎЗ БОЛАНГНИ ЎЗИНГ АСРА!»

Ўзбекистон Халқ демократик партияси Марказий Кенгаши ва Олий Мажлис Қонунчилик палатасидаги фракцияси ҳамкорлигида Президентимизнинг «Ижтимоий барқарорликни таъминлаш, муқаддас динимизнинг софлигини асраш — давр талаби» мавзусидаги нутқида илгари сурилган ғоялар, фикрлардан келиб чиқадиган вазифалар бўйича амалий семинар ташкил этилди. Унда Олий Мажлис Қонунчилик палатасидаги партия фракцияси аъзолари, Вазирлар Маҳкамаси ҳузуридаги дин ишлари бўйича қўмита, Ўзбекистон мусулмонлар идораси вакиллари, халқ депутатлари Тошкент шаҳар ва вилоят Кенгашлари депутатлари, фаоллар ҳамда оммавий ахборот воситалари вакиллари иштирок этди.

Ижтимоий-маънавий соҳани янада ривожлантириш, жамиятда соғлом муҳитни мустаҳкамлаш, ёшлар тарбияси, тинч-осуда ҳаётимизни, муқаддас динимиз поклигини асраш ҳар қачонгидан-да муҳим аҳамият касб этмоқда. Айни шу масалалар юртимиз, жамиятимиз эртасини, ёшлар келажагини ҳал қилишда энг устувор йўналиш саналади.

Йиғилиш иштирокчилари давлатимиз раҳбари нутқида билдирилган танқидий-таҳлилий фикрлар ва белгиланган вазифалар бўйича атрофлича фикр алмашишди.

Ўзбекистон ХДП Марказий Кенгаши раиси, Олий Мажлис Қонунчилик палатасидаги партия фракцияси раҳбари Хатамжон Кетмонов семинарни очар экан, кун тартибидаги масала аҳамияти юзасидан ўз фикр-мулоҳазаларини билдирди:

— Президентимиз томонидан бой маданий меросимизни асраб-авайлаш, диний бағрикенглик, миллатлараро тотувликни мустаҳкамлаш борасида бугунги куннинг долзарб вазифалари белгилаб берилди.

Шунингдек, юртимизда тинч­лик, осойишталикни таъминлаш, терроризм, экстремизм, одам савдоси каби офатларнинг олдини олиш, қўшни давлатлар билан ҳамкорлик алоқаларини ривожлантириш, ижтимоий-маънавий муҳитни яхшилаш, ёшларни турли диний оқимлар таъсиридан асраш борасидаги ишларни кучайтириш масаласига алоҳида эътибор қаратилди. Биз бу вазифалардан келиб чиқиб, чора-тадбирлар режасини аниқ белгилаб олишимиз лозим.

Президентимиз, айниқса, ёшлар тарбияси масаласига жиддий аҳамият берди. Дарҳақиқат, ёшларга таълим-тарбия бериш, уларни турли ёт ғоялардан асраш каби масалаларда ота-оналар, маҳалла, таълим ­муассасалари, давлат ва жа­моат ташкилотларининг масъулиятини янада ошириш зарур.

Шуни очиқ тан олиш керакки, Президентимиз нутқини тинг­лар эканмиз, ёшларни фаол ҳаётга жалб этиш, ёшларнинг бандлигини таъминлаш, ташаббусларини қўллаб-қувватлаш, турли ёт ғоялар таъсиридан асраш борасидаги фаолиятимиз қониқарли эмаслигини ҳис этдик.

Давлатимиз раҳбари билдирган фикрларни чуқур таҳлил қилиб, хулосалар чиқариб олиш, партиямиз фаоллари, депутатларимиз учун ўта муҳимдир.

— Яқин ва узоқ тарихга назар ташлайдиган бўлсак, давлат раҳбарининг уламолар, имом-хатиблар билан муаммоларни ҳал қилиш юзасидан бундай катта ҳажм­даги учрашуви ўтказилмаганига гувоҳ бўлиш мумкин, — деди Тошкент шаҳар бош имом-­хатиби Анвар қори Турсунов. — Давлатимиз раҳбари бугунги кунда долзарб саналган ишларимизни танқидий таҳлил қилди. Фарзанд тарбияси, ажралишлар ва турли оқимларга қарши курашиш бўйича олдимизда турган вазифаларни аниқ кўрсатиб берди.

Дарҳақиқат, экстремистик гуруҳларнинг ғаразли ҳаракатларига маърифат билан курашиш керак. Ҳадиси шарифларда ҳам пок юриш, ота-онани ҳурмат қилиш, бировнинг ҳақига хиёнат қилмаслик, сахий ва меҳрибон бўлиш буюрилади. Биз мана шу жиҳатларни ёшларга тушунтириб, уларнинг маънавиятини эзгуликка йўғирилган тушунчалар билан тўйинтириб боришимиз керак.

Турли оқимларга кўр-кўрона қўшилиб қолаётган ёшларда, аввало, диний билим етишмайди. Уларга Қуръони карим нотўғри тушунтирилган. Аслида эса ислом дини покликни, тинчликни тар­ғиб қилади. Адашганлар билан учрашганимда уларнинг онгига умуман ёт ғоялар сингдирилганига гувоҳ бўламан. Улар «жиҳот» сўзини одамларни ўлдириш, деб талқин қилмоқда. Аслида «жиҳот» арабча «жаҳата» сўзидан олинган бўлиб, ҳаракат деган маънони билдиради. Яъни, яхшилик йўлида ҳаракат қилишдир.

Бундан мутлақо хабари йўқ бўлган йигит-қизлар ёвуз ниятлилар орқасидан эргашмоқда. Кўплаб давлатларда бундай оқимга кирганлар асло кечирилмайди, уларга оғир жазо берилади. Лекин Президентимиз кечириш, хатосини тушунган, тўғри йўлга қайтганларни жамиятнинг фаол аъзосига айлантириш кераклигини таъкидлади. Турли оқимларга билиб-билмай қўшилиб қолганларни ота-оналар, қариндошлари бу йўлдан қайтаришга ҳаракат қиляпти.

Президентимиз яна бир гапни алоҳида таъкидлади. Яъни, ҳар бир одамнинг уйида Қуръони карим бўлиши шарт. Ҳар куни ҳеч бўлмаса, бир варақдан ўқинглар, деди Юртбошимиз. Устозимиз Абдулазиз Мансур Қуръонни таржима қилди. Унга муфтий ҳазратлари тафсири ирфон китобини ёздилар. Катта ҳажмдаги ислом энциклопедияси чоп этилди. Биз Қуръонни яхши билмасдан туриб, ёмон ниятли одамларга қарши кураша олмаймиз. Улар ўз кирдикорларини, ғаразли ишларини дин билан боғламоқда. Аслида динимизда бундай разолат йўқ.

Яна бир муҳим масалага эътиборингизни қаратмоқчиман. Президентимиз динимизга, халқимизга хизмат қиладиган масканларни ободонлаштириш, янгиларини барпо қилиш ҳақида сўз юритди. Сурхондарё вилояти Шер­обод туманидаги Исо Термизийнинг мангу қўним топган оромгоҳларида илмий марказ ташкил қилинди. Бухоро вилоятидаги Мир Араб мадрасасининг аввалги мавқеини тиклаш, моддий-техник базасини мустаҳкамлаш, Тошкентда Ислом маданияти марказини барпо этиш ҳақидаги гаплардан ёши улуғ уламоларимизнинг кўзларига ёш келди.

Жамиятда ижтимоий барқарорликни таъминлаш, муқаддас динимиз софлигини асраш бўйича билдирилган фикрлар зиммамизга катта масъулият юклайди. Бизни ғайрат-шижоат билан ишлашга ундайди.

— Дин пешволари билан учрашувнинг аҳамияти беқиёс, — деди Ўзбекистон Вазирлар Маҳкамаси ҳузуридаги дин ишлари бўйича қўмитанинг бўлим бошлиғи Дилшод ­Бобожонов. — Чунки дунё ҳамжамиятида тинчлик масаласи энг долзарб саналади. Динимиз бировнинг жонига озор бериш, ўлдириш каби иллатларни қоралайди. Инсон руҳияти билан боғлиқ бўлгани учун ёвуз ниятли кишилар динни ниқоб қилиб, одамлар онгини заҳарлашга ҳаракат қиляпти. Чунки улар иқтисод, сиё­сат орқали бирор-бир мамлакатнинг ичига кира олмайди, у ерда душманлик кайфиятини уйғота олмайди.

Афсуски, ҳозир сиёсий вазиятни қўлга олиш учун диндан омил сифатида фойдаланиляпти.

Бугун Ироқ, Сурия каби давлатлардаги террорчилар орасида ўзбекистонлик ёшлар ҳам борлиги ҳаммамизни қаттиқ ташвишга солади, албатта. Бунинг сабабини чуқур ўрганиб, илдизи билан қуритиш керак бўлади.

Яқинда Жиззах вилоятининг Шароф Рашидов туманида аҳоли билан учрашув бўлди. Унда бир аёлдан фарзанди қаердалигини сўрадик. У ўғлининг Россия давлатига ишлашга кетганини айтди. Охирги марта қачон гаплашганини сўраганимизда, икки ойча бўлди, деди. Биз фарзандингиз аниқ Россиядами, деб сўрадик. У аёл «ҳа» деб жавоб берди. Ҳужжатли видеотасвирда унинг ўғлини кўрсатиб, ким эканини сўрадик. Бу йигит ўғли эканини тасдиқлади. Бу расм ўғлининг ватанимиздан чиқиб кетишдан олдинги кўриниши эди. Кейин ўғлининг айни пайтдаги суратини намо­йиш қилдик. Иккинчи расмда унинг ўғли Сурияда соқолларини ўстириб олган, қўлларида автомат ушлаган ҳолда турибди. Икки расм ўртасидаги фарқ ер билан осмонча эди. Биринчи расмдаги илиқлик, меҳр тўла нигоҳ ўрнини иккинчи суратда разиллик қиёфаси эгаллаган эди.

Президентимиз ўз нутқида «Ўз уйингни ўзинг асра!» деган даъватга бугун «Ўз болангни ўзинг асра!» деб қўшимча киритиш вақти келди, дея таъкидлаб ўтди. Ҳақиқатан ҳам, ота-оналар ҳушёр бўлиб, бола тарбиясидаги масъулиятни чуқур ҳис қилса, у фарзандини ёмонликлардан асраган бўлади. Улар фақат оила ташвишлари, рўзғор тебратиш билан овора бўлмасдан боласи тарбияси учун ҳам кўпроқ вақт ажратиши керак, деб ўйлайман.

Давлатимиз раҳбари ҳар бир ижтимоий ҳимояга эҳтиёжманд ёки муаммоси бор оилага кириб, уларнинг масаласини ҳал қилиш чорасини кўриш топшириғини қўйди. Фарзандининг қилмишларидан юзи қора бўлиб турган ота-онани изза қилиб, камчиликларини айтиш эмас, аксинча, уларнинг дардига мал­ҳам бўлиш кераклигини таъкидлади. Фарзанди ёки бирор-бир қариндоши оқимга кириб қолгани учун ўша оилани маҳалладан ажратиш, одамлар орасига қўшилишига қарши чиқиш нотўғ­ри ҳисобланади. Аксинча, маърифатга чақириш орқали адашганларни тўғри йўлга қайтаришга эришиш мумкин. Жойларга борганда Президентимиз айни масалада нима иш қилинганини сўраганда, ҳокимлар қуруқ ҳисобот беришдан нарига ўта олмаяпти. Фақатгина рўйхатга олиш билан чекланиб қолмасдан, бу борадаги ишларимизни давлатимиз раҳбари белгилаб берган тарзда амалга оширишимиз зарур. Ана шунда қуруқ ҳисоботларга барҳам берилади, маънавиятни юксалтириш ишлари жадал тус олади.

— Бугунги тадбир мавзуси қанчалик муҳимлигини ҳаммамиз юрак-юракдан ҳис қилиб турибмиз, — деди «Ўзбекистон овози» ва «Голос Узбекистана» газеталари Бош муҳаррири Сафар Остонов. — Президентимиз нутқини катта қизиқиш билан, қониқиш билан, ҳаяжон билан тингладик, матбуотда ўқидик. Бу нутқда ҳаётимизнинг ўткир муаммолари ҳақида қанчалик аччиқ бўлмасин, очиқ гаплар айтилди.

Биз шу пайтгача кўзига тик қарашга доим ҳам журъат этолмайдиган оғир муаммолар ҳа­қида очиқ-ойдин айтилди, уларнинг сабаблари чуқур таҳлил этилди ва бу муаммоларни бартараф этиш бўйича аниқ вазифалар белгилаб берилди. Нутқ­даги асосий ғоя, асосий фикр, мақсад, тўғриси, ёшларимиз тарбияси билан боғлиқлигини англаб турибмиз. Нима учун ёшлар тарбияси масаласи бугунги кунда шунчалик долзарб аҳамият касб этмоқда? Нега бу мавзу давлатимиз раҳбарини шунчалик ташвишга солмоқда? Бу саволларга жавобларни ҳам Президентимиз ўз нутқида айтиб ўтди.

Дунёда содир бўлаётган нохуш воқеа-ҳодисалар, хавф-хатарларнинг асосий иштирокчиси ёшлар бўлмоқда. Диний экстремистик, халқаро террорчилик гуруҳларига ўзбекистонлик ёшлар ҳам қўшилиб қолаётгани афсус билан айтилмоқда. Биз аввало бир савол устида ўйлайлик: ёшларимиз қандай қилиб ёвуз кучлар тузоғига илиниб қолмоқда? Демак, қаердадир хато бўлган, эътиборсизлик бўлган. Тез ўзгариб бораётган дунё, деймиз, глобаллашув жараёнлари кучайиб бораётган дунё, деймиз. Катта-катта мамлакатлар манфаатлари тўқнашуви кескинлашиб боряпти, деймиз. Мана шундай нотинч замонда ёшлар тарбиясига таҳдидлар ҳам кўпайиб бормоқда. Уларнинг тарбиясига хуруж қилаётган кучлар нималардан иборат?

Ҳозир ёшларнинг мафкурасига таъсир қилаётган таҳдидлардан бири — «оммавий мада­ният». Бу биз ҳар куни кўрадиган турли телеканалларда, ҳар хил кўрсатувларда намоён бўлади. Баъзан кўчадан сотиб олиб, уйда болалар билан кўрадиган фильмларда намоён бўлади. Шундай концерт шоулари, фильм­лар борки, уларнинг мазмунига эътибор берадиган бўлсак, «оммавий маданият» тарғ­иботи яширин тарзда бўлаётганини сезамиз. Биз соддалик қилсак, эътибор бермасак, болаларимиз маънавий бузуқ фильмларга термулиб ўтирса, катта хато қилган бўламиз.

Ўта ташвишли масалалардан яна бири — бу диний экстремизмдир. Шундай ачинарли, даҳшатли мисоллар борки, кишини оғир ўйга толдиради. Нега улар ўз ота-онасининг гапига кирмай, ўзига етти ёт бегона, жоҳил кимсалар кетидан эргашиб юрибди? Бугун террорчи гуруҳларга қўшилиб қолган ёшлар оқ сут берган онаси, нон-туз бериб вояга етказган отасига қандай қилиб қарши боради? Динний экстремистлар кўпроқ мустақил фикри бўлмаган, турли сабаблар билан ҳаётда ўз ўрнини тополмаётган, ота-она, мактаб, маҳалла эътиборидан четда қолган ёшларни тузоққа илинтиришга ҳаракат қилишади.

Партиямиз фаоллари маҳаллаларда бўлганида ана шу иллатлар ҳақида ота-оналарга тушунтиришлари керак. Ота-она, маҳалла, жамият лоқайд бўлмаса, болаларимиз ўзгаларнинг қўлига тушиб қолмайди. Президентимизнинг «Ўз болангни ўзинг асра!», деган даъвати замирида қандай маъно-мазмун, юксак вазифа мужассамлигини ҳаммамиз тушуниб олишимиз керак.

Тадбирда тарғибот-тушунтириш ишларини кучайтириш, бу борада партия ташкилотлари ва депутатлик корпуси масъулиятини ошириш, соҳага доир қонунчиликни янада такомиллаштириш бўйича таклиф ва тавсияларни шакллантириш масалалари юзасидан тегишли вазифалар белгилаб олинди.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.