Термизда Фуқароларнинг ўзини ўзи бошқариш органлари фаолиятини мувофиқ­лаш­тириш бўйича Сурхондарё вилояти шаҳар ва туманлар кенгашларига Ўзбекистон Республикаси Президенти совғаси — хизмат автомашиналарини топширишга бағишланган маросим бўлиб ўтди.

Давлат ва жамоат ташкилотлари вакиллари, маҳаллалар фаоллари, оммавий ахборот воситалари ходимлари иштирок этган тадбирда Президентимиз раҳнамо­лигида мамлакатимизда фуқароларнинг ўзини ўзи бошқариш органлари нуфузини юксалтириш, ташкилий асосларини янада такомиллаш­тириш, давлат ҳокимияти ва бошқаруви органлари билан ҳамкорлигини мустаҳкамлаш борасида амалга оширилаёт­ган ишлар жойларда тинчлик-осойишталик ва аҳолининг фаровон турмушини таъмин­лашга хизмат қилаётгани алоҳида таъкид­ланди.

Давлатимиз раҳбарининг 2017 йил 3 февралдаги «Маҳалла институтини янада такомиллаштириш чора-тадбирлари тўғ­рисида»ги фармони бу борада муҳим дастуриламал бўлмоқда.

— Конституциямиз қабул қилинганининг 25 йиллик байрами арафасида Фуқаро­ларнинг ўзини ўзи бошқариш органлари фаолиятини мувофиқлаштириш бўйича Сурхондарё вилояти шаҳар ва туманлар кенгашларига Президентимиз номидан хизмат авто­машиналари совға қилингани соҳага қаратилаётган юксак эътибор ифодаси бўлди, — дейди Фуқароларнинг ўзини ўзи бошқариш органлари фаолиятини мувофиқлаштириш бўйича Сурхондарё вилояти кенгаши раисининг биринчи ўринбосари Абдулҳаким Эшмуродов. — Вилоятда 717 маҳалла фуқаролар йиғини мавжуд. Уларнинг фаолиятини мувофиқ­лаштириш ва халқ билан яқинлаштиришда шаҳар, туман кенгаш­ларининг алоҳида ўрни бор.

Тадбирда Фуқароларнинг ўзини ўзи бошқариш органлари фаолиятини мувофиқ­лаштириш бўйича Термиз шаҳар ва 13 туман кенгашига Президент совғаси — хизмат автомашиналарининг калити топширилди.

Тадбирда Ўзбекистон Республикаси Президентининг Давлат маслаҳатчилари Р.Комилов, О.Муродов, Қ.Қуронбоев, Бош вазир ўринбосари, Республика Хотин-қизлар қўмитаси раиси Т.Норбоева ва Сурхондарё вилояти ҳокими Э.Турдимов иштирок этди.

Х.МАМАТРАЙИМОВ,

ЎзА мухбири.