05.12.2017

МУРОЖААТЛАРНИ ЎРГАНИШ

ва одамларга ёрдам бериш – долзарб вазифа

Жорий йилнинг ўтган ўн ойида Шўрчи туманида 1 минг 400 га яқин кичик бизнес ва хусусий тадбиркорлик субъектлари иш бошлаган. Туманда сервис, касаначилик, чорвачилик, балиқчилик, паррандачилик, асал­аричилик жадал ривожланяпти.

— Ютуқлар қатори ечимини кутаётган муаммолар ҳам бор, — дейди ЎзХДП Шўрчи туман кенгаши раиси, халқ депутатлари туман Кенгашидаги партия гуруҳи раҳбари Ботир ­Ражабов. — Айни пайтда аҳолини кўпроқ уй-жой, тоза ичимлик суви, бандлик масалалари ўйлантирмоқда. Йўл қурилиши, коммунал хизмат, таълим, тиббиёт, банк-молия ва бошқа соҳаларда ҳам камчиликлар борлигидан кўз юма олмаймиз. Уларни бартараф қилишда сиёсий партиялар, хусусан, депутатларимиз янада фаол бўлишлари талаб қилинади. Шунинг учун партиямиз Жамоатчилик қабулхонаси фаолиятини яхшилашимиз керак. Йил бошидан буён қабулхонага 100 дан ортиқ мурожаат тушган бўлса, 80 га яқин масала ўз ечимини топди. Қолганлари ўрганилмоқда.

— Куз-қиш мавсуми арафасида «Олтин ғишт ёғдуси» хусусий корхонаси буюртмасига асосан кўп қаватли уйлардан бирини таъмирлагандик, — дейди «Қора ариқ» маҳалласида яшовчи Акрам Менгтўраев. — Қурилиш ишлари якунлангандан кейин пудратчи ташкилот мутасаддилари 2 миллион 400 минг сўм беришни пайсалга сола бошлади. Масала юзасидан корхона раҳбари ва туман ҳокимлиги мутасаддиларига бир неча марта мурожаат қилдик. Аммо фойдаси бўлмади. Шундан кейин ЎзХДП Шўрчи туман кенгашидаги Жамоатчилик қабулхонасига бордик.

— Ҳақиқатан ҳам, ­Акрам Менгтўраев, Парда Холиқов, Эгамберди Холиқов, Баҳодир Раупов ва Бахтиёр Менгтўраев Заҳириддин Муҳаммад Бобур номли маҳалладаги 29-кўп қаватли уй-жойнинг том қисмини таъмирлаган, — дейди халқ депутатлари туман Кенгашидаги ЎзХДП гуруҳи аъзоси Гулмирза Норбоев. — Қурувчиларга 5 миллион 100 минг сўм берилган бўлса-да, қолган 2 миллион 400 минг сўм пул ўз вақтида тўланмаган. Масала депутатларимиз томонидан атрофлича ўрганилди ва қисқа муддатда ижобий ҳал қилинди.

— Икки нафар фарзандимиз бор, — дейди «Ёш ғайрат» маҳалласида истиқомат қилувчи Тошбой Ҳасанов. — Турмуш ўртоғим Саодат Бекмуродова қишлоқ оилавий поликлиникасида ҳамшира бўлиб ишлайди. Яқинда туман электр таъминоти корхонасидан огоҳлантириш хати келди. Унда электр энергияси тўловидан 3 миллион сўмга яқин қарзимиз борлиги маълум қилинганди. Тўғриси, бундан ажабландим. Ахир турмуш ўртоғимнинг ойлик маоши ҳисобидан ҳар ой 40-50 минг сўм тўлаб келинаётган бўлса, қарздорлик ­қандай пайдо бўлиши ­мумкин? Мутасаддилар ­«Тў­лайсиз, бошқа иложи йўқ», деб туриб олишди. Хуллас, депутат аралашуви билан қарзимиз йўқлиги аниқланди.

— Кўп йиллардан бери кўз хасталигидан азият чекаман, — дейди «Катта совур» маҳалласида яшовчи Холида Маматқулова. — Яқинда шифокорлар вилоят марказига боришни маслаҳат беришди. Моддий етишмовчилик сабаб Жамоатчилик қабулхонасига мурожаат қилдим. ЎзХДП Шўрчи туман кенгаши раиси Ботир Ражабов оилавий шароитимиз билан яқиндан танишди. Менга вилоят кўп тармоқли тиббиёт марказига бепул йўлланма берилди. Мутассаддиларга ўз миннатдорчилигимни билдираман...

— Бугун ҳар биримиз одамларнинг қувончу ташвишига шерик бўлишимиз шарт, — дейди халқ депутатлари туман Кенгашидаги ЎзХДП гуруҳи аъзоси Сайёра Абрайқулова. — Ҳудуддаги ижтимоий-иқтисодий муаммоларни ўрганиш ва уларни ҳал этиш юзасидан депутатлик назоратини ўрнатиш муҳим аҳамиятга эга. Амалий ишлар билан одамларга фойдамиз тегса, ишончни оқлаган бўламиз.

 

Абдумалик ҲАЙДАРОВ,

«Ўзбекистон овози» мухбири. 



DB query error.
Please try later.