15.06.2017

ХОТИН-ҚИЗЛАРНИ ҚЎЛЛАБ-ҚУВВАТЛАШ — УСТУВОР МАСАЛА

Тошкент шаҳар партия кенгаши Тошкент халқаро Вестминстер университетида ўқув-семинар ўтказди. Унда Олий Мажлис Қонунчилик палатасидаги ЎзХДП фракцияси аъзолари, партия Марказий Кенгаши ходимлари, маҳаллий Кенгашлар депутатлари, «Фаол аёллар» қаноти аъзолари ҳамда жамоатчилик вакиллари иштирок этди.

Семинарда партия сафидаги хотин-қизларнинг ижтимоий-сиёсий фаоллигини ошириш ва уларда етакчилик кўникмасини шакллантириш, ривожлантириш масалалари атрофлича муҳокама этилди. Аҳоли орасига чуқур кириб бориш, уларни ўйлантираётган муаммоларни ўрганиш, юртимизда олиб борилаётган ислоҳотларни кенг тарғиб қилиш зарурлиги таъкидланди.

— Жойлардаги учрашув ва мулоқотларда хотин-қизларни ўйлантираётган муаммолар ўрганилмоқда, — деди Олий Мажлис Қонунчилик палатасидаги ЎзХДП фракцияси аъзоси Комила Каромова. — Айрим поликлиникалардаги тиббий ускуналар эксирган. Аёлларни тиббий кўрикдан ўтказишда қийинчиликлар кузатиляпти. Оддий биоким­ёвий таҳлил учун кўп тармоқли поликлиникаларга боришга тўғри келмоқда. Бандлик ва ижтимоий ҳимоя масалаларида ҳам қилиниши керак бўлган ишлар анчагина. Муҳими шундаки, опа-сингилларимизда мурожаат қилиш маданияти ўсмоқда, муаммо юзасидан ўз таклифларини ҳам билдиришмоқда. Ушбу вазиятда бизга катта масъулият юкланади. Шунинг учун «Фаол аёллар» қаноти етакчилари ўз устида ишлаши, сиёсий билимини мунтазам равишда ошириб бориши лозим бўлади.

ЎзХДП Марказий Кенгаши сектор мудири Гулшан Асатова, Тошкент шаҳар партия кенгаши раиси ўринбосари Нилуфар Юлдашева, Тошкент шаҳар Кенгашидаги партия гуруҳи аъзоси Муқаддас Раҳматуллаева ушбу масалалар бўйича ўз фикр-мулоҳазаларини билдиришди. Шунингдек, тадбирда амалиётга татбиқ этилаётган лойиҳалар ва улардан кутилаётган натижалар таҳлил қилинди.

— Партиямиз Марказий Кенгаши томонидан долзарб лойиҳалар йўлга қўйилган, — деди Тошкент шаҳар партия кенгаши хотин-қизларнинг ижтимоий-сиёсий фаоллигини ошириш сектори мудири Гулчеҳра Азизова. — Мазкур лойиҳалар давомида муаммолар аниқланиб, депутатлар ва ҳамкор ташкилотлар кўмагида ҳал этилмоқда. Масалан, «Ижтимоий ҳимоядан — ижти­моий фаоллик сари» лойиҳаси доирасида Тошкент шаҳрида 89 нафар хотин-қизнинг ишга жойлашишига ёрдам берилди. «Ҳар бир инсонга меҳр-мурувват кўрсатиш бурчимиздир» лойиҳаси асосида 450 дан ортиқ ижтимоий ҳимояга эҳтиёжманд опа-сингилларимиз ҳолидан хабар олинди. Ўтказилаётган тадбирлар натижасида жорий йилнинг ўтган даврида 600 нафарга яқин хотин-қиз партиямиз сафига қабул қилинди. Жамоатчилик қабулхоналарига тушган мурожаатларнинг 88 фоизи ижобий ечим топди.

Семинар танқидий таҳлиллар, баҳс-мунозара асосида ўтди. Йўл қўйилган камчиликларни бартараф этиш, имкониятлардан самарали фойдаланиш зарур, деган хулосага келинди.

 

Зилола УБАЙДУЛЛАЕВА,

«Ўзбекистон овози» мухбири.



DB query error.
Please try later.