10.06.2017

ИСТИҚБОЛЛИ ЛОЙИҲАЛАР РАҒБАТЛАНТИРИЛМОҚДА

Тошкент шаҳар ҳокимлигида «Ривожланишнинг Ҳаракатлар стратегияси: амалиёт, самара ва ­истиқбол» мавзуида семинар бўлиб ўтди.

Тадбирда Президентимиз Шавкат Мирзиёев раҳнамолигида ишлаб чиқилган 2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифалар ижроси фуқаролик жамияти институтлари фаолиятини ривожлантириш, уларнинг ижтимоий фаоллигини янада ошириш, ижтимоий шерикликнинг самарадорлигини тубдан юксалтиришга ҳам хизмат қилаётгани таъкидланди.

Семинарда халқ депутатлари Тошкент шаҳар Кенгаши ҳузуридаги ижтимоий шериклик бўйича жамоат комиссиясининг 2016 йилдаги ­фаолияти якунлари ҳамда жорий йилнинг ўтган беш ойи давомидаги фаолияти натижалари муҳокама этилди.

Ўзбекистон Республикаси Олий Мажлиси ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича Парламент комиссияси томонидан 2016 йилда молиялаштирилган давлат грантлари асосида амалга оширилган лойиҳалар, жорий йилда эълон қилинган танловлар йўналишлари ҳақида маълумот берилди. Нодавлат нотижорат ташкилотларнинг низом талаблари доирасида фаолият юритиши, белгиланган вазифаларни бажариши, қўлга киритилган давлат гранти маблағларини мақсадли сарфлаши зарурлиги уқтирилди.

Олий Мажлис ҳузуридаги жамоат фонди ўтказган давлат гранти 1- ва 2-танловлари ғолибларига сертификатлар топширилди.

— Танловда «Ўзбекистонда ҳавода сузиш спорти ва учишни ривожлантириш» деб номланган лойиҳамиз билан иштирок этиб, давлат грантига сазовор бўлдик, – дейди Ўзбекистон аэронавтика федерацияси раҳбари Тоҳиржон Солиев. – Лойиҳамиз нафақат ҳаво шарида саёҳатни ташкил этиш, балки аҳолининг экологик ва тиббий маданиятини юксалтириш, мамлакатда экотуризмни ривожлантириш ҳамда соғлом турмуш тарзини тарғиб қилишга йўналтирилгани билан ҳам аҳамиятлидир.

Семинар доирасида грант танловларда иштирок этиш шартлари ва талаблари, грант лойиҳаларни тайёрлаш, ҳисоботларни тақдим этиш масалалари юзасидан маҳорат дарслари ўтилди.

Ҳаракатлар стратегиясининг мазмун-моҳияти ва аҳамияти, давлат ҳокимияти ва бошқаруви идоралари билан нодавлат нотижорат ташкилотлари ўртасидаги ижтимоий шериклик асосида амалга ошириладиган лойиҳаларнинг муҳимлиги хусусида маърузалар тингланди.

 

Икром АВВАЛБОЕВ,

ЎзА мухбири.



DB query error.
Please try later.