24.06.2017

ЎЗБЕКИСТОНДА БАХТЛИ ВА ХУШКАЙФИЯТ ОДАМЛАР ЯШАЙДИ

Мамлакатимизда амалга оширилаётган оқилона сиёсат натижасида иқтисодий ва ижтимоий тараққиётга эришилмоқда, халқимиз фаровонлиги муттасил юксалиб бормоқда. Бу қатор нуфузли халқаро ташкилотлар, тадқиқот институтлари томонидан ҳар йили эълон қилинаётган халқаро рейтингларда ўз исботини топмоқда.

Ўзбекистон яқинда эълон қилинган бахтиёрлик ва хушкайфиятлилик индексига кўра 142 мамлакат орасида 3-ўринни, Мустақил Давлатлар Ҳамдўстлиги давлатлари ўртасида 1-ўринни эгаллади.

Gallup World тадқиқот ташкилоти томонидан 2016 йил якунлари бўйича тайёрланган ушбу ҳисобот 142 мамлакатда ўтказилган ижтимоий сўров натижалари асосида тузилган. Сўровда 150 мингга яқин киши иштирок этган. Рейтингда одамлар кайфияти, ҳаёти ва турмушидан мамнунлиги қиёсий таҳлил қилинган.

АҚШнинг Gallup World муассасаси раҳбар ва ташкилотлар ишида қўл келувчи таҳлиллар тайёрлаш ҳамда таклифлар бериш билан шуғулланадиган дунёдаги энг нуфузли ташкилотлардан бири. Халқаро миқёсда 80 йилдан ортиқ тажрибага эга Gallup World ўз тадқиқотлари билан дунёда ходимлар, мижозлар, талабалар ва фуқаролар билан боғлиқ энг муҳим муаммоларни ҳал этишга кўмаклашиб келаётир.

Маълумот ўрнида шуни айтиш жоизки, 2014 йилда Gallup World томонидан ўтказилган тадқиқотда Ўзбекистон жаҳоннинг 30 та энг бахтли мамлакатлари қаторидан ўрин олган эди.

Ўзбекистон бахтиёр ва хушкайфият халқи билан бу ва бошқа рейтингларда юқори ўринларни эгаллаб келаётгани бежиз эмас. Мамлакатимизда олиб борилаётган иқтисодий-ижтимоий ислоҳотлар самаралари, халқимиз фаровонлиги, турмуш даражаси ва сифати мазкур мезонларга тўла мос келади.

 

Н.МАНЗУРОВА,

ЎзА мухбири.



DB query error.
Please try later.