28.11.2017

САМАРҚАНДДА ҲОСИЛ БАЙРАМИ

ҳалол ва фидокорона меҳнатнинг ҳақиқий тантанасига айланди

Ўтган шанба куни Самарқандда бўлиб ўтган Ҳосил байрамида тўкинчилик ва фаровонлик ижодкорлари — бободеҳ­қонларнинг, бутун вилоят аҳлининг меҳнати яна бир бор улуғланди, шарафланди.

Тадбир учун танланган жой — шаҳар четидаги эшкак эшиш канали соҳили эрта тонгданоқ байрам шукуҳига бурканди. Бу ерда барча туманлар илғор фермер хўжаликлари томонидан етиштирилган қишлоқ хўжалик маҳсулотлари кўргазмалари ташкил этилди. Куй-қўшиқ ва рақс, полвонлар беллашувлари авж олди.

Вилоят ҳокими Туробжон Жўраев барчани Ҳосил байрами билан қизғин қутлади. Илғор фермер хўжаликлари ва туманларни эътироф этди. Ҳалол ва фидокорона меҳнатлари учун уларга миннатдорчилик билдирди. Йилни юқори меҳнат кўрсаткичлари билан якунлаган туманларга қимматбаҳо совғалар топширилди. Президентимиз совғаси — учта «Дамас» машинаси Иштихон, Каттақўрғон ва Нарпай туманларига топширилди.

Мухбиримиз байрам қатнашчиларининг айримлари билан суҳбатлашиб, уларнинг фикрлари билан қизиқди.

— Яхши меҳнат қилинса, албатта, байрамлар ярашади, — дейди Олий Мажлис Сенати аъзоси Зайнаб Бердиева. — Бугун Самар­қанд аҳлининг юзи ёруғ. Жорий йилда самарқандлик фермеру деҳқонлар 218 минг 900 тоннадан зиёд пахта, 318 минг 734 тонна дон, 2 минг 829 тонна пилла етиштиришди. Сабзавот ва полиз маҳсулотлари ҳам мўл бўлди. Ушбу неъматларнинг бир қисми экспортга йўналтирилди. Бу ютуқларга осонликча эришилгани йўқ, албатта. Ҳар бир рақам замирида фермерларимизнинг азму шижоатлари, тажриба ва маҳоратлари мужассамдир.

— Ўтган йиллар давомида вилоятимизда 219 лойиҳа доирасида 5 минг 460 километрдан ортиқ коллектор тармоқларини реконструкция қилиш ва қуриш ҳамда таъмирлаш ишлари олиб борилди, — дейди вилоят мелиоратив экспедицияси бўлим бошлиғи Меҳрож Абдураҳмонов. — Натижада 19 минг 500 гектар ер майдонининг мелиоратив ҳолати яхшиланади. Ҳозирги пайтда гидротехник иншоотлар қуриш, қирғоқларни ҳимоя қилиш ишлари давом этмоқда.

— Ҳисоб-китобларга кўра, вилоятда пахтачиликдан 53 миллиард 459 миллион сўм фойда олиниб, рентабеллик даражаси 15,2 фоизни ташкил қилиши кутиляпти, — дейди халқ депутатлари вилоят Кенгашидаги ЎзХДП гуруҳи раҳбари Бахтиёр Шукуров.

 2017 йилда биргина пахта хом­ашёси мамлакатимиз иқтисодига келтирадиган фойдани ҳисоблаб кўрайлик, иш ўринлари, озиқ-овқат ва бошқа маҳсулотлар, даромад, аҳоли фаровонлиги… Шунинг учун вилоятимизда етиштирилган мўл ҳосилнинг қадри баланд.

Халқ депутатлари вилоят Кенгашидаги ЎзХДП гуруҳи аъзоси, «Эл-юрт ҳурмати» ордени соҳиби, Ўзбекистон Республикасида хизмат кўрсатган пахтакор Элибой Таниев ўзининг ғурур ва қувончини шундай изҳор этди:

— Ғаллакорларимизнинг саъй-ҳаракатлари билан 107,5 минг сувли, 49 минг гектар лалми майдондан 318 минг 730 тоннадан ортиқ сара дон етиштирилиб, давлатга ғалла сотиш шартномавий режаси 106,5 фоизга бажарилди. Вилоят бўйича ўртача ҳосилдорлик сувли майдонда 54 центнерни ташкил қилди, яъни 1990 йилдагига нисбатан ўртача ҳосилдорлик 4,5 баробарга ошди.

— Вилоятимизда ҳосилдорлиги паст бўлган 7 минг 200 гектар пахта ва ғалла майдонлари қисқартирилиб, сабзавот ва полиз маҳсулотлари, озуқабоп экинлар экиш йўлга қўйилди, — дейди вилоят қишлоқ ва сув хўжалиги бош­қармаси бош мутахассиси Одил Арзиқулов. — 2017 йилда интенсив боғлар яратишга алоҳида эътибор қаратилди ва 648 гектар ерда ана шундай боғлар барпо этилди. 2018 йилда 5 минг гектар пахта ва ғалла майдони қисқартирилиб, қўшимча равишда 900 гектар картошка, 1868 гектар сабзавот, 450 гектар интенсив боғ, 1465 гектар озуқабоп экинлар, 316 гектарда бошқа турдаги экинлар экилади. Бу каби ислоҳотлар аввало ички бозорни сифатли маҳсулотлар билан тўлдириш, экспорт ҳажмини янада ошириш имконини бермоқда. Бундан ташқари, паррандачилик, балиқчилик ва асал­аричиликни янада ривожлантириш тадбирлари кўрилмоқда.

Ҳосил байрами кун бўйи давом этди. Пойтахтимиз Тошкентдан келган бир гуруҳ ижодкорлар, таниқли санъаткорлар ҳам Самар­қанд деҳ­қонларини, бу ютуқларга ҳисса қўшган барча-барчани қутлашди, уларнинг дил сўзлари, куй-қўшиқлари байрам қувончи ва тантаналари шукуҳини янада оширди...

 

Абдурасул САТТОРОВ,

«Ўзбекистон овози» мухбири.



DB query error.
Please try later.